Atah di ini labaih 10 thun, hu urang krein yaih khan, ong Đinh Văn Phết (lac Năm Phết) di Phuong Trung Nhứt, ban raya Can Tho pasiam labaih 1 cong taneh piah pala iek 20 gok phun thanh tra. Mboh ini lac janih phun mbuan pala, takik palai jien buh tabiak ka khak jru, ong kham merat pagam haong bruk ngak. Labaih 5 thun hadei di nan, bein phun thanh tra brei baoh saong labaih 3 thun jaik di ini, yaok bilan paik baoh hu meng 1-2 tan baoh that, langiu di taong abih jien buh tabiak, ong Phết hu laba meng 40 trieu dong tagok.

“Dahlak hulin pala mbang akaok meti klau janih, oh njauk lac sa janih, pala phun uas, phun kruac, phun yau. Hadei di nan dahlak gaok sa urang ayut sahabat neh phun brei dom phun thanh tra pajaih, pala tal ini mboh hu yaom, jeng mboh uan tabuan. Urak ini yaom 40 ribau sa kilo lac urang mai blei gam gam. Thun ini sahneng lac jien mek tame oh karei hagaih thun blaoh, kayua pablei jeng hu yaom yau thun blaoh.”

Tet raya thun Asaih Waw meng blaoh, bahrau meng 2 phun thanh tra brei baoh tathak ong Năm Phết pablei mek jien hu jaik 6 trieu dong. Urak ini dom phun thanh tra daok veik daok tame bilan paik baoh, ong Phết daok paik baoh tathak pablei rah rah. Sa-ai kamei Đinh Thị Kim Thoa – anek kamei di ong Pết brei thau, yaom lac yaok thun thanh tra tok brei paik baoh sa mbang pala min urak ini yaom pablei hu tani tanat jang, yaok thun phun brei rilo baoh nan bam ai jien mek tame tani tanat sampurna brei ka baoh sang.

“Urak ini hu baoh paje dahlak hulin jeng mboh sambai chreih chrai, mikva tame mai blei, ieu ieu phone meng angaok online, ralo urang khin blei blaoh oh hu thanh tra si pablei mboh biak damein palai. Meng hu phun thanh tra ini blaoh thun taha jeng mboh sron mbon, anek bik jeng takik naong trak ka ame ha sit. Thanh tra ini ame tok prai khak di gok takai phun, jru halak lac oh hu pandar, mbang baoh hu siam bingi”.

Mboh siam lagaih cambaih laih brei ka bruk ngak mbang, ong Đinh Văn Phết hu peih praong taneh pala phun thanh tra di abih taneh bein di drei, dalam nan hu rilo phun thanh tra yamein. Urak ini langiu bruk pablei baoh tathak ka urang ikak kaiy, ong Đinh Văn Phết daok peih bambang raok tuai damuai jaik atah mai rivang jirah labik bein ngan haong harak tame bein 40 ribau dong sa urang; langiu jirah rivang, tuai damuai meda hu blei baoh di bein piah ngak kaya alin hadiah. Amuk Thái Thị Thao daok di Phuong Trung Nhứt hadei tuk rah rivang bein thanh tra ndom mayai lac:

 “Dahlak hulin nao darak blei mai mbang min urak ini nao tal bein mboh rilo baoh. Taong abih dom labik karei jeng mai rah rivang labik jirah. Baoh rilo mboh biak mahu. Dahlak nao sang khan brei ka anek taco dahlak nao tal bein gam jirah rivang me-in gam ka thau”.

Bruk pala phun thanh tra pambuak jirah rivang glai klo tamo asal di ong Năm Phết oh lac sa janih siam lagaih brei ka bruk ngak mbang yaom pakat glaong di sa bhum taneh, blaoh nyu daok peih tabiak jalan nao bahrau brei ka urang ngak nong di bhum palei. Bruk ngak jak jeng di ong taha urang ngak nong ini brei mboh ka hatai khin sahaneng, khin ngak saong bruk hadah krah di bruk salih pandon phun pala. Urak ini, bein phun thanh tra oh lac daong baoh sang ong hu jien mek tame tani tanat blaoh daok jeng sa labik padeih takai chreih takre, daong yaih khan thaik thaot kaya gah ngak nong hacih sa-at that hijau, bruk siam gheih di bhum palei Trung Nhứt saong bhum taneh Tay Do nao tal tuai damuai urang jirah atah jaik./.