Tukvak tapa, Jabat padai Bhum taneran kraong Cuu Long hu pamaluk hlai saong ba tabiak labaih 180 pajaih padai duh brei ka bruk ngak mbang, daong paglaong padai brah ngak hu, khik kajap an ninh padai brah pakat negar saong jhul tagok bruk pablei tabiak langiu negar ka brah. Dom pajaih padai hu jih angan OM kayua Jabat pilih ruah urak ini meblah labaih 60-70% taneh pala di Bhum taneran kraong Cuu Long. Rilo pajaih hu drak pala rilo yau ye OM5451, OM18, OM6976, OM4900, OM6162 oh tok lac hu pala rilo dalam bhum blaoh daok peih praong tabiak rilo labik karei dalam negar saong dom negar di Dong Nam A, Nam A, chau My Latin saong chau Phi.

Dalam tuk daok tua raya, njom ia mbak dak harei dak tagok, Jabat jeng dil samu pachreih saong pabak dom pajaih padai meda ciuk njom ia mbak meng 2 tal 4‰ daong patrun khat lahik ka bruk ngak tabiak padai dalam bhum.

Jabat Isitut ba tabiak 22 janih pajaih padai. Dalam nan, 11 janih pajaih hu Mentri Ngak nong saong Alam langik Viet Nam mbaoh tangin brei pandar. Taong abih dom pajaih jeng hu tut angan saong brei harak mbaoh tangin pacang khik ka pajaih phun pala.

Ong Nguyễn Trung Trị, xa Phụng Hiệp, ban raya Can Tho hu ruah tabiak labaih 5 janih pajaih padai blaoh ong mboh hu lagaih, dalam nan hu janih OM18, OM29, OM68, OM74 saong OM451. Tui ong, dom pajaih ini hu hala praong gap mbiah, takik jaleih, takik halak haling saong asar brah atah, njauk haong hatai caong di darak pasar pablei tabiak langiu negar. Min, tuk palih ruah pajaih padai, asal kadha darak pasar blei padai jeng mboh praong. Meyah pajaih bahrau min urang ikak kaiy atau gah ngak mbang pablei salih oh blei ye urang ngak nong oh khin drak padai:

“Harei ini hu Jabat bhum taneran kraong Cuu Long da-a mai piah taong yaom asar padai, blaoh dahlak ruah hu 5 janih pajaih, duah dom janih padai hu kein lagaih, phun siam glaong, yuak kuak hu rilo, asar brah jeng njauk tanut pablei tabiak langiu negar atau lac darak pasar urang blei pandar.”

Bhum taneran kraong Cuu Long khik siam ngan jang ye gah padai brah Viet Nam tuk meblah labaih 50% padai dalam negar saong rik daong labaih 90-95% brah pablei tabiak. Yaok thun, Viet Nam pablei tabiak labaih 6-8 trieu tan brah nao tal labaih 150 negar saong bhum taneh.

Ong Lê Thanh Tùng, Phaok Akaok, Tong Thu ky Hiep hoi gah padai brah Viet Nam ndom mayai lac, urak ini pajaih padai dalam bhum pataom tame kapul pajaih asar siam glaong duh bruk pablei tabiak langiu negar yau ye OM18, Đài Thơm 8 saong OM5451. Min, bruk pandar pajaih brei thau lac bahrau mek hu di labaih 25% taneh. Kapul pachreih dom bhum palei brei mboh 1-2 pajaih hu drak pala rilo njauk haong kein lagaih sinh thai, gam haong nan patakik pajaih pala meng labaih 150 kg/ha trun 70-80 kg/ha tui pachreih kakei ilamo ky thuat.

“Kapul biak caong khin ngak hu sa talei pamuak hu angan makna di HTX, urang ngak nong, gah ngak mbang pablei salih, dom jabat roh duah, dom jabat hu ilamo piah khol drei ngak jak jeng dom jalan ngak di Danak dak 1 trieu hecta ba tabiak. Jhul tagok bruk ngak hacih hijao, takik tathuak nerak, saong hu makna abih lac peih praong hu bhum pandap tamo, pambuak majam brei brah hacih hijao, tathuak nerak biar tukik di bhum taneran kraong Cuu Long.”

Harei raya urang ngak nong pala padai ieu lac tukvak piah dom urang hu ilamo, urang gah ngak mbang pablei salih saong urang ngak nong ndom meyai khau tin nao mai, pandar pajaih padai bahrau saong bruk hadah krah ilamo ky thuat dalam bruk pala padai. Tapa di nan, daong ngak jeng dom bhum pandap tamo padai asar siam glaong, jhul tagok gah padai brah Bhum taneran kraong Cuu Long patagok tui jalan karo kajap, paglaong yaom kaom asar brah saong pasiam jien mek tame ka urang ngak hamu padai./.