Ong Châu Minh Lâu – urang pagam sa raidiuk haong bhum taneh cuah palei Cuah Patih, xa Ninh Phuoc brei thau: Dahlau diah pala habei bhong tui jalan klak, akaok habei sit, ngak hu takik, gaok thun pandiak bhang yau ye lahik abih. Min, meng harei hu pajaih habei Từ Tâm brei pasiam pamadeih, abih bruk hu karei. Hadei di sa bilan trun pajaih, dom taneh habei hu brei mboh bruk siam lagaih. Phun brei cakrok samu gauk, phun khang, hala cakrok siam di angaok taneh tablak cuah.

Bhum taneh tablak cuah ini bhian kurang ia tuh nan pandar ia nduac dalam taneh, mikva kuac danao, ngak majam tuh ia meng raok brei tanjaoh ia piah patakik ia, gam khik hu pajaih banrik, gam ngak tabiak rilo brei ka rilo baoh sang karei pala. Hu ia, hu pajaih siam, rahra sahnang hatai ngak mbang jang. Ong Kiều Ngọc Quốc brei thau: " Vien Nha Ho ba pajaih beri bhong meng Từ Tâm mai pala ngak pajaih ka mikva palei Patih - Thành Tín. Mikva pagam mac jamraih pruh ia ka phun bei tamuh siam."

Tien si Phan Công Kiên, Phaok akaok Jabat Roh duah Bagu saong patagok gah Ngak nong Nha Hố, tinh Khanh Hoa brei thau, ba habei bhong ka bruk pala di bhum taneh ini mboh biak lagaih, kayua ini lac bhum kan kandah ka halau ia yau nan ye pandar ilamo ngak kong tuh ia kali kalih ngan haong phun habei lac biak khin hu, ngak yau habar pasamu hu halau ia, daong tani tanat hu phun habei cak rok, patagok ka habei saong asar siam hadei ini.

Tui Tien si Phan Công Kiên, Phaok akaok Jabat Roh duah Bangu saong Patagok gah Ngak nong Nha Hố, hadei di tuk pasiam, palih ruah jak jeng, Jabat hu khik piah saong patagok pajaih di angaok taneh labaih 150m². Tal bilan Dong Xuan 2025–2026, pajaih habei Từ Tâm hadei pasiam hu pabak ka rahra palei Cuah Patih pala di angaok taneh labaih 1ha.

‘’ Tui jalan pamedeih dom bruk siam di habei bhong Từ Tâm, hadei di nan padang bhum pandap tamo piah patagok bruk pala phun habei bhong Từ Tâm tui majam yaom kaom saong paglaong raidiuk ka urang ngak nong urang bangsa Cam di bhum ini. Piah daong ka habei bhong Từ Tâm patagok di bhuk praong, meda patagok jeng ndap nda kaya saong patagok veik majam yaom kaom”.

Bruk pasiam jak jeng pajaih habei bhong Từ Tâm nyu yau ye daok ndih dang, oh lac kadha di sa pajaih phun pala hu pahadiuk, blaoh nyu daok lac bruk kham merat khik sa banah inem krung ngak nong di bhum taneh pandiak angin Khanh Hoa – labik akaok habei bhong raong hadiuk rilo rai rah menuac urang, saong tal ini jeng peih tabiak caong takre ka bruk daok dang mbang ngui bahrau ka urang ngak nong bhum taneh cuah./.