Amuk Trần Thị Út urak ini lac sa urang Yam ndok HTX tamun ia Ngọc Thành (xa Đông Phước, Ban Can Tho). Thun 2016, padang mbang ngui pala tamun ia gam saong 2 baoh sang majam halam hanyol, taneh 2.000 m2. Meng akaok meti, bruk pala tamun oh lac mbuan, kayua amuk Út saong pasang hu bac megru gah kinh te. Dalam tuk nan, bruk pala janih tamun ia ini brei hu pabak gam gam ka ilamo ngak kong saong pandar ilamo ky thuat langyah anek rih catang. Gam haong di nan, kayua kan kandah nan brei daong prein ka diuk pasang amuk Út duah thau saong blaoh majam sang majam hanyol hu padang tagok, jalan pala talauk, tuh tanjaoh ia hu pandar, daong khik tani tanat yaok thun saong patagok gaok kan kandah.

Thun 2021, baoh tamun ia Ngọc Thành mek hu angan VietGAP saong OCOP 3 baoh patuk. Bilan 5.2023, HTX padang hu 9 urang. Thun 2024, tamun ia Ngọc Thành hu brei angan OCOP 4 patuk, jeng labik naih gheih dalam bruk ngak nong ilamo ngak kong glaong di bhum palei.

Amuk Út brei thau, taong abih taneh pala di HTX hu pandar ilamo ngak kong bahrau, piah khik kajap tabiak baoh saong asar siam tani tanat. Tamun pala dalam sang kreih, pandar tada ngak meng xơ baoh li-u hu langyah blaoh saong pagam haong majam tuh tanjaoh ia di Israel. Taneh hu lang halam nyol ma-aom gah ngak nong daong khik pandiak la-an, patakik halak haling saong brei kein lagaih patagok glaong abih ka phun.

Jalan ngak tabiak hu ngak njauk meng bruk tuh ia ta-eng, pasang iek jit ruak taong abih, tal bruk pandar halau ia hacih tapa majam halang hadah krah saong drak khak huu co vi sinh. Hu meng yau nan, tamun patagok khang kajap, tabiak rilo baoh, asar siam glaong samu gauk, njauk piah pablei tabiak.

Piah hu dom baoh tamun njauk pablei hu, HTX iek praong rilo asal kadah, yau taneh njauk lagaih, pH meng 6 - 6,8, meda dinh duong saong tathuak ia siam; patrun pajaih tame bilan pataih tuk langik pandiak pandao; bhian pasang iek tanut tathah, tuh ia njauk lagaih saong drak khak huu co pambuak haong hoa hoc njauk lagaih. Abih di nyu nan lac, tukvak tabiak bangu, bruk bingu pabam jeng baoh hu pasang iek tani tanat piah khik kajap baoh saong asar siam.

HTX daok pambuak Mbang Pasang iek ngak nong pandar ilamo ngak kong glaong Hau Giang (klak) peih danak dak salih ilamo ngak kong, ngak alak vang saong tamun ngak thu laman. Meng di bruk nan, HTX buh jien tame brei jamraik ngak ndap nda, ba alak vang tamun ia tabiak darak pasar saong mek hu angan OCOP 4 patuk. HTX daok pamaong tal ngak ndap nda ngan haong ia kateik, tamun ia sara masam… piah pandar pandap tamo hu dahlau saong peih praong darak pasar pablei tabiak.

Urak ini, HTX tamun ia Ngọc Thành hu 12 baoh sang majam hanyol hu taneh 8 ha, yaok thun brei pabak meng 100 – 150 tan baoh tamun tabiak darak pasar. Langiu di nan bruk ngak ndap nda, HTX daok buh jien tame jirah rivang sinh thai, padang homestay raok tuai ba drei tame labik ngak nong. Amuk Út caong khin pambuak veik 5 - 10 sang bein piah ngak tabiak ndap nda jirah rivang bhap bini, daong tuai damuai hu rilo bruk ba drei tame saong vaih mai rilo mbang.

Meng sa labik sit meng akaok meti, HTX tamun ia Ngọc Thành hu padang chuoi yaom kaom kandauk: pala – ngak ndap nda – pablei – jirah rivang. Ini lac bruk hu makna piah baoh tamun ia Can Tho tabiak rilo darak pasar./.