Dom talei ro var anek maja hu brei dak tani tanat di likuk sang daok di palei 9, xa Kiến Đức jeng sa bruk duah jien di sang ong Hoàng Văn Vũ. Meng sa bruk daok takik urang ngak, ong Vũ kham merat bac megru sua tangi, ngak po ilamo jamariak ky thuat piah parilo tapol maja labaih sa rituh drei, ba mai jien tik yaok thun.

Thun 2019, dalam tuk duah thau dom bruk ngak mbang bahrau, ong tatuah bac puac hu kadha raong maja. Mboh langik lagaih, kaya kan brei mbang hu sagait yau ye patei, haleik asar, ikan that biak lagaih, ong mbaoh tangin tame ngak iek.

Ong Vũ ndom lac: Dom harei akaok meti, dahlak hulin raong ieik labaih 15 drei pajaih, ta-eng ngak var ngak ro, pagam gair saong duah thau ka bruk cakrok, menek anek di nyu jeng yau dom jalan caga ruak kik ka anek maja.

Tuk barau tame bruk raong glang di dom harei akaok meti peih mbang ngui oh takik kan kandah. Kayua kurang ilamo, ong Vũ blei njauk pajaih oh lagaih, ngak ka dom drei maja kan si krein randap saong labik daok, suai praong saong kan pamenek anek. Hadei di dom tukvak masa di nan, ong Vũ pataom tame bruk duah thau, mek hu ilamo saong dak harei dak tani tanat bruk ngak.

Hadei di hu sa thun, tapol maja di sang sa-ai Vu hu tagok ralo labaih 80 drei. Tal ini, labik daok khik tani tanat labaih 100 drei, dalam nan hu 40 drei anek maja ine. Yaok thun, sa drei maja amaik ine menek dua mbang anek, yaok mbangnyu anek hu meng 3–5 drei anek, ba mai halaau pajaih rilo jang.

Tui ong Vũ, maja hu thun umo kuhria rah tapa labaih 10 thun. Maja ine praong meng umo 9–12 bilan meda brei ngak pajaih, tuk nyu metian labaih 2 bilan. Maja anek hu pasram mbang meng 30 harei, paraneh tapol tuk maja anek hu 45 harei saong hadei di 60–70 harei meda pablei tabiak ngak pajaih.

Yaok thun ong Vũ pablei tabiak labaih 100 yau maja ine pajaih, hu yaom labaih 6 trieu dong sa yau maja. Daok maja mek ralo ye kandai makan kakei bei tal halei drei pablei tal nan, yaom nyu labaih 1,5-2 trieu ndong/kg.

Kayua nyu lagaih laguo saong glai glo, maja hu raong kareik karei yaok drei. Maja binai tal bilan khin tano meng gam dalam dom harei piah ka nyu juak tano, hadei di nan blaoh brei raong neh pacalah karei. Var ro hu ramik caga lagaih, hacih sa-at, majam brei mbang saong pabak ia jaik yau ngak ta-eng. Yaok harei, ong Vũ caik labaih 2 tuk piah pasang iek glang maja raong, pabak haleik, patei saong ikan, njauk caik hatai dalam nan brei sangka tal dom drei daok metian piah pasiam kaya mbang ka nyu. Maja anek hu klauk jru vaccine ganup, nyu brei menek tani tanat.

Raong maja oh lac sa janih ba mai jien ndo mek tame brei ka sang danaok, bruk raong maja di ong Vũ daok jeng labik piah ka rilo urang ngak nong mai rivang, bac megru sua tangi. Urak ini ong VU daok padang ngak var ro, kuhria parilo tapol tagok labaih 200 drei. Ong Vũ ndom mayai lac: “Hatai caong darak pasar daok praong min dahlak oh khin peih praong rilo. Yaom kaom meda tagok trun, nan ngak tal halei kajap tal nan, brei caik dahlau khik pajaih siam piah raong suai atah”./.