Thun 2022, Nguyễn Thanh Đức daok di xa Sông Lũy, tinh Lam Dong, tame bruk raong katit pambuak haong raong ciim vak mek ralo. Sa-ai Đức brei thau lac, patagok bruk ini piah pandar kein lagaih taneh riya di baoh sang, thau ka hatai caong di darak pasar saong daong salihphun pala, athur raong ba mai rilo, siam lagaih glaong…

Sa-ai Đức peih mbang ngui meng bruk raong katit, tukvak akaok meti kayua oh ka hu ilamo nan daok gaok rilo kan kandah. Hadei tuk duah thau ilamo sa-ai hu khang hatai buh jien tame ka ndap nda kaya, ilamo ky thuat, roh duah piah raong saong parilo pajaih.

Jien buh tabiak meng akaok meti ka yaok var ro katit (2m vuong sa var ro) saong labaih 300.000 dong jien ndap nda kaya piah ngak var ro, baoh katit piah karam dalam sa var ro, hadei labaih 35 harei sangka meda hu pablei tabiak. Katit raong hacih sa-at, takik ruak. Piah katit cakrok siam, var ro katit brei thu lagu, laneing lanoi… Sa-ai Nguyễn Thanh Đức brei thau:

"Hadei di tuk jit ruak Covid-19 adei mai sang oh daok tame Sai Gon, hu var ro katit di sang hu raong meng dahlau blaoh, adei buh jien tame peih praong var ro piah raong ciim vak, pandar khak ciim vak piah drak ka njam, blaoh nan ngak kaya mbang ka katit saong ciim vak."

Tuk bruk raong katit brei kein lagaih, sa-ai Đức hu buh jien tame ka var ro piah raong ciim vak. Sa-ai Đức brei thau, raong ciim vak brei khik kajap var ro biak hacih sa-at, labik raong brei ka nyu hu laneing lanoi, oh tathah piah plaih jit ruak. Bruk brei ka ciim mbang bhian saong njauk tukvak, meyah oh ye ngak kanjah jhak tal tukvak mabaoh. Meng tuk menek tabiak tal tuk mabaoh tok meng 50 harei saong tukvak brei brei baoh tok labaih 7 – 8 bilan lac salih kapul bahrau.  Salih ka haleik ngak kong, sa-ai pandar anek katit saong pambuak pala njam hijao piah ngak kaya mbang ka ciim. Ciim vak mek ralo di sa-ai pablei tabiak darak pasar hu yaom 12.000 dong sa drei glaong jang dut haong ciim vak raong ngak kong hu ruom 8.000 dong sa drei.

"Piah raong ciim vak jeng hu, ye drei raong palao, pambuak dom janih kaya mbang hijao yau: njam patam, baoh karaoh… piah ka nyu pahe bangi ka ralo; blaoh pabak veik kaya mbang meng anek rih halak haling bo di sang hu anek katit dahlau paje, brei mbang veik piah patagok bruk pahe bangi ka ralo. Ngak ka ralo ciim vak di ini karei haong ciim vak raong dalam var ro tui jalan ngak kong bhap bini meng dahlau mai."

Sa-ai Nguyễn Mạnh Tường Huy, Bi thu Kapul Dam dara xa Sông Lũy, tinh Lam Dong brei thau, langiu bruk pachreih dam dara patagok, peih praong bruk raong ciim vak, tukvak anak tal, bhum palei brei patui veik ba dom bruk ngak mbang bahrau, lagaih haong dam dara doan vien, saong mikva urang ngak nong piah daong patagok kinh te baoh sang.

"Ini lac bruk ngak bahrau saong bruk pandar jeng yau raong glang sangka biak tani tanat. Ini lac bruk akaok meti, meyah hu dalam dom tukvak mai meng anak tal brei jak ba jeng yau peih praong bruk ini daong ka dom ayut cuai dalam kapul, dam dara hu sa jalan sahaneng piah ba gauk peih mbang ngui saong uak drei tagok ngak kaya meda."

Bruk raong katit pambuak haong raong ciim vak biak mbuan si ngak, gilac oh khin hu rilo phun jien, lagaih saong dom dam dara bhum palei pala. Sa-ai Nguyễn Thanh Đức daok di xa Sông Lũy, tinh Lam Dong tuk halei jeng srap gap hatai tacei ba ilamo jeng yau pabak pajaih ka thei khin peih mbang ngui haong bruk raong glang biak “karei” ini./.