Danak Jalan tui akaok mbram pakat Negar patagok kinh te – xa hoi bhum urang bangsa takik saong bhum ceik, daok ieu lac Danak dak 1719, hu rah tapa jaik 5 thun peih tabiak gam hu rilo bruk naih gheih, peih tabiak bruk hu angan makna ka bruk patagok karo kajap dom bhum biak kan kandah.

Meng di thun 2021, Danak dak 1719 ba tabiak jalan ngak taong abih ka bruk patrun kathaot karo kajap, paglaong jien mek tame, pasiam ha tang saong jitvu rahra, paglaong ilamo siam gheih saong pato pakai bruk ngak ka mikva bhum bangsa takik. Hadei di 5 thun ngak bruk, danak dak hu jak ba labaih 137.000 ty dong, jhul khang bruk patagok kinh te – xa hoi bhum atah bayah, dom labik hu rilo urang bangsa takik daok ngak mbang.

Dalam nan, bruk ngak mbang jak jeng siam abih lac hu bruk patrun kathaot kuhria rah tapa hu 3,4% yaok thun, truh tapa jalan ba tabiak, daong do bruk patagok gam saong dom bhum palei karei. Jien mek tame kuhria rah tapa tui yaok urang bhum urang bangsa takik tal ini hu tagok labaih 3 mbang dut haong thun 2020, mek hu labaih 43 trieu ndong yaok thun saong kuhria brei daok patui dalam dom thun anak tal.

Gam saong di nan, dom urang ngak bruk dalam thun umo hu pato magru bruk ngak jeng truh tapa jalan ba tabiak, mek hu jaik 55%, peih tabiak kein lagaih piah karo kajap ka rahra hu bruk ngak saong pasiam raidiuk. Danak dak daok pataom buh jien tame padang majam ha tang njauk hu yau jalan mbak, gom truac, ia pandar, sang daok daong yaok rituh baoh sang urang bangsa takik pandar siam lagaih jang haong dom jitvu rahra. Gam haong nan lac dom danak dak patagok bruk ngak mbang, pataom tame dom bruk ngak nong hu yaom kinh te glaong yau pala njam, bangu, kophi, taiy, saong raong glang hu daong rilo baoh sang uak drei tagok patruh kathaot saong tani tanat karo di dalam raidiuk.

Brei ka Gah ilamo soang gah y te, danak dak jeng ngak tabiak bruk naih gheih haong bruk khik ramik saong patagok dom ilamo siam gheih bhap bini karei di mikva bangsa takik. Dom sarak pamaong tal bruk daong urang kamei saong uranaih kamei dalam bruk patagok kinh te – xa hoi jeng hu sangka, jhul tagok bruk likei kamei do samu gauk saong patagok bruk di urang kamei dalam dom gah.

Mboh di Lam Dong, 100% xa hu jalan mbak khang kajap pambuak pasak xa, gom truac haong ia pandar hu asar siam biak glaong, dom baoh sang kathaot patrun kuhria rah tapa meng 2-3% yaok thun. Rahra hu daong ngak rilo gah ngak nong pala drak, patagok dom bhum pala phun ngak kong saong phun mbang baoh ba mai yaom kaom kinh te glaong. Dom salih bahrau ini hu paglaong jien mek tame jeng hu padang raidiuk tani tanat, karo kajap ka urang bangsa takik.

Tui ong Bon Yô Soan – Phaok Akaok Uy mbang Mat tran Negar Viet Nam tinh Lam Dong, gam tui kein lagaih saong kham merat glaong di tinh ka bruk ngak siam lagaih dom danak dak buh jien tame bhum urang bangsa takik, tinh Lam Dong hu ngak saong daok mek rahra ngak pasak, pamaong tal dom bruk buh jien tame di Karja hu mai tal yaom mbon palei, ba mai bruk salih bahrau hu mboh cambaih laih, taong abih ka bhum urang bangsa takik.

Maong veik jaik 5 thun tapa, Danak dak 1719 oh sa janih lac bruk hu angan makna blaoh daok lac bruk daong prein ka mikva urang bangsa takik saong bhum ceik can khang hatai uak drei patagok, dak harei dak salih bahrau dalam patagok kinh te – xa hoi saong pasiam raidiuk. Ini lac bruk kajap khang ka bruk karo kajap bhum urang bangsa takik.