Bồn bồn ieu lac sa janih phun njam tamuh khang di taneh lakhun ia mbak. Daok di bhum Cái Nước, tinh Ca Mau brei pala nyu piah pablei meng lavik. Dom thun bahrau di ini, urang daok di glai U Minh hạ jeng pala iek phun bồn bồn blaoh brei pambak tapa ralo di xa Khánh An. Mada yaom lac daok suai min pala phun bồn bồn drah jeng phun pala brei ka ngak mbang blei salih di urang bhap bini di ini.

Sa-ai Phạm Văn Dư, urang nao dahlau di dalam bruk pala phun jeng ye urang ngak mbang jeng brei thau lac phun bồn bồn biak mbuan si pala nyu. Tuk camareip sa-ai kuhria ngka tukik iek min brei salih 2ha taneh padai oh jak jeng tapa pala bồn bồn. Mboh yaok bilan gait duah hu meng 15 - 20 trieu dong.

“Laba glaong ralo jang dut song pala phun tràm, dut tui ngak padai nyu yaom glaong meng 2 - 3 mbang. Kuhria pala bồn bồn ye mboh sa bilan bayar abih jeng daok labaih 1,5 trieu dong. Meng tuk pala phun bồn bồn ini ye mboh mikwa jeng tagok. Dahlak pala bồn bồn 4 thun blaoh, jien ndo jeng hu tani tanat blaoh hu yau nan jeng hu truh kathaot.

Pala bồn bồn yaok bilan pablei sa mbang. Urang di taneh glai U Minh kaya mada di taneh daok praong yau nan ye parabha gauk pala bonbon piah mek bhian mek hu jien. Yaom jien bồn bồn meng 20.000 – 30.000 dong/kg yau nan ye urang pala sahnang hatai ngak nyu. Sang muk Dương Thị Nguyên, daok di palei 14, xa Khánh An daok pablei njam phun bồn bồn tabiak darak pasar yaok harei brei thau lac:

“Tukvak meng blaoh dahlak ngak bonbon ralo, langiu di nan daok pala gah Pur. Yaok harei palei hu meng 15 - 20 kg. Phun bồn bồn ieu lac janih ndap nda hacih sa-at, yaom raba jeng glaong jang ngak hamu. Dahlau diah ngak padai, oh hu yaom dut tui pala bồn bồn”.

Dang di anak bruk pala njam phun bồn bồn hu jeng, taneh ngak mbang di xa Khánh An song xa di tapen tagok drah. Dom HTX hu brei padang piah duah darak pasar ka nyu karo jang.

HTX An Hòa di xa Khánh An hu angan. Tui nai Đặng Yến Như, Yam ndok HTX, urang hop tac xa tuk camreip bahrau hu dom pluh urang pala min tal ini tagok 101 urang daok di palei 13, 14 saong An Phú. Bruk padang HTX peih jalan keih lagaih brei ka bhap bini piah gam gauk pala gam gauk daong ka ndap nda njam patam baoh karaoh tabiak darak pasar.

“HTX daok brei dang dua akaok, pablei yau meng halei mai atau buh akaok ka urang blei nao pablei di labik jeng ye urang mai mek pablei ka jaik taphia. Langiu di nan, HTX jeng ba bồn bồn tagok darak online, piah pablei hu ralo jang, ngak ka ralo urang thau jang tal bồn bồn taneh glai U Minh jeng ye di Ca Mau ndom meyai lac”.

Tui janih mbuan si pala, mbang hu luac thun phun bồn bồn oh lac sa janih duah hu jien tame blaoh daok yau ye sa mbaik gai kandeih brei ka urang di bhum taneh U Minh dhon tapa kan kandah, patagok raidiuk di bhum taneh danao dhaong ia mbak lahun phèn. Bruk ngak mbang HTX jeng daok daong ka ndap nda kaya ngui lagaih jang, daong patagok yaom kom phun bồn bồn dan saong ba ndap nda di U Minh jaik jang darak pasar jaik jang urang pandar dalam nagar./.