Mbiah tal harei Sanecar dalam yaok adit, tuk pandiak biar harei nyom ban sambo kanyik apuh tangei hijao saong angin yuk ba tui mbau dhun taneh jeng ieu lac tuk di Xóm Rẫy (phuong Mỹ Ngãi, tinh Dong Thap) tame yava mejua peih hatai raok tuai damuai mai jirah rivang, ba drei tame pataom nyaom darak pasar bhum palei. Labik jirah rivang bhap bini nyaom pataom darak pasar Xóm Rấy hu UB Bhap bini phuong Mỹ Ngãi ba tabiak yaih khan di puac bilan 1-2026 oh lac labik pablei salih, ini daok ieu lac labik ilamo, lac tatua rabang pambuak bruk gheih ghang di bruk ngak ngan haong suan yava di jirah rivang jaman bahrau.

Amuk Lê Thị Trúc Mai, phuong Mỹ Ngãi brei thau, njam patam amuk pala eng blaoh ba tabiak darak palei brei pablei, gam yaih khan ka tuai damuai jaik atah ka dom janih njam patam di palei pala bhum kraong ia, gam duah jien tame ka urang taha ini.

Tuai damuai urang jirah angan Nguyễn thị Kim Chi gam haong 20 urang dalam kapul meng di tinh Vinh Long mai jirah rivang darak pataom, mbang ahar banh xèo mien Tay bhum Pei negar jeng yau cuak hilac dom tuk gheih ghang di mblang hamu hijao. Amuk brei thau darak pataom biak gheih saong brei yaih khan ayut cuai sahabat piah duah tal labik me-in harei puac adit.

Nao rah vil 28 tadai kaya ngui brei pablei parang gheih ghang, tuai damuai yaok laik tame sa bruk inem krung siam gheih ngan haong dom baoh ahar bhap bini mbau pahe ndiuk bahrau, dom bai njam patam that jangaih, atau dom bai baoh pa-aok that bangi, mbau pahe,… kayua tangin urang bhum palei sangka iek glang.

Amuk Nguyễn Thị Bạn, phuong Mỹ Ngãi brei thau, meng tuk hu darak pataom ini, baoh sang amuk jeng paik baoh pa-aok ba nao pablei. Darak pataom dak jaik sang lagaih, tuai damuai biak chreih takre baoh pa-aok di bhum palei nan yaok biar harei pablei jaik rituh kilo pa-aok, rilo jang dut haong pablei di darak, daong ka sang danaok duah hu jien mek tame.

Sa-ai Nguyễn Minh Thành, kapul dam dara phuong Mỹ Ngãi brei thau, sa-ai biak chreih labik darak pataom di bhum palei. Mbiah tal harei puac di dalam adit, sa-ai gam haong dom adei sa-ai ayut cuai sahabat mai tal darak taptaom ini, gam mbang dom kaya kan bangi di palei drei, gam yau hadar labik darak pasar meng kal daok sit taphia tapen mblang apuh hamu hijao jangaih.

Oh hu ralo tukvak tame bruk ngak, nyaom darak patom Xóm Rấy brei mboh prein khang dui pachreih tuk ba mai jien mek tame lagaih jang 1,2 ty dong. Lek taka ini lac brei mboh ka bruk salih drei njauk lagaih di bruk jirah rivang bhap bini.

Tui yaok pluh baoh sang urang ngak nong di ini, darak pasar pataom peih tabiak sa “hala pabah mbang” jien mek tame bahrau. Langiu di jalval kayua bruk hamu apuh, urak ini dom urang nan jeng dom “urang lambaok brei ka bruk ngak jirah rivang”. Bruk pandar kaya nong ta-eng hu piah ngak kaya saong pablei salih di nyaom darak oh lac daong patagok yaom kaom ndap nda blaoh daok brei bruk ngak tni tanat ka urang ngak bruk di bhum palei, abih di nyu dalam nan lac hu urang kamei saong urang praong thun.

Di kreih darak pasar bhum palei, sap ragam ragu don ca tai tu sameng tagok bangi pang, siam gheih yau talei pambuak binguk yava urang pablei salih  saong urang blei. Bruk nyaom pataom darak pasar di bhum palei Xóm Rẫy daok dak harei dak brei mboh praong angan makna dalam bruk khik ramik ilamo saong jhul tagok ngak mbang blei salih kinh te palei pala.

Bruk patagok darak pasar bhum palei gam haong ngak jirah rivang sinh thai oh lac daong urang ngak nong samar drah tani tanat raidiuk blaoh daok pamaong tal bruk patagok karo kajap. Kaya ndap nda urang ngak nong oh daok “ndih cang” urang ikak kaiy mai blei blaoh ta-eng drei “pablei” tal tangin urang blei pandar tapa dom jirah rivang biak chreih takre.

Gam haong sa hatai di karja saong rahra, nyaom darak pasar patom Xóm Rẫy pagun sanya daok uak drei tabiak suai atah jang, jeng sa labik mai oh meda klak tapa di angaok harak jalan palei jirah rivang Đất Sen Hồng, labik yaok baoh cambuai klao sambai di urang ngak nong thei thei jeng chreih chrai je hatai ka sa harei hadei meng anak ginup meda./.