Thun 2005, tuk bahrau ba tangin tame raong glang, siam lagaih dalam bruk ngak mbang kinh te meng tapol var pabe oh ka glaong, rilo meng lac mek prein ngak laba, min meng hu kham merat pagam patak pataom ilamo tapa yaok mbang raong glang, nan tapol pabe di sang ong Nguyễn Văn Bò dak harei dak tagok, ba mai jien mek tame gap mbiah bhian. Yaok thun, patui kein lagaih di langik saong yaom kaom darak pasar, baoh sang meda hu mek tame dom pluh trieu dong tal labaih 100 trieu dong. Ong Nguyễn Văn Bò brei thau:

“Sa thun jeng duah hu tijuh, dalipan pluh trieu, biar di nyu jeng hu klau, pak pluh trieu jien, blaoh hu thun pablei hu yaok rituh thun jeng hu. Hu yau nan jeng uan, jien brah, blaoh jien ndien, ia, ndam, mbang menyum dalam sang jeng hu lagaih.”

Khan veik ka bruk, amuk Quách Thị Phơi, diuk di ong Bò, brei thau lac raong pabe oh lahik prein rilo jang dut saong raong pabui. Pabe mbuan si mbang, meda palao hu tabiak langiu, oh lahik rilo prein raong saong jien brei kaya mbang oh glaong. Dalam bilan thu, hareik tamuh rilo, tok tal bilan hajan ka meng nao yuak hareik saong pabak kaya mbang. Duah thun jaik ini, yaom pabe tagok glaong hu daong kinh te baoh sang pasiam rilo, dom paok jien buh tabiak pandar yaok harei.

 Urak ini ong Nguyễn Văn Bò jao rilo bruk raong glang ka anek likei, gam haong nan caong khin hu pandar phun jien laba piah peih praong bruk. Ong Bò brei thau, mikva khin brei tok brei mesraiy labaih 30 – 50 trieu dong piah buh jien tame padang var ro karo kajap jang, blei pabak pabe pajaih saong caga jamraik chai tangei, tapol pabe brei patagok karo kajap, kayua yaok drei pabe patagok karo kajap, kayua yaok drei pabe amaik meda hu dua mbang menek anek yaok thun. Meyah rahra hu tacei ba ilamu raong glang tani tanat saong pandar jien mesraiy lagaih, raong pabe meda jeng sa bruk ngak mbang karo kajap ka mikva.

Tui amuk Nguyễn Trúc Ly, Bi thu Chi mbo palei Vĩnh Hiệp, xa Hòa Bình, lac bruk raong pabe di baoh sang ong Nguyễn Văn Bò ieu lac bruk naih gheih ka bruk patruh kathaot karo kajap di palei. Var ro hu padang khang kajap, paben sang hacih sa-at; kaya mbang rilo meng lac hareik nao yuak di langiu, biak takik buh haleik pabak nan jien buh tabiak jeng takik, siam lagaih tani tanat tuk langik salih karei.

Ong Trần Nghiệp Em, Kapul Urang ngak nong daok di xa Hòa Bình brei thau, dalam xa urak ini hu labaih 2.000 urang ngak nong daok dalam 31 dhan kapul. Hadei di pagam dom labik karja, rilo bruk ngak mbang kinh te siam lagaih hu pasiam saong pamaong tal bruk peih praong, dalam nan hu raong pabe, raong lanung, raong tapai, pala amraik, pala li-u.

Tukvak mai meng anak daok tal, Kapul Urang ngak nong xa brei peih phun jien brei mesraiy meng Kadung jien Daong urang ngak nong, gam haong nan patagok pasram ilamo ky thuat tui yaok gah, yaok labik, daong urang dalam kapul paglaong ilamo, pandar ilamo ky thuat tame bruk ngak, dak harei dak ngak jeng majam yaom kaom saong parilo jien ba tame.

“Jalan ngak meng anak tal Kapul urang ngak nong jeng ba tabiak dom gah ilamo di tinh piah bac pasram ka dom ilamo, pagap ka gah ngak nong ye drei bac pasram ilamo dalam ka gah ngak nong, daok raong ikan hadang ye drei peih dom tal ka gah raong ikan hadang, daok gah njam patam ye drei brei panuac di drei ka dom tal bac pasram piah hu tui dom gah, ngan haong yaok bhum palei rahra piah pandar tame raidiuk piah ba mai siam lagaih glaong jang.”

Bruk raong glang pabe di sang ong Nguyễn Văn Bò hu brei mboh, meyah hu palih ruah njauk jalan, lagaih haong langik saong hu bruk daong di karja, dom kapul ye bruk raong glang tui yaok baoh sang jeng meda hu ba mai siam lagaih kinh te karo kajap. Ini oh lac bruk duah jien daong sa baoh sang patruh kathaot, bo daok lac jalan nao lagaih piah brei bruk ngak, parilo jien mek tame ka rilo baoh sang urang ngak nong dalam tukvak anak tal./.