Sa-ai Nguyễn Hữu Hiếu, po Labik ndak taiy lê-ki-ma di xa Đất Đỏ (huyen Đất Đỏ, tinh Ba Ria – Vung Tau klak), Ban raya Ho Chi Minh brei thau, lê-ki-ma ieu lac janih phun hu pala rilo di bhum taneh Đất Đỏ, hu urang ngak nong pala rilo di bein sang, sang takik ye hu 1 phun, rilo ye hu 5-7 phun. Piah daong mikva hu jien mek tame meng baoh lê-ki-ma, thun 2023 sa-ai Hiếu buh jien blei jamraik, kaya ngak ia taiy trà lê-ki-ma (yau arak talei) meng baoh saong ba alin brei dom urang dalam bhum menyum iek, hadei di nan brei ba tame darak pasar.

Dak tuk dak hu brei ndap nda kaya hala taiy lê-ki-ma hu rahra dalam bhum je pandar, yaih khan ka urang pandar di Dong Nai, Khanh Hoa, Ban raya Ho Chi Minh… duah blei ndap nda hala taiy ini. Labik di sa-ai Hiếu kuhria paglaong ndap nda taiy lê-ki-ma ngak yau arak talei tagok OCOP 4 patuk saong tut angan OCOP 3 baoh patuk ka dom ndap nda kaya hala taiy lê-ki-ma kadung halang, tapung, ngak ia giấm lê-ki-ma: 

Labik jeng pataom blei baoh lê-ki-ma di dom baoh sang rahra dalam bhum palei, caong khin rahra khik tani tanat phun lê-ki-ma di bhum palei, nan lac ilamu karei di bhum palei. Hu makna abih lac asar siam ndpa nda, tuk halei jeng khik kajap bruk karo salamat kaya mbang, HACCAP. Blaoh tal pataom tame thaik thaot ndap nda ka salah blaoh, tani tanat saong hu makna ka angan je di bhum palei. 

Daok sa-ai Đinh Công Trường, po Labik ngak habei plom di xa Long Hải (huyen Đất Đỏ, tinh Ba Ria – Vung Tau klak), Ban raya Ho Chi Minh brei thau, kaya tapung habei asah di sa-ai mẹ hu OCOP 3 patuk di thun 2024, tal ini hu mbaok di grauk labik dalam negar.

Tui sa-ai Trường, meyah habei asah habei plom pablei that tok hu di labaih 100 ribau dong sa kilo habei that ngak jeng 1kg tapung habei ye meda hu pablei meng 1,4-1,5 trieu dong sa kilo, siam lagaih biak glaong saong ndap nda mbuan nao tal tangin urang pandar:

Darak pasar urak ini daok biak praong, hatai caong jeng biak praong. Kayua yau nan khol dahlak hulin hu jalan ngak peih mbang ngui piah ngak tabiak ndap nda, pabak hatai caong ka urang pandar. Kayua akaok habei plom ngak hu jeng rilo ndap nda dalam kaya mbang, kaya jru saong ba ndap nda meng tapak di urang ngak nong tal urang pandar, kayua nan asar siam ndap nda brei khik kajap glaong jang.

 Tui So Ngak nong saong Alam langik Ban raya Ho Chi Minh, Danak dak yaok xa sa ndap nda (OCOP) hdak harei dak hu peih praong, rilo ndap nda asar siam glaong hu urang blei pandar je tame saong taduan, dak harei dak ngak jeng thaik thaot dom ndap nda karei, ba tui inem karei di ban raya. Tal ini, ban raya hu 1.006 ndap nda, dalam nan hu 220 ndap nda hu 4 patuk saong 786 ndap nda mek hu 3 patuk.

Min, tui ong Nguyễn Văn Đa, Phaok Yam ndok So Ngak nong saong Alam langik Ban raya Ho Chi Minh, tal tukvak urak ini di ban raya oh ka hu ndap nda OCOP 5 patuk. Ban raya kham merat hu meng 5-10 ndap nda OCOP 5 patuk di thun 2026.

Ban raya Ho Chi Minh brei paglaong dom ndap nda OCOP meng 4 patuk tagok 5 patuk, ngan haong kein lagaih lac dom po brei ngak khik kajap dom tanut tui adat. Kayua yau nan blaoh So hu jalan ngak daong dom po ndap nda OCOP 4 patuk brei salih dom thaik thaot, kadung papaok, abih di nyu nan lac brei paglaong asar siam ndap nda tagok 5 patuk bo hu Mentri mbaoh tangin.

Di danak dak Pambuak pablei salih ndap nda OCOP Ban raya Ho Chi Minh 2025 rah tabiak di phuong Vung Tau bahrau ini, rilo labik hu tut angan harak kanal hadar, peih tabiak kein lagaih ba kaya ndap nda tame majam darak pasar, majam tadai kuan sit saong dom kenh pablei praong. Ini lac dom bruk siam gheih karo kajap, brei jien mek tame tani tanat saong jhul tagok kinh te palei pala di Ban raya Ho Chi Minh dalam tukvak ba drei tame./.