Gam haong dom urang anit ranam langik tasik, dalam nan njauk ndom mayai hu urang ngak nong chreih pala tuk tame bein li-u di ong thei thei jeng mboh takre. Hu phun li-u mong baoh rilo, tok glaong meteh met dut haong mbaok tame, paik baoh jeng biak mbuan. Dom phun glaong jang akaok menuac sa sit, daok tame tuk cakrok siam ye mong ini ndih taphia mong diah, baoh rilo kan si yaok abih.

Ong Như brei thau li-u ini lac tui pajaih li-u siem biar kanduh hijao. Dahlau diah, sa labik bein ong tok pala kreim mek rabung saong bahrau salih tapa pala li-u meng thun 2020 tal ini. Ong Như jeng lac sa urang nao dahlau peih mbang ngui ngan haong janih phun ini di Cồn Sơn, ngan haong jalan ngak piah duh ka jirah rivang.

Ong Như khan, dalam sa mbang pajeng ame trun tal sang urang gauk tian di tinh Vinh Long (klak), di angaok jalan nao, ong katuak tuk mboh talei phun li-u yaom lac phun oh glaong min rilo baoh ngak thei jeng maong. Hadei di nan, ong gaok gilac pajaih li-u ini, hu menyum ia li-u tapak nan biak chreih chrai, rilo meng lac kanduh lapih biak lagaih, ia yamen.

Hadei tuk hu menyum ia mbang baoh, ong Như duah thau saong nao tal Ben Tre klak piah blei pajaih mai pala. Dalam 100 phun pajaih pala mbang akaok meti ye metai labaih 50 phun, phun halei metai ong buac agha pala veik, oh klak bruk. Bruk kuria bein li-u oh njuel njac yau rilo urang sahaneng. Janih phun ini brei drak khak, bhian rao hala. Gaok mai, bilan pabdiak, yaok adit po bein brei tuh pruh tame takai agha 2-3 mbang.

Tal tukvak lagaih, ong Như brei cakak dalah mayao piah ka bangu li-u drah chroh tabiak langiu. Patui bruk atah di cuống blaoh ong cakak yaok mong daok meng 10-20 baoh. Tuk baoh li-u praong, baoh trak mong li-u oh veik hu. Po bein brei kak talei atau mek yaok mong piah oh jaoh.

Palai prein sangka iek glang min ong Nhựt mboh khang prein pala pajaih li-u siem biar. Kayua phun pala hu 1,5 m lac brei baoh, kuhria meng nan ba mai laba glaong. Di angaok sa phun, dom mong li-u hu baoh sit patui gauk patagok. Meyah tok kuhria dom baoh hu asar ye sa phun meda ba mai sa mbang 8 mong li-u, gaok mai rilo jang. Dalam nan mboh nyu nan lac, hatai chreih takre dak glaong tuk hadei 4 thun pala li-u, ong Như ngak jak jeng ka baoh li-u tabiak baoh luac thun.

Gam haong bruk luai ka baoh tabiak luac thun, sa baoh li-u di ong Như hu ia labaih 350-400ml, takik jang dut haong baoh li-u tui bilan. Min, ia jamen njauk hatai caong di urang menyum nan biak lagaih piah duh ka jirah rivang. Tui 70 phun la u daok brei baoh, kuhria rah tapa sa harei ong Như meda duh 30 tuai mai rah rivang, menyum ia li-u di labik. Bein phun li-u hu prein dui pachreih nan rilo thun tapa ong oh pablei tabiak langiu.

Urak ini, ong Như daok pasiam dom banah taneh daok veik dalam labik bein 4.500m2 piah pala li-u siem phun biar. Ong Như ndom mayai lac: “Bein phun li-u di dahlak duh ka jirah rivang nan oh pandar jru hoa hoc. Ngan haong anek rih halak haling ngak khat lahik, dahlak tok pandar sara lai haong ia tuh meng taduk trun piah pamatai”.

Amuk Lê Thị Bé Bảy, urang langyah ndom biai di HTX jirah rivang gah ngak nong di pulau Cồn Sơn, brei thau tuk sangka bein phun li-u, ong Như caik hatai tani tanat gah ilamo ky thuat saong caik rilo hatai tian iek glang kayau bein. Ong sangka tani tanat yaok harei nan phun li-u hu ginup prein piah brei baoh gam gam yaok thun. Langiu di nan, ala phun li-u lac dom mblang hareik hala kreim, bhian cakak la-an hijao. Nan lac dom asal kadha ngak ka tuai jirah rivang atau ruah tal ini piah menyum ia li-u, daok dalam langik hacih sa-at di alam./.