Tukvak tame jit ruak COVID – 19 blaoh, oh meda nao ngak hagait hu, diu pasang di sa-ai Đặng Thị Thu Phượng (xa Tân Hòa, Ban raya Can Tho) hu bac megru bruk raong lanung oh meng gluh di angaok dom rayak papar sap papar binguk.

Thun 2023, gam haong bruk daong meng bhum palei, baoh sang di sa-ai peih bruk raong lanung 10 baoh danao. Sa-ai Phương brei thau: “Raong lanung oh meng gluh biak mbuan, min bruk brei mbang saong salih ia brei ka njauk tuk njauk vak. Harei halei jeng yau nan, baoh sang brei ka lanung mbang 2 mbang saong salih ia 3 mbang. Meyah oh khik kajap, nyu mada brei ngak kan kandah tal ia saong bruk patagok prein praong di anek lanung”.

Pandar bruk raong payeng tui rai lanung, nan kuhria rah tapa tal yaok labaih 1 bilan, sa-ai Phượng brei thraong mek 1 mbang (labaih 10.000 drei). Urak ini, kuhria rah tapa baoh sang sa-ai thraong mek lanung saong pablei tabiak labaih 6 mbang/thun, kein laba kuhria labaih 400 trieu dong.

Hadei di bruk pablei salih siam lagaih, lanung hu rilo jang, sa-ai Phượng hu brei rok 6 baoh danao piah peih praong bruk ngak mbang. Kuhria dahlau di dalam thun ini, baoh sang di sang sa-ai mada pablei labaih 10 tan lanung.

Lac sa dalam dom urang ngak nong ba dri ngak dahlau bruk raong lanung oh meng gluh di xa, ong Trần Trung Tri – Akaok kapul pambuak bruk (THT) raong lanung Chiến Thắng (xa Tân Hòa, Ban raya Can Tho) brei thau, gam tui di ini, bruk salih ia saong brei mbang ieu lac bruk njauk caik hatai di abih. Halau ia brei pahacih sa-at, dom pandap mbang di nyu njauk khik hu ginup, parilo tagok jang tui harei praong di nyu tapa yaok bilan.

Ong Tri lac: “Kapul pambuak bruk padang meng thun 2023 saong urak ini hu 11 urang, Kuhria rah tapa dom drei lanung di dom urang hu meng 20.000 – 80.000 drei, tui yaok thun. Yaok thun, lanung pablei hu 1 mbang kayua tukvak raong lanung oh meng gluh biak mbuan saong blei ndap nda hacih sa-at”.

Ong Tri mboh, bruk raong lanung ba mai siam lagaih bruk ngak mbang blei salih biak siam. Kuhria meng tuk akaok meti tal ini, yaom lanung pablei biar abih di di nyu hu 70.000 dong/kg. Gam tui yaom ini, baoh sang raong jeng hu kein laba rilo. Kayua jien buh tame brei ka anek pajaih, kaya mbang, halau ia,… labaih kurang 40.000 dong/kg.

Ong Nguyễn Văn Vũ – Yam ndok Bilik meyao meyit Gilang pariak sarak rahra Châu Thành A, Ban raya Can Tho taong yaom, bruk raong lanung oh gluh ba mai siam lagaih. Hu mboh lac tuai damuai mesraiy phun jien saong Kapul pambuak bruk peih praong dut haong dahlau daih. Urak ini jien tavak sraiy di gilang pariak oh glaong saong abih di nyu nan lac oh hu jien tavak srraiy jhak. Langiu di raong lanung oh gluh, gilang pariak brei patui pambuak haong karja palei piah peih praong dom bruk siam lagaih tapa bruk patagok khau tin, pathau khan, daong phun jien. Meng nan, daong rahra hu mesraiy phun jien saong ilamo khoa hoc ky thuat.

Tui ong Nguyễn Vĩnh Thọ - Akaok Kapul urang ngak nong xa Tân Hòa, di labik xa hu labaih 35 baoh sang raong lanung oh gluh hu labaih 500.000 drei. Bruk ini hu patagok hu 5 thun haong kein lagaih pasang iek hu pandap mbang, halau ia saong pasang iek jit ruak. Lanung raong oh gluh di xa rilo meng lac hu pablei tapa urang ikak kaiy haong bruk pablei tabiak tani tanat. Abih di nyu nan lac, taphia haong xa hu kong ti ngak ndap nda kaya dalam ia saong jeng gam blei lanung.

Dalam tukvak mai meng anak, kapul urang ngak Nong brei pasang iek, brei kein lagaih ka dom baoh sang raong lanung tui jalan rivang me-in, bac tangi sua dom bruk raong bahrau. Gam tui di nan, pambuak haong gilang pariak piah hu tacei ba, daong mesraiy phun jien ka dom baoh sang urang ngak nong patagok bruk ngak, daong tame bruk parilo jien mek tame ka rahra bhap bini di bhum palei./.