Di labik raong lanung oh cang hu gluh dalam labang danao meng simang di sa-ai Nguyễn Trường Giang daok  di palei Vĩnh An, xa Hồng Dân urak ini hu jaik 30 baoh danao hu labaih 200.000 drei anek lanung. Sa-ai Giang sa urang lac dalam dom urang ba rup nao dahlau dalam bruk raong lanung dalam danao ximang di puk palei. Labaih Pak thun dahlau. Mboh bruk raong lanung lac bruk ngak mbang hu kein lagaih, kayua hatai caong darak pasar glaong, lanung meda mbuan raong yau nan ye sa-ai Giang nao tal dom labik raong lanung di tinh Vinh Long piah duah thau bruk raong lanung dalam danao ximang.

Hadei di tuk rivang me-in lagaih saong duah thau bruk ngak, sa-ai Giang mbaoh tangin buh jien tame padang 10 baoh danao raong lanung. Gam sa urang hu hatai chreih takre raong glang, jeng ye sa urang tham bac magru sua tangi nan yaom lac oh ka hu rilo ilamo min mbang raong lanung akaok meti di sa-ai Giang jak jeng labaih jang dut haong caong khin. Ini lac bruk piah sa-ai giang mbaoh tangin peih praong buh jien tame ngak bruk, gam haong nan brei mboh lanung lac athur raong daong rahra patagok kinh te. Sa-ai Giang buh jien tame padang 20 baoh danao raong lanung, piah hu taong abih lac 30 danao raong lanung.

Meng hu ilamo raong lanung saong bruk bac hu di drei, sa-ai Giang ndom lac: Raong lanung dalam danao simang oh kan, tok brei thau kajap ilamo ky thuat lac mbuan jak jeng glaong. Min, phun jien buh jien tame biak praong lac bruk kan kandah ngan haong rilo urang khin peih bruk.

Di bruk raong lanung di drei, sa-ai Giang brei thau: Gam song danao raong 8m2, jien buh tame dalam nan hu jien blei lanung pajaih, kaya mbang, jru pahacih… abih di nyu labaih 50 trieu dong. Meyah lanung patagok siam meda brei meng 1,2 – 1,5 tan di sa baoh danao, hu yaom 80.000 dong sa kilo yau urak ini, kaoh abih jien buh tame ngak, yaok baoh sang, mek tame laba 30 trieu dong hadei 11 bilan raong lanung.

Raong lanung dalam danao simang ba mai siam lagaih glaong rilo brei ka urang ngak nông xa Hồng Dân daok jhul khang patagok. Sa-ai Nguyễn Văn Vũ Linh daok di puk palei Ninh Định, urak ini raong labaih 100.000 drei lanung brei thau: Raong lanung dalam danao simang hu kein lagaih lac meda raong kapal jang, gam haong nan pasang iek ia siam jang dut haong raong lanung tui jalan meng kal mai.

Tui sa-ai Vũ Linh, lanung ieu lac janih kalik janal, mbuan saluah yau nan tuk raong dalam danao simang, dahlau di abih di nyu, urang raong brei khik kajap ala danao saong angaok mbaok vil taom dan brei janal hacih. Langiu di nan, lanung mbuan luak kandaok, bhian blo nyut yau nan sa-ai brei ruah labik luak tame luak tabiak ka lagaih, labik kandaok ka lanung meng talei hanyuel laman lamuac.

Kayua lanung ieu lac janih anek raong biak caik hatai haong ia yau nan ye yaok harei brei mbang 2 mbang, dalam tuk nan brei salih ia 4 mbang tui njauk tukvak piah khik kajap oh ngak nerak ia. Dalam luac jalan raong, urang raong jeng brei bhian pabak vitamin saong dom janih men tung pruac; tui tukvak brei tathuak dom anek ruak ndam padam… piah paglaong prein pacang ruak ka lanung.

Urak ini, lanung ieu lac sa janih kaya kan dalam ia hu yaom kaom kinh te glaong, hu darak pasar takre. Raong lanung lav bruk lagaih haong kein lagaih ngak nong, kayua takik palai taneh, hu yaom kaom kinh te glaong, daong urang ngak nong patagok kinh te baoh sang.

Tui Akaok UB bhap bini xa Hồng Dân, tinh Ca Mau Nguyễn Nhân Đức: urak ini hu 200 baoh sang pandar bruk ini ngan haong bruk karei gauk. Jak jeng di bruk raong lanung oh hu gluh dalam danao ximang hu peih tabiak jalan nao bahrau, daong pandar siam dom taneh hu dahlau di baoh sang urang ngak nong, parilo jien mek tame ka rahra. UB Bhap bini xa Hồng Dân taong yaom, bruk raong lanung dalam danao kavei ximang gam haong dom bruk raong karei lac dom bruk daong dom baoh sang di bhum palei patruh kathaot, paatagok kinh te baoh sang.