Labaih kurang meteh bilan blaoh di ini, labik bein di baoh sang ong Trần Văn Lộc (daok di khu pho Cây Da, Phuong Bình Lộc) tuk halei jeng mboh sameng jang dut haong bhian harei dahlau. Ong Lôc saong dom anek bik gam haong gauk ramik mblang khik radaih, sangka bangu, pasiam pakajap dom baoh sang tadai tuan… piah srap gap raok tuai damuai tame bilan phun mbang baoh jaik tal. Di thun 76, ong Lộc jeng sami samar, hu mbaok ba rup tame rilo banah bruk ngak hu makna dalam bruk jirah rivang sinh thai blaoh baoh sang ini buh prein tame padang.

Labaih 8 thun dahlau, tuk bruk ngak jirah rivang bein baoh karaoh kayau patau hu ramik ngak di palei, ong mboh bruk ini lac hu  kein lagaih brei ka drei. Meng bruk likau ngak di sa labik jirah rivang akaok meti di bhum palei piah bac tangi, blaoh ta-eng duah thau tapa harak mbao, ti vi, internet, gaok mai trun bhum Pei negar rivang jirah iek dom bruk ngak jak jeng. Urak ini, labik bein di ong jeng sa labik jirah randap haong dom tuai damuai atah jaik. Jien mek tame di baoh sang hu parilo tantu cambaih laih, raidiuk tani tanat jang. Njauk ndom mayai dalam nan hu lac, bruk ini daok brei bruk ngak ka rilo urang daok di bhum palei.

 Meyah yau ye ong Lộc lac brei mboh ka bruk salih drei di rahra urang ngak nong ralo umo ye sa-ai Hà Anh Thùy (urang hu umo 34 thun, daok di Phuong Bảo Vinh) brei mboh ka rairah likei dam khin sahaneng, khin ngak di jalan peih mbang ngui tui rup drei. Thun 2019, sa-ai Thùy tame bruk pasiam bein praong 1.500m² piah pala tamekai, tamun ia tui jalan sro tagok rajam.

Meng kham merat pandar ilamo – ky thuat jamraik bahrau, bruk pala tamekai sa-ai samar drah brei siam lagaih ka bruk ngak mbang blei salih. Oh padeih di bruk pablei kaya kan ngak nong, thun 2021, sa-ai salih tapa pambuak ngak jirah rivang bein. Bruk gheih karei daok hu lac tuai mai iek ma-in jirah bein oh blei harak ve tame. Dom urang nan hu rivang me-in tui hatai, cuak thaik mek binguk, pang yaih khan bruk ngak hacih sa-at, paik tamun saong mbang di dalam bein. Bruk ngak ini brei samar drah dui pachreih rilo tuai damuai jirah rivang, abih di nyu nan lac dom baoh sang saong kapul dam dara. Piah duh tuai damuai tani tanat, sa-ai Thùy pandar jalan pala tablak, khik kajap tuk halei jeng hu baoh piah paik luac thun.

Ong Nguyễn Đức Toàn, daok di palei Cây Sung (xa Trị An), ba hatai kaoh klak dom phun pa-aok taha, buh jien tame yaok rituh trieu ndong padang sang halam nyuel praong 2.500m² piah pala baoh madan Thai tui jalan huu co.

Tuk bein madan brei baoh tani tanat, siam, tuai damuai duah mai dak harei dak rilo. Mboh hu kein lagaih, ong patui peih praong tapa ngak jirah rivang sinh thai bein saong khik tani tanat labaih 2 thun ini. Tuai damuai mai tal ini oh lac sa janih jirah rivang blaoh daok hu tapak drei paik baoh madan, mbang tapak di dalam bein saong blei ba mai sang ngak ndap nda kaya hadiah alin.

Meng dom kadha tantu yau ye ong Lộc, sa-ai Thùy atau ong Toàn meda hu mboh lac, bruk jirah rivang bein apuh daok peih tabiak jalan patagok bahrau ka gah ngak nong di Dong Nai.

Oh lac ba mai kein lagaih brei ka bruk ngak mbang blei salih, bruk ini daok daong khik ramik thaik thaok palei pala, paglaong ilamo pacang khik alam langik tasik. Tuk ngak jirah rivang rahra sangka iek praong jang tal bruk sangka bein, ngak jeng labik hijao – hacih – gheih ghang jang.

Gam tui bruk hadah krah di urang ngak nong gam haong kein lagaih hu dahlau, jirah rivang bein apuh patau kayau baoh karaoh hu caong takre brei patagok khang dalam tukvak mai meng anak tal. Meng dom labik bein hu rilo baoh, bangu that hu rilo thaik gheih, langik hacih hijao daok peih tabiak sa jalan nao bahrau hu rilo caong takre, oh lac daong urang ngak nong ngak meda kaya blaoh daok ba thaik Dong Nai nao tal jaik jang haong tuai damuai atah jaik mai./.