Di palei Thới Xuân, xa Cờ Đỏ, bruk rong lanung oh hu gluh di muk Danh Thị Kim Sang, urang bangsa Khmer daok brei mboh jak jeng cambaic laic dalam bruk ngak mbang blei salih, peih tabrah jalan patagok bruk ngak mbang lagaih brei ka di dom baoh sang tukik taneh ngak mbang.

Raong lanung meng bilan 11/2024, muk Kim Sang buh jien raong iek 5.000 drei lanung pajaih dalam dua var sit. Hadei di labaih 8 bilan, tapon anek lanung raong camreip hu brei mbang, kaoh abih jien buh tame mek raba labaih kurang 18 trieu dong. Meng akaok meti mboh jeng, baoh sang di muk chreih hatai peih praong bruk raong lanung.

Urak ini, sang di muk Kim Sang daok khik 5 var brei raong, gam tui var lanung di gait tagok ralo labaih yaok pluh ribau drei. Tong abih jien buh tame ngak var raong glang meng 70 tal 100 trieu dong. Yaok harei, jien brei ka nyu mbang bih meng 400.000-500.000 dong. Masa vaktu meng anak, muk Kim Sang cong khin peih praong jang mayah duah hu jien phun raba tukik jeng ye hu bac magru ilamu raong glang nyu:

"Bahrau raong mbang akaok meti, blei 5.000 drei lanung, koh abih jien buh tame raong dalam labaih 8 bilan drei raba hu 18 trieu, yau nan ye marat ngak dom var ro ini, dahlau diah peih dua ro var, mboh jeng dahlak padang klau ro ini. Hu dom adei di pasang raong labaih 3 thun mboh biak jeng, sa thun mek hu labaih 300 trieu, raong 3 thun blaoh paje. Drei dahlak bahrau raong hu 1 thun, raya tet ini drei hu pablei 3 var ro ini.

Mboh jak jeng mai meng bruk raong lanung oh hu gluh, ralo urang ngak nong daok di xa Cờ Đỏ, ban Can Tho chreih hatai buh jien buh prein tame bruk ngak mbang raong lanung. Ong Lưu Văn Cang chreih hatai tame raong iek 5.000 drei, kaoh bayar abih jien buh tame daok hu raba labaih 18 trieu dong, pachreih hu dalam sang danaok tame raong lanung. Ong Cang caong khin hu daok daong ilamu raong glang piah peih praong bruk ngak mbang raong glang:

"Harei harei drei raong drei iek bruk raong glang rup drei, njauk caik hatai di abih hu lac ia, tuk lanung daok sit brei ia tame tabiak dua mbang, praong hasit ye klau mbang, hu njauk ndom mayai lac lanung nyu eik biak naih joi min tapi oh bom takre takik brei patathuak ia tame tabiak, meng 7 -8 tuk, drei caga ieik yaok 24 tuk drei brei tathuak ia 3 mbang, tathuak dahlau di nyu juai var. Jien phun tuk ini jeng daok biak kurang, urak ini caong hu jien phun makheik hasit.

Tukvak masa meng blaoh xa Cờ Đỏ peih Danak dak akaok bram nagar brei ka gah patagok kinh te, xa hoi bhum taneh urang bangsa takik dan saong bhum ceik masa 2021-2030. Gam tui di nan, Pahasa Hoi Lien hiep Kumei xa kham marat gam saong urang kumei, dalam nan hu urang kumei bangsa Khmer, tapa bruk daong phun jien masraiy, pato magru brei ka bruk jao ba ilamu, ky thuat jeng ye pacambak bruk ngak mbang lagaih.

Tui muk Nguyễn Thị Hằng, Phaok Akaok Kapul Hoi Lien hiep Phu nu xa Cờ Đỏ, bruk ngak mbang patagok kinh te di angaok bhum taneh xa ba mai ralo siam makre gah kinh te brei ka bhap bini, daong patagok jien mek tame, karo dalam raidiuk urang ngak nong di bhum palei. Di dalam masa meng anak, Kapul Hoi daok jak ba urang dalam pahasa kumei jeng ye patagok bruk ngak mbang yau meng blaoh; daong ba adei sa-ai kumei nao bac magru hadei di nan papraong pacambak bruk ngak mbang jak jeng.

Gam nao song bruk ngak di xa Cờ Đỏ, dom bruk ngak mbang patagok lagaih daok daong urang ngak nong patagok jien mek tame, karo dalam rai diuk, dak yam dak tuk ngak njauk tui akaok mbram patrun kathaot karo kajap dan song patagok bruk ngak mbang blei salih patagok rai diuk di bhum palei./.