Dom bilan jaik puac thun ini, baoh sang sa-ai Ngô Minh Tuấn bahrau mek tame mbang raong hadang suan bilan ngan haong hatai bui sambai kayua lac mek hu rilo hadang gam haong pablei hu yaom. Tapa mbang mek tame ini, mek hu jaik 100 tan hadang rilo ngan haong size từ 26-30 drei sa kg, kein laba hu meng 70-100 ribau ndong sa drei.  

Urak ini sa-ai Tuấn nan lac po 5 farm bhian raong hadang tui jalan ngak kong glaong gam haong taong abih mblang taneh tagok tal 36 ha. Ini ieu lac bruk raong kaya ikan dalam aia prong abih di bhum Taneran kraong Cuu Long, hu padang ngak ilamu ha tang biak siam gheih. Dom danao raong hadang hu vang pacang, pasang iek pacang jit ruak, alam langik tasik... hu jeng labik rivang ma-in, roh duah di dom urang ngak gah kaya ikan dalam aia saong dom urang chreih takre bruk raong hadang dalam saong langiu negar.

Njauk ndom mayai lac, bruk raong hadang tui jalan ngak kong pakat glaong di sa-ai Ngô Minh Tuấn hu buh jien tame ngak biak tani tanat piah ka anek hadang cak rok patagok. Angaok mblang taneh raong, sa-ai caik tabiak jaik 20% piah padang ngak som danao raong hadang, da-ning vin taom dhar hu ngak meng bê tông, ala mbaok danao hu lang ciu mbat, angaok mbaok danao hu pacang njuan halam; 80% mblang taneh daok veik nan lac dom danao xu ly aia akaok tame, daok akaok tabiak mek hu tanut hacih. Kuhria rah tapa, yaok sa ha taneh raong hadang sa-ai buh jien tame ngak meng 1,5 - 2 ty ndong. Mai meng nan, ty le khat lahik biar, hadang mek tame rilo, meng 45 - 50 tan sa ha, glaong jaik dua mbang dut haong dom bruk raong hadang tui jalan ngak meng kan dahlau diah, kein laba mek hu labaih 40%. Tui sa-ai Tuấn, piah raong hadang tui jalan ngak kong pakat glaong mek hu rilo baoh jeng siam mekre ye caong khin hu rilo kadha:

 “Tui dahlak, kadha prong abih nan lac dak padang, pasiam danao raong. Daanao raong njauk hu tabung pacang, hu danao raong hadang post, pasiam veik halau aia ka nyu hacih, pandar mac pluh oxy, kadhik ka nyu grap tanat, pataom mek hareik hareim ka nyu siam. Ka dua nan lac njauk palih ruah drei pajaih ka nyu hacih ruak, khang kadang, njauk pasang iek ka nyu tani tanat yaok harei piah samar drah duah mboh saong xu ly, patrun dom kadha kanjah jak. Abih di nyu lac pasang iek halau aia tame ka nyu tanat, mek hu tanut chuan, hacih sa-at meng bruk xu ly hoa chat, tah klak bimao saong anek vi khuan nan ka meng ba brei tame danao raong”.

Tui So Ngak nong – Moi truong tinh Ndong Thap, dalam tinh urak ini hu labaih 300 ha ia taneh raong hadang tui jalan ngak kong nghe glaong. Bruk ngak ini caong khin hu phun jien prong, pan kajap ilamu raong glang. Ngan haong bruk raong hadang kong nghe glaong di sa-ai Ngô Minh Tuấn daok di xa Tân Phú Đông nan lac “kiểu mẫu” abih, mek hu rilo baoh jeng siam mekre, nan lac “tanut hadah" dalam gah raong kaya ikan dalam aia di puk palei.

Langiu di bruk raong hadang tui jalan ngak kong bahrau, baoh sang sa-ai Ngô Minh Tuấn daok lac po pablei salih pandap mbang, jru cavao brei ka anek ikan hadang dalam aia saong pabak brei drei hadang pajaih ka urang taong ikan di puk palei.

Meng bruk raong hadang tui jalan ngak kong bahrau di sa-ai Ngô Minh Tuấn, hu jaik 200 urang nong karei di tinh Ndong Thap bac megru, pambak prong jalan ngak ini. Sa-ai abih hatai langyah, klah rabha ilamu piah ka taong abih manuac urang gam raong hadang mek hu baoh jeng siam mekre. Yaom lac hu jeng “patao hadang” di palei pulao kaoh, sa-ai Tuấn jeng abih hatung hatai, tuk halei jeng caong khin peih prong bruk ngak ini tui jalan ngak bahrau, samu haong bruk langik tasik salih bahrau, patrun jien phun buh tame ngak, patagok drei hadang mek tame saong chat luong drei hadang.  

Meng urang ngak nong takai juak haluk, sa-ai Tuấn Hiền jeng urang jien ty di taneh pulao kaoh, nan daok ieu lac yau ye baoh kareih camin hadah pasang brei ka bruk ngak mbang pablei salih naih jioy pakat tinh, pakat negar jeng lac urang ngak pahla di puk palei, njuak pok meyaom saong pambak prong./.