Tui kuhia, ban Can Tho urak ini hu labaih 100.000 ha phun mbang baoh, dalam nan hu labaih 60% lac phun hu hambar… Ini lac dom janih kayau phun ba mai yaom kaom jien padai glaong, daong rilo baoh sang urang ngak nong uak drei tagok jeng urang kaya meda. Min, dom thun jaik di ini, bruk pandar pajaih oh siam saong bruk halak haling srau kadau ngak ka rilo bein phun kayau njauk khut khat trak. Oh lac ngak kanyik hala, bluk agha, dauk bluk daok ngak rah tabiak bruk druh baoh meda, ngak kan kandah tal bruk paik baoh. Sa-ai Nguyễn Văn Hùng, po bein daok di xa Hiệp Hưng brei thau: “Dalam bilan hajan ye taneh bhian tasah suai, takik pandiak nan oh thu laneing lanoi hu. Yang ka dua daok lac kayua drei nao mai rilo ngak di mbaok taneh kandaong ralo ia oh tathuak hu. Meyah dalam labik ar pacang drei khik oh siam, ia tagok glaong ngak dauk ngak kan kandah tal agha, kanyik hala.”

Mek hu ilamo meng rilo thun akaok bilan hajan thun ini dom sang bein di bhum dhaong biar hu peih samu dom jalan langyah pacang ia dauk pacang khik bein phun mbang baoh. Sa-ai Nguyễn Văn Khá daok di xa Hòa An brei thau, meteh bilan ini, sa-ai gam ngak kajap ar pacang, gam cakac labang dalam bein phun kayau piah tathuak ia drah samar. Langiu di nan, mac njuk ia tuk caga blaoh, brei ngak tuk halei tuk ia ndik tagok atau hu hajan dui atah. Labaih 20 thun tapa, sa-ai oh ka mboh ia ndik tagok glaong yau meng blaoh. Sa-ai brei paglaong ar pacang tal 3 tuk saong caik mac njuk ia tal 3 mbang jeng ye brei caik mac jamariak njuk ia gam gam meng pacang khik hu bein durian labaih 100 phun.

 “Urak ini dahlak ramik tal 3 baoh jamariak mac piah njuk ia. Yaok harei jien buh tabiak ka njuk ia tal 200 ribau dong. Ngan haong sang bein di xa Hòa An dalam nan di labik huyen Phụng Hiệp dahlau diah ye huac kanda ka ia di harei 15 saka ia bilan jaik mai meng anak tal tagok glaong ye urak ini jeng pakajap piah khik karo.”

Tui Chi cuc Pala drak saong Pacang khik phun kayau (So Ngak nong saong Alam langik ban Can Tho), meng hu peih dom jalan pacang cakak nan bahrau blaoh hu 3.800ha bein phun mbang baoh njauk ia dauk kayua ia ndik, ngak khut khat lahik meng akaok meti oh hu rilo.

 Dang di anak brei thau bruk langik daok rah tabiak srau kadau saong dom mbang ia ndik jaik tal, Gah ngak nong Can Tho pachreih kakei dom sang ngak bein pala phun mbang baoh brei pataok dom phun mbuan jaleih, samar chip paik baoh tathak. Gam haong nan, rivang bein phun bhian piah dil samu pacang caga ia ndik, hajan praong dui atah ngak ia dauk. Ngan haong bein phun daok dauk dalam ia tuk calah ar pacang kayua hajan praong dui atah, mikva brei luai ka ia nduac dalam ribaong bein tal tanut biar di abih, patakik abih bruk nao mai dalam bein phun piah plaih ngak megei takai phun ngak kan kandah tal agha tuk ia ndik ia dauk…