Mai meng bruk raong mek hu baoh jeng siam mekre mai meng bruk raong anek meja prong jaik 100 drei, ong Nguyễn Văn Tám, umo 55 thun daok di xa My Thuan, tinh Vinh Long mek tame jien laba labaih 200 triệu ndong/thun, yam tapa truh kathaot.  

Dahlau di tuk peih ngak bruk raong anek meja, rai diuk di sang ong biak kan kandah, thun 2020, jalan ngak mbang bahrau di rai diuk ong Tám mai meng sa mbang ndom biai nao mai haong urang adei dalam talei but pajaih. Ong Tám kanal hadar dar lac: "Mboh dahlak kathaot rambah yau nan ye nyu hu ginum biai haong dahlak ka brei tal bruk raong anek meja, ba nao mong iek bac megru dom urang raong blaoh di gah Pur. Akaok mereip, dahlak jeng mboh bruk ngak ini daok biak bahrau, anek nethur hagait lac yaok pluh triệu jien ndong sa drei. Hadei di tuk duah thau, mboh hu baoh jeng siam mekre cambaih laih, dahlak marat ba hatai mesre phun jien di Karja gam tui pok 50 triệu ndong piah peih bruk ngak mbang".

Dalam bein raong anek nethur meja prong labaih 4 ribau met vuong ong Tám pala patei Siem, gam ngak brei pandap mbang ka anek meja gam khik ala halui mat laan brei ka tapul anek nethur. Van ro hu padang ngak biak siam mekre, parabha jeng yaok labik brei ka yaok vaktu masa praong tagok di nyu, piah ka nyu tuk metian, tuk nyu menek, tuk jeng ralo pablei. Di ala ro raong meja hu danao raong ikan, gam pandar hu mblang taneh pak di ala ka nyu aih maik, gam ngak brei patrun neriak tachuak.

Ong Tám brei thau yau lac: "Mbang akaok meti, dahlak ba hatai blei 3 drei meja ine. Raong hu labaih 10 bilan, dahlak palih ruah tabiak drei ine siam piah ngak pajaih, drei halei oh siam ye pablei ngak ralo. Ngak yau nan, tapul anek meja dak harei dak tagok ralo jang. Bahrau meng blaoh, dahlak buh tabiak 100 triệu ndong piah padang ngak 65 baoh ro bahrau, taong abih tapul anek daok brei raong labaih jaik 100 drei".

Meja ine pajaih hu yaom jien meng 4 triệu tal labaih 30 triệu ndong/drei (yaom tui umo praong sit di nyu jeng ye drei tano atau binai). Methuh ralo tak jang labaih 2 kg/drei hu yaom jaik 1,3 triệu ndong/kg. Akaok pablei tabiak urak ini mboh tani tanat mai meng pambuak bruk haong dom labik caong khin blei tame pandar. Mai meng nan, ong Tám mek hu jien jhung grap tanat yaok thun labaih 200 triệu ndong.

Piah ka anek meja tuk halei jeng khang kadang, ong Tám daok iek prong tal bruk brei mbang ka nyu ginup asal saong pacang caga ruak kik di anethur. Anek meja mbang hu sa van/harei dalam van biar harei, pandap mbang hu gam ikan, kiuk, arieng hamu, patei, panat, tabau… Ikan hu ong palaal piah mbang hu suai lavik, tuk brei mbang meng mek tabiak, srau gam haong jru siam ka tung pruac piah ngak brei ka anek meja nyu mbang bingi jang saong njaom mek asal dalam pandap mbang hu siam jang. Yaom jien buh tabiak blei ndap kaya mbang kuhria hu jaik 3.000 đồng/drei/harei. Yaok 6 bilan, ong Tám brei klauk sa mbang jru pacang caga ruak, piah khik ka tapul anek meja hu khang kadang jang.

Ong Tám daok oh padeih bac megru di dom urang peih raong dahlau, tari tareng mong iek jeng ye oh pandiak hatai ngak brei ka hu. Kayua lac janih anek nethur glai yau nan ye urang raong nyu njauk hu masa caik hatai tui glang.

Ong Nguyễn Thanh Vũ, Akaok Kapul nyaom Urang dahlau diah ngak bol lin daok di xa My Thuan, brei thau bruk raong anek anek meja di ong Tám oh lac hu sa janih daong ka sang ong tapa truh eik thaot blaoh nyu daok pambak prong hatai yam tapa kan kandah, ngak kaya meda meng dua palak tangin di drei tal rilo rilo baoh sang urang ngak nong karei karei. Bruk raong anek anek meja di ong Tám hu rilo urang duah mai mong iek, bac megru ilamu raong glang, blei anek pajaih ba nao sang brei raong glang. Daok gah jabat karja jeng palaghaih ka mikva yau pabak harak ba-ar brei adat peih ngak bruk raong glang, daong brei mesre jien phun ngak mbang./.