Bahrau blaoh, tỉnh Cà Mau hu peih harei patom mbaok urang ngak mbang blei salih piah duah jalan cara patagok kinh te ta-eng drei, nao tal jalan tagok 10% dalam thun 2026. Vakil lambaok jammaah urang ngak mbang blei salih jeng ye urang ilamu hu angan daong brei ilamu. Ong Trần Quốc Sự, Akaok kapul klup Doanh nghiep tinh Ca Mau mboh lac, di bhum palei hu ralo di nyu la urang ngak mbang blei salih sit dan saong gap, labaih 95%. Pambuak bruk di dom urang ngak mbang blei salih oh karo kajap, dalam nan mboh hadei di pambuak pagam bhum palei talei paga hanh chinh. Ong Sự brei thau lac, bruk padang dom jabat urang ngak mbang blei salih di palei biak njauk ngak brei ka aval:

“Dahlak khin brei padang sarak adat brei pambuak gauk di UB Bhap bini dom xa phuong jeng ye padang dom jabat urang ngak mbang blei salih di angaok bhum xa phuong. Patui di nan mada brei pambuak dom urang ngak mbang blei salih haong gauk, pambuak dom urang ngak mbang blei salih, mada piah parabha hatai saong gauk, peih jalan ka gauk gam patagok, daong tame bruk patagok kinh te di tinh. Bruk ini brei ka urang ngak mbang blei salih jaik taphia bac magru hu dom co che, sarak kein lagaih di abih. Mayah ngak hu njauk ngak yau habar jeng ye biar halei brei ngak, jabat halei dang ngak akaok talei.”

Dang angan Kapul Minh Phú, ong Trần Văn Hào khin caong lakau padang dom labik ngak kong kaya ikan ia praong. Dalam gah raong hadang janih prein khang di Ca Mau, karei ngak mbang sit sot yau meng blaoh ye pataom prein patagok 3 bruk ngak lagaih siam ye: “Padai pahe – Hadang hacih” dan song “Hadang lai oh tathuak nerak” piah mek harak angan dunya; daok bruk raong “Hadang ngak kong tui pakat glaong” daong patagok siam makre brei ka jak jeng ralo.

Ong Bùi Kiệu Anh Tuấn, Yam ndok pathau khan ndom meyai di Kapul FPT brei thau lac, Ca Mau oh njauk padeih di bhum ngak tabiak ndap nda tamo blaoh njauk brei pandar glo jak tui AI, IoT tame bruk raong pala, Blockchain tal halau gok di nyu piah brei pamanek ralo jang meng asar gok pajaih drei hu. Dalam nan, tinh njauk pataom prein tame bruk pandar jalan ngak kong saong pasalih lek taka so dalam bruk ngak mbang blei salih brei ka gah kaya ikan dalam ia, gom meng angin meng pandiak saong pabah tasik dalam harei meng anak. Ong Tuấn khin caong lac, Ca Mau njauk pilih prei khang abih di drei jeng ye hu sarak karja daong brei ka urang ngak mbang blei salih:

“Tinh Ca Mau jeng njauk brei drah samar hu dom sarak karja brei kein lagaih, brei daong sraong ka dom urang ngak mbang blei salih dalam dom bruk asar atau dom janih praong karei blaoh pakat tinh mboh nyu mada daong ka patagok di tukvak meng anak mata. Tui ngak kong njauk tapak di nyu, Ca Mau oh sa janih tagok dua lek angka blaoh nyu mada jang pasak kaya ikan pakat glaong di nagar drei, jeng ye di dunya.”

Dang di dom panuac khin caong di urang ngak mbang blei salih, ong Lữ Quang Ngời, Akaok UB BHap bini tinh Ca Mau janji lac, karja akan gam nao jeng ye lang yah dom baoh kan kandah drah samar dil samu. Brei salih barau bruk ngak ka siam, asar di kaoh panak bruk dui atah harak gal jeng ye brei daong ka bruk ngak mbang blei salih laneng lanoi siam lagaih dan saong pachreih urang buh jien tame ngak mbang:

“Caik hatai tal dom panuac khin caong di urang ngak mbang blei salih brei ka dom jabat so nganh, di dom palei njauk cai hatai, brei kaoh panak klak dom harak gal oh njauk pandar, lahik tavak ralo tuk vak. Jeng njauk patagok glaong jang bruk ngak langyah dom gigak harak gal, njauk pahadah krah dom baoh kadha jeng ye taoh lang dom janih kan kandah gak gar brei ka urang ngak mbang blei salih.”

Ong Nguyễn Hồ Hải, Bi thu Tinh uy Ca Mau jeng hu brei caong khin dom pakat gah, paglaong bruk ngak njauk hatai di bhap bini, urang ngak mbang blei salih. Ong Hải khin cong lac, njauk brei ngak hu "5 taka" dalam patagok kinh te ta-eng drei. Dalam nan asar kadha di nyu hu pasiam bruk ngak ka laneng lanoi truh gah, dan saong padang baoh jabat karja jaik taphia rahra./.