Di gah Pei negar, baoh danin lac ndap nda palei pala hu rilo urang takre, hu rahra bhum palei pandar, blaoh pala di taneh hamu, padang angan je ndap nda OCOP ba mai jien mek tame lagaih jang dut haong pala padai.

Di xa Châu Thới, tinh Ca Mau phun danin jeng phun patruh eik patrun kathaot, tuk yaok pluh baoh sang rahra meda tagok meng tuk salih meng taneh pala padai oh lagaih tapa pala danin. Baoh sang sa-ai Lâm Thị Mai, (daok di ap Mỹ Phú Đông) dahlau diah pala padai min oh lagaih kayua taneh dhaong, njom lakhun. Mboh bruk pala baoh danin ba mai ralo siam lagaih glaong, amuk Mai khang hatai pasiam 2.000 m² taneh hamu piah pala năn bộp. Hadei di jaik 2 bilan pala saong sangka, baoh danin brei paik taduk yaok harei.

Amuk Mai brei thau, baoh danin biak mbuan pala, takik palai prein sangka, brei jien mek tame luac thun. Meng nan, baoh sang patui veik peih praong veik 3.000 m². Urak ini, hu 5.000 m² taneh pala baoh bei danin, harei halei baoh sang amuk Mai jeng hu năn bộp piah pablei haong yaom meng 10.000  - 12.000 dong/kg, daok pablei lẻ ka urang pandar di bhum palei 15.000 dong/kg. Tui amuk Mai, kuhria mboh 5.000 m² taneh pala baoh danin, sa thun brei jien mek tame 100 trieu dong, rilo jang dut haong pala padai.

Piah khik kajap bruk pala saong asar siam ka baoh danin, labaih 8 – 9 bilan lac urang ngak nong brei buac klak piah pala veik baoh danin bahrau. Min, piah hu jien mek tame luac thun, urang ngak nong brei pataom tame sa tukvak bo pala rabha tabiak rilo tukvak karei gauk. Kuhria rah tapa 1.000 m² taneh pala baoh danin, langiu di dom jien buh tame ngak, kein laba blaoh urang ngak nong mek hu labaih 20 trieu dong.

Ong Tô Thanh Hải, Phaok Akaok UB Bhap bini xa Châu Thới (tinh Ca Mau) brei thau: meng akaok camreip, meng dom baoh sang ba drei tame pala, tal ini hu patagok labaih 50 baoh sang pala baoh danin. Rilo taneh dhaong biar, pala oh lagaih, urang ngak nong brei pasiam taneh blaoh salih tapa pala baoh danin. langiu di pablei di labik, urang ikak kaiy pataom blei blaoh pablei nao di langiu tinh atau dalam dom majam tadai kuan, dom darak sieu thi. Meng nan bo akaok pablei tabiak di năn bộp tukvak tapa bial tani tanat.

Piah bruk pala baoh danin hu khik tani tanat saong patagok, thun 2023, UB Bhap bini xa Châu Thới pambuak haong Lien minh Hop tac xa tinh Bac Lieu (urak ini lac Ca Mau) padang hop tac xa A Trung Đông dalam nan hu 50 urang, ngan haong bruk pala, pablei salih ndap nda baoh danin.

Hadei di tuk padang, hop tac xa pambuak gah ngak nong daong tacei ba, pato pasram ky thuat pala baoh danin salamat, daong padang bhum pala năn bộp salamat pagam haong khik alam langik, kayua prein yava di urang pala saong urang blei pandar. Gam haong nan, padang pataom blei baoh danin pandap tamo ka urang dalam kapul saong baoh sang urang ngak nong dalam bhum piah ngak ndap nda, papaok pabak ka darak pasar… Dalam nan hu mbaok tame Danak dak “Yaok xa sa ndap nda” di bhum palei, hop tac xa A Trung Đông hu padang baoh danin jeng ndap nda OCOP 3 patuk. Meng nan bo ndap nda dak harei dak hu pablei rilo , urang ngak nong khik kajap jien mek tame.

Meng sa janih hareik tamuh, phun baoh danin urak ini jeng sa janih ndap nda daong brei urang ngak nong daok di xa Châu Thới hu jien mek tame lagaih laguo brei ka dalam sang, raidiuk mikva dak harei dak tani tanat. Rilo baoh sanghu jien mek tame labaih 100 trieu dong/ha/thun, uak drei tagok ngak meda, daong gam haong karja palei ngak jak jeng salih bruk pala.

 Siam lagaih kinh te brei ka phun baoh danin ba mai ka rilo urang ngak nong daok di xa Châu Thới biak cambaih laih, khik kajap jien mek tame tani tanat ka dom baoh sang. Gam haong di nan brei mboh bruk salih jalan pala brei ba mai jak jeng meyah thau palih ruah phun pala, athur raong njauk haong kein lagaih di bhum palei./.