Drei brei cih tabiak jalan pala njam cambaih laih di bein taneh di drei, ramik caga dom bruk njauk hu yau ye taneh, khak drak huu co, asar pajaih, saong janih kaya ngak bein njam. Drei meda caga hop xop atau kalaok katak… patui yaok kein lagaih jien padai di drei.

Piah pabak hatai caong dom janih njam tuk halei jeng hu salih karei piah lagaih ka katai takre di yaok urang dalam sang, drei brei ngak tantu ka dom janih njam halei drei khin pala. Meyah bahrau ngak bein njam, drei brei ruah njam mbuan si pala mbuan si iek glang.

Ngak taneh lac bruk hu makna abih tuk drei pala njam hijao di sang. Meyah taneh siam, bein njam di drei hu brei cakrok siam. Meyah drei daok pandar taneh thu, takik siam, dahlau di tuk trun pajaih, drei meda pasiam taneh meng bruk srau khak huu co atau dang gluh piah njam pala hu asar siam abih ka bruk cakrok patagok.

Bruk caga asar pajaih jeng ieu lac bruk njauk caik hatai piah brei ka samu bruk tabiak njam saong baoh. Dahlau di tuk trun asar pajaih, drei brei bambu asar dalam pandiak gap mbiah 1 pandiak piah pametai takai ruak di phun.

Drei meda tram asar pajaih tui jalan 2 ia pandiak, 3 ia la-an dalam tukvak masa labaih 7 tuk, hadei di nan thraong asar pajaih tagok brei pabam pa-auk tame meng pasen khan bai atau bi-ar. Bhian di nyu, tukvak masa brei pabam pa-auk lahik labaih 1 harei lac asar calah, blaoh thro agha. Tuk ini, drei meda trun pajaih, oh luai ka agha atah tuk trun pajaih mbuan klaih agha.

Hadei di tuk trun pajaih, pa-auk pabam sa tal kam atau tal taneh lapih tagok piah plaih bruk tathuak ia piah phun tabiak agha saong patagok samar drah jang. Hadei 3 harei, drei meda tuh ia yaok harei ka phun.

Tui dom janih phun karei, meda oh njauk brei trun pajaih blaoh pala meng dhan atau phun hu dahlau. Pagap yau phun can tay, lasun hala, njam puon, hala caluak, ngai cuu …

Njam ngot ye drei mek dhan taha cakak abih hala, klauk trun taneh, kham merat khik ka taneh tasah gam, drak hasit NPK piah phun kayau tamuh tagok, tabiak agha samar drah.

Njam puon drei blei mai mbang, tuk pandar brei caik banah agha labaih 5 cm hadei di nan laih abih hala blaoh klauk trun taneh, tuh ia biak rilo labaih 1 adit njam brei tamuh saong tabiak hala. Dom mbang hadei tuk mbang njam ye cakak jaik tal takai agha, njam brei tamuh veik piah mbang daok hu mbang gam. Hala caluak jeng hu pala meng dhan, drei tok brei klauk trun taneh lac nyu ta-eng tamuh saong cakrok siam…

Piah ngak jak jeng bein njam hacih sa-at ka njauk, drei meda pandar khak huu co ta-eng pa-auk meng kaya mbang dalah labaih, gar njam atau hala phun hu pa-auk ka brei. Drei pandar thung pati meng xop praong hu tuk gam, padang kaya mbang dalah labaih yau ye ia bai, njam, talang ikan, talang menuk ada, kanduh baoh menuk ada,… taong abih tuh tame thun hadei nan lam sa tal taneh tagok.

Drei brei caik hatai pasang duah buac hareik bhian piah khik kajap beik phun hacih sa-at saong khan kajap, kayua hareik meblah mbang asar siam di njam ngak ka njam oh cakrok siam, mbuan njauk halak haling.

Asal kadha halak haling saong anek rih ngak khat lahik, drei meda lai jru pametai halak meng baoh lasun putih, amraik, laya saong alak piah ngak ja lai haong ia pruh tame njam./.