Tangin gam daok mbeik raok van piah brei salih ia ka 5 boh danao daok raok lanung, ong Trần Văn Chi brei thau lac, labaih 17.000 anek lanung ini brei raong piah pablei tabiak darak tuk raya Tet Nguyen dan. Ong kuhria mayah lagaih hu, sang danaok mada mek hu 6 tan ralo lanung, duah raba hu meng 200-250 trieu dong hadei tuh jien buh ngak.

“Dut tui raong janih anek karei lanung mada brei kein raba glaong jang. Pagap ye drei buh 100 trieu dong tame ngak, mayah darak pasar pablei labaih 100 ngan dong/kg drei mada duah hu do jien buh tame labaih 100 trieu, min mayah tui yaom meng 80 tal 90 ribau dong/kg ye drei jeng duah hu labaih 70 trieu dong hadei di bayar abih jien buh tame dahlau 100 trieu dong.”

Tukik urang sahaneng lac, urang lakei tapak tape ini dahlau ieu lac urang bol lin masuh matak di mblang masuh K jeng ye ieu lac sa urang bol lin jaoh jo trak 3/4, njauk tabiak bol lin gilac mai palei brei nao mai oh daok mbuan yau dahlau. Thun 2022, hu sa mbang nao rivang iek bruk raong lanung meng danao ia xi mang di sa urang ayut sahabat, ong Chi mboh bruk raong glang ini lagaih saong rup bhap di drei blaoh jeng mai ngak tui.

 Hadei di nan, ong Chi tame masraiy jieng di Gilang jieng Sarak karja rahra, gam tui phun jien brei masraiy di Kapul Bol lin meng kal palei piah ngak mbang. Camareip abih, ong Chi raong 5.000 anek lanung di dalam 2 baoh danao xi mang. Hadei di 9 bilan iek glang, ong duah hu jaik 50 trieu dong... Tal ini sang ong hu 8 baoh danao xi mang raong lanung oh cang hu gluh, yaok baoh danao praong 6m2, palao raong meng 3-4 ribau anek lanung pajaih. Pandar ia hacih brei bhian salih piah ka lanung praong lagaih karo. Ong Chi khan lac:

“Iek glang oh hagait kan, min tapi raong lanung njauk tui ilamu di nyu, yau ye salih ia, tuk 5 page drei salih ia sa mbang, tal tuk 6 ye drei brei mbang, tuk 9 drei brei salih ia mbang ka 2. Biar harei jeng yau nan, tuk 3 drei brei salih ia, tal tuk 4 drei brei ka lanung mbang, tuk 7 brei salih ia sa mbang tra. Harei hlei jeng yau nan.”

Piah sahnang brei iek glang jeng ye pablei salih tabiak darak pasar, ong Chi daok brei neh rabha ralo mbang dalam thun. Gam hu lanung pablei bhian harei gam daong oh cuang dalam bruk ngak mbang blei salih. Kayua hu siam lagaih dalam bruk ngak ini, jien mek tame brei ka sang danaok ong mboh karo kajap luac thun. Labai mateh thun ini mai, ong mek hu labaih 6 tan ralo anek lanung, duah hu labaih 250 trieu dong. Khan yah brei ka bruk raong lanung di ong Chi, ong Ngô Chao Nguyên, Phaok akaok Kapul urang bol lin dahlau di xa Tân Long, khan brei thau lac:

“Dong chi Chi ieu lac sa urang kham marat roh duah, bac magru ngak mbang, tui rayo tui papar sap papar binguk, ong Chi duah hu kadrei bruk raong anek lanung jak jeng ba mai hu yaom kom glaong. Yaok thun mai meng bruk raong lanung, ong Chi bayar abih jien buh tame ngak ong daok mek hu raba labaih 300 trieu dong. Tui di nan dak tuk pok glaong rai diuk di drei. Tukvak  meng anak, Urang dalam Ban chap hanh Kapul urang bol lin dahlau di xa Tân Long mada peih praong bruk ngak jeng di urang yam tapa kan kandah ngak kaya mada yau ye bruk ngak mbang di ong Chi brei ka urang dalam kapul urang bol lin dahlau.”

Meng sa urang lin joh jro, ong Trần Văn Chi yam tapa kan kandah piah ngak kaya mada, jeng sa baoh kreih camin hadah brei ka ralo urang pasang magru. Bruk raong lanung dalam danao ia xi mang di ong oh sa janih peih jalan bahrau brei ka bruk ngak mbang blaoh nyu daok pachreih akaok urang khin sahaneng khin ngak di urang bol lin jaoh jo urang bol lin Wa Ho.