Nyaom roya Pakacah  anit taneh ia pakat negar mbang XI daok peih ngak dalam 2 harei 26 saong 27 bilan 12 di Pasak Nyaom biai Pakat negar, Ha Noi hu labaih 2.000 urang lambaok vakil. Nyaom roya pakacah anit ranam taneh ia mbang XI peih ngak praong prang, hu rilo urang abih di dom Nyaom roya. Mbiah tal ini, bruk ramik caga ka nyaom roya  hu peih ngak dalam sami samar, siam jang. Di Nyaom roya, hu peik meyaom 186 Anh hung saong 100 urang lin pakacah pakat negar. Dalam tukvak peih ngak Nyaom roya, hu peih bruk parang iek dom bruk ngak mbang kinh te di taneh ia hadei 40 thun salih birau; Parang iek ngan haong kadha “ Pakacah anit taneh ia – daong sa negar Viet Nam khang kajap”…

Ong Nguyễn Phước Lộc, Pho Bi thu Thành ủy, Akok Ủy ban MTTQ Việt Nam TP.HCM birau mai rivang, alin labaih 67 ti dong rik daong ka bhap bini saong gah pato megru tinh Khanh Hoa ramik pasiam hadei ribuk ia sua. Dalam nan hu 4.100 mac jamraih  hlang ia; jaik 27 ti dong daong ka dom bhum palei pasiam hadei ribuk ia sua; labaih 26 ti dong piah ramik pasiam dom sang bac  saong 350 trieu dong jien daong Kapol Urang ngak nong. Bingun ini, Kapol Becamex jao brei 2 ti dong rik daong ka bhum palei ramik pasiam hadei bala rah tabiak…Mbiah tal ini, TP.HCM daong daong Khánh Hòa 107 ti dong  gam labaih 2.900 tan kaya kan, ndap nda dom janih karei…

Dalam tuk peih ngak “ Danak dak Quang Trung”, Kapol urang jakar bruk di Bộ Tư lệnh Quân khu 5 kayua Trung tướng Lê Ngọc Hải, Tư lệnh Quân khu ba akok mai rivang,pasang iek saong jak ba dom gah daok peih ngak bruk padang sang daok ka bhap bini gaok ia ribuk sua di tinh Dak Lak. Mai rivang  saong jak ba 3 baoh sang kan kandah, sang jaleih abih dalam hajan  di xã Hòa Xuân, hu bol lin daong padang sang, Trung tuong Lê Ngọc Hải, Tư lệnh Quân khu 5 khan lac klak rabha dom kan kandah haong rahra bhap bini; jak ba dom baoh sang kham merat yam tapa dom  kan kandah, sahanang hatai ngak mbang pala drak.

Tinh Vĩnh Long hu jalan ar tathik atah 130 km, dui atah meng bhum taneh Duyen Hai tal Bình Đại. Tapa duah thau, hangin khang kuhria rah tapa hu meng 7 tal 8 met sa giay. Vaktu meng 2025 tal 2030, Vĩnh Long kuhria peih ngak 10 danak dak praong di gah ngak tabiak nang luong, kuhria abih tih phun jien labaih 55.250 ti dong. Dalam ini  hu 8 sang dien hangin, 1 sang mac dien ia harei  saong sa sang mac ngak tabiak Hydro hacih hijao praong. Bruk cakrok patagok  nan oh lac peih ngak jalan ngak mbang duah bruk birau, duah jien tame ka bhap bini, bo daok rik daong tame makna praong cakrok patagok di taneh ia.

Biar harei kabroi 14/12, urang ngak praong So Y te tinh Lam Dong mboh lac, labaih 30 urang di Phan Thiet ( Binh Thuan klak) tame sang iek ruak kayua dom ruak jru mek ndap mbang. Urak ini dom sang iek ruak hu taong ruak saong tui iek prein yawa di Sang iek ruak Đa khoa Binh Thuan saong Sang iek ruak Đa khoa An Phước. Tui duah thau camereip, biar harei 12/12, dom sang iek ruak hu taong ruak ka rilo urang ruak pandik hatian, glaok ta-ok, aih caraoh, pandiak saong glaih glar. Tapa duah thau, bruk dreih gauk lac, hu mbang ahar banh mi blei di urang dui radaih di jalan phuong Phan Thiet.

Kaya mbang di Trung Quoc thun 2025 tagok glong jaik 715 trieu tan, tagok 1,2% dut saong thun dahlau. Bruk nan ngak hu mai meng dom sarak daong biak lagaih jeng yau dom bruk kham merat peih praong bruk ngak mbang saong tani tanat taneh pala di rajaei Trung Quoc. Langiu di nan, bruk ngak tui dom jalan ilamo birau saong bruk langik lagaih rik tame paglong prein khang cambaic laic, hu jeng labik ngak siam abih di bilan yuak kuak.

Sa candaih patau cur  lac talang di tuk birau menek tabiak sit abih hu duah mboh piah thau cambaic laic jang di janih athur bò sát meng kan dahlau diuk di Baoh taneh  dahlau di ini labaih 200 thun. Patau cur, hu duah mboh di gah meraong Brazil, lac sa talang akaok atah tal 2,5cm, duah thau ini lac talang meda di puac abap Tam Điệp. Bruk duah mboh nan daong pabak makna praong di bruk cakrok saong sinh hoc di dom janih bo sat meng kan dahlau.

Meng bilik biak gheih dalam sang drei di Vòng Bắc Cực, Ong taha Noel harei kabroi hu payua panuac Noel caong khin ka bruk salamat saong jum pataom dalam bilan rija roya. Ong taha Noel klak rabha dom caong khin harei Noel thun ini di ong lac dom urang di grauk dunya sahaneng ka bruk peih ngak Noel dui ba rahra anit ranam gauk jang. Daok oh bak dua adit tra tal Noel, yaok ribau tuai damuai mai meng rilo taneh ia di dunya tame barah negar Phần Lan piah taom gaok Ong taha Noel./.