Dahlau diah, rahra phuong thới An (urak ini jeng angan phuong Ô Môn, Ban Can Tho) rilo meng lac ruah baoh kayau hu hambar piah patagok kinh te. Min, langik oh lagaih, halak haling rilo saong yaom kaom oh lagaih ngak ka bruk ini oh siam lagaih. Rilo baoh sang rahra brei salih tapa pala njam patam, dalam nan hu ong Nguyễn Văn Bi (angan bhian ieu lac Tám Bi, ndih tapui thun 1960, labik Thới Hòa).

 Ong Tám Bi brei thau, dom harei akaok meti, bruk pala njam biak kan kandah, gaok mai njam lap, urang pala khat lahik trak kayua oh blei dom njap hu pandar janih ia jru hoa chat. Dalam tuk rilo urang klak bruk, ong Tám Bi jeng kham merat khik bruk, ta-eng drei roh duah bac megru ilamo ky thuat saong roh duah dom jalan pala piah ngak tabiak njam hijao.

Thun 2005, meng 5 kong tanah, ong Tám Bi buh jien tame pala njam rapun meng khak huu co, patakik rilo abih jru pacang khik njam patam hoa hoc. Bruk naih gheih abih dalam bruk ini lac bruk pandar ilamo ngak kong bahrau tame bruk ngak mbang.

Ong Tám Bi hu pagam majam ta-eng pruh ia pandar meng phone jak hadah krah, daong kali kalih ia, patakik urang ngak bruk saong paglaong asar siam kaya nong. Dalam nan lac, majam jalan pasei pajeng ba njam meng bein tal labik pataom kayua ong ngak tabiak hu daong ka bruk paik njam saong jao ndap nda hu rah tabiak samar drah, siam lagaih.

Jalan ngak tabiak di labik di ong Tám Bi hu ngak kandauk meng bruk pala, raong njam, paik njam, ngak hacih tal bruk papaok. Gam tui jalan pala “talauk cieu” (pala yaok harei, paik hadei di nan 18 harei), ong hu jien mek tame tani tanat. Ong brei thau, njam hu ta-eng pruh dua mbang yaok harei, tok drak khak huu co saong oh pandar jru taong halak, meng nan njam phun tuk halei jeng hacih saong sron mbon.

Bilan 7.2010, kapul pambuak bruk pala njam rapun di ong hu pakajap jeng Hop tac xa njam sron mbon Hòa Phát, gam 10 urang saong taneh pala 5ha, pabak tabiak darak pasar meng 4-5 tan njam rapun hacih yaok harei. Meng bruk ba drei ngak dahlau saong siam lagaih di bruk ini, rilo baoh sang rahra di bhum palei hu bac tui. Tal ini, dalam labik Thới Hòa hu labaih 70 baoh sang pala njam rapun di taneh labaih 180 kong, ngak tabiak tui tanut VietGAP, pabak labaih 18 tan njam rapun tabiak darak pasar yaok harei.

Mai meng bruk pala njam rapun, ong Tám Bi mek laba labaih 350 trieu dong/thun. Luac 15 thun tapa, HTX di ong khik patagok tani tanat, brei bruk ngak ka labaih 7-10 urang ngak bruk hu jien mek tame 250.000 dong/urang /harei. Taong abih, labik Thới Hào brei bruk ngak ka jaik 200 urang ngak bruk di labik.

Oh lac sa urang ngak nong – ngak mbang pablei salih joi, ong Tám Bi daok lac urang hu hatai brei ka bhap bini. Ong Tam Bi tuk halei jeng thau hatai daong rahra daok kan daman, saong abih di nyu nan ieu lac kham merat jak ba rahra, gah ngak mbang pablei salih gam daong pasiam, pakajap jalan mbak saong padang tatua. Jaik bahrau ini abih, ong hu ieu da-a jak ba rik daong jien piah tuh betong labaih 10km jalan mbak di palei pala saong padang klau baoh tatua Hy Vọng gam taong abih jien labaih 200 trieu dong.

Gam tui dom rik daong naih gheih, ong Tám Bi rilo thun gam hu brei pok angan lac urang ngak nong ngak mbang – pablei salih naih joi pakat ban. Thun 2022, ong hu pok meyaom lac “Urang ngak nong Viet Nam naih joi” di ban praong Can Tho./.