Pajeng tabiak meng sa baoh sang urang ngak nong, thun 1999, ong Trần Hồng Quan tame ngak bruk raong ikan hadang. Meng akaok meti, ong salih 2 cong taneh (2.000 m²) ngak danao raong tapa. Tapa duah thau, ong Quan blei tame 2.000 drei tapa pajaih meng Taiwan (Trung Quoc) ka bruk raong iek dahlau, paok jien buh tame jaik 6 mbaik ameh di meng tuk nan. Hadei dua thun kham merat, ong hu ta-eng karam caih baoh, raong jak jeng dupa pajaih. Danao raong hu ong pasiam dalam labaih 1,5m, di ala caik gluh piah dupa mblo nyut tui adat di nyu, ar danao ngak meng simeng, padang kapal pacang. Ong Quan daok ngak var ro mabaoh, hu pabung pacang, cuah haluk tathah piah ka tapa ta-eng tagok mabaoh. Urak ini, di taneh 4ha, ong Quan buh jien tame 16 danao raong tapa patui gauk, saong 1ha ngak labik langyah ia tathuak nerak di danao raong, pala padai huu co hu jien mek tame.

Tui kuhria rah tapa yaok harei tapa mbang abih labaih 2 trieu dong jien blei kaya mbang ikan tasik, abao kanyik. Sa mbang raong dui atah meng 1 thun meteh tal 2 thun, thraong mek tuk dupa 16 bilan umo ba tagok. Dom thun jaik ini yaom tapa di angaok darak pasar hu patrun min labik di ong Quan jeng daok hu akaok tabiak tani tanat. Ong Quang ndom meyai lac: “Akaok bilan 9 bahrau blaoh, dahlak hulin pablei 12.000 drei tapa mek rilo, yaom kuhria rah tapa 170.000 dong/kg; hadei tuk kaoh abih daok jien laba labaih 800 trieu dong”.

Tui panuac khan di ong Quan, tapa meng 36 bilan umo ba tagok brei tame mebaoh piah karam pajaih, tukvak tapa mabaoh meng bilan 3-8 tui saka ia bilan. Baoh hu pataom hadei tuk amaik ame mabaoh, hu karam nhan tao meng cuah tathah, khik tani tanat di harei meng 36-38°C, malam 26-27°C, bruk caih baoh mek hu labaih 95%. Baoh oh njauk tanut hu ong pablei yaom 70.000 dong/kg (labaih 200 – 220 baoh).

Tapa bahrau caih baoh raong dalam labang ndong, salih ia yaok harei, dalam caik hala li-u ka dupa kandaok. Hadei 15 harei, tuk randap haong ia, khol nyu hu salih tapa danao raong. Yaok thun, ong Quan pabak 150.000 - 200.000 drei dupa pajaih 15 harei umo ka darak pasar.

Di ar dom danao raong tapa, ong Quan daok pala 140 phun durian, brei ndap nda jaik 5 tan/thun, mek tame yaok rituh trieu dong. Hadei labaih 25 thun pagam haong bruk raong dupa, ong Quan bhian hu dom drei tapa salih gen, hu drei trak tal 11kg.

Ong Huỳnh Văn Nhịn – Phaok Akaok Uy mban Mat tran Negar Viet Nam xa, Akaok Kapul urang ngak Nong xa Trường Long Tây brei thau, bruk di ong Quan hu pambuak khang kajap di pala padai – pala durian saong raong tapa, meng di nan ong brei yaom kaom glaong saong tani tanat. Oh sa janih ngak mbang naih joi, ong Quan daok daong mikva gam ngak kaya meda.

Yaom lac tukvak tapa yaom tapa hu salih karei, ong Quan jeng khik tani tanat kapul pajaih praong, pabak ka rilo tinh, ka urang kamei hu jien mek tame tani tanat saong brei bruk ngak bhian harei brei ka labaih 5 urang ngak bruk di bhum palei.

Bruk jak jeng di ong Quan jeng hu taduan meng rilo harak meyaom dom pakat. Abih di nyu nan lac, thun 2025, ong hu brei angan “Urang ngak nong Viet Nam naih joi”. Langiu di ngak mbang, ong daok chreih chrai ba drei tame bruk ngak rahra, pahla di bhum palei.

Tui taong yaom di urang pan akaok Kapul Urang Ngak Nong xa, bruk di ong Quan lac bruk naih gheih piah peih praong, daong jhul tagok bruk ngak nong tui jalan rilo, karo kajap./.