Di xa Xuân Lộc, tinh Dong Nai, mikva urang bangsa Chơ Ro rilo daok di puk Trung Sơn, ngan haong labaih 60 baoh sang. Rah tapa rilo thun pagam haong bruk hamu apuh, mikva di ini hu palih ruah bruk pala bangu duh ka dom bingu raya, Tet lac bruk hu ngak rilo abih. Yaok mbang bal Pataih mai, dalam xa yau ye cuk tame rup sa blah ao bahrau hu rilo sambo kanyik, bhong maraih, ingu di dom janih bangu daok tame tukvak rak chroh gheih di abih.

Thau ka bruk ngak mbang di bhum palei, yaok thun, Jabat Meyao meyit Gilang pariak tui Sarak rahra Xuân Lộc tuk halei jeng caik dahlau bruk caga phun jien brei mesraiy pabak hatai caong pala drak di mikva. Kuhria rah tapa yaok thun, labik buh jien tame labaih 3 ty dong ka mikva bangsa Chơ Ro di puk Trung Sơn mesraiy jien piah patagok bruk pala bangu duh ka dom harei raya, Tet. Phun jien brei mesraiy hu pandar dil samu, njauk menuac urang, tapa dom Kapul patak pataom saong mesraiy phun jien, brei kein lagaih piah rahra srap gap peih praong bruk ngak mbang.

Baoh sang amuk Kiều Thị Nhung lac sa dalam dom baoh sang naih gheih. Pagam haong bruk pala bangu rilo thun. Amuk Nhung brei thau: “Dom thun jaik ini, jien mesraiy hu brei tagok jien njauk jang haong hatai caong. Urak ini baoh sang dahlak hulin daok mesraiy 100 trieu dong meng danak dak brei mesraiy daong bruk, khik tani tanat saong peih praong bruk ngak. Meng nan, khol dahlak khang hatai pabak pajaih bahrau, peih praong taneh pala. Jien mek tame tani tanat jang, raidiuk jeng takik gaok kan kandah”.

Oh tok lac sa baoh sang amuk Nhung, rilo baoh sang dalam puk palei hu pandar siam lagaih phun jien mesraiy tui sarak piah pasiam taneh, pagam majam tuh pruh ia sangka bangu bahrau. Meng hu taneh lagaih saong ilamo pala mek hju tapa rilo rai rah, bangu di puk Trung Sơn dak harei dak hu asar siam, thaik thaot gheih, pabak hatai caong di darak pasar.

Amuk Lương Thái Troàn – Akaok kapul patak pataom saong mesraiy phun jien brei thau, yaok mbang Tet Nguyen dan lac bilan pataom pala rilo di abih, ba mai jien mek tame sa thun ka mikva. “Mikva bangsa Chơ Ro di ini duh ngak, ciuk rambah. Tuk hu Karja daong brei mesraiy phun jien laba lap, thei thei jeng thau pandar siam lagaih, bayar jien njauk harei. Meng nan, raidiuk dak harei dak paglaong tagok, an ninh siam mekre saong bruk gul pataom dalam bhap bini jeng hu pasiam”.

Siam lagaih brei ka bruk ngak mbang mai meng bruk pala bangu daong hu makna tame bruk patrun kathaot, parilo jien mek tame ka baoh sang urang bangsa takik. Hu makna jang, phun jien brei mesraiy hu salih jalan ngak mbang di rahra, daong mikva khang hatai buh jien tame, srap gap uak drei tagok salih ka bruk caong maong, oh caik hatai gam pambak di urang.

Tui urang ngak praong di Jabat Meyao meyit HGilang pariak tui Sarak rahra Xuân Lộc, dalam thun 2026 saong dom thun patui veik, labik brei patui veik jhul khang bruk brei phun jien meng danak dak brei mesraiy piah brei bruk ngak, daong bruk ngak mbang, brei kein lagaih piah ka mikva urang bangsa Chơ Ro khik tani tanat saong peih praong bruk pala bangu. Gam haong nan, brei pataom tame paglaong asar siam bruk pasang iek phun jien, khik kajap phun jien patagok siam lagaih karo kajap.

Meng dom talei bangu rilo sambo bar di puk Trung Sơn, meda mboh tantu bruk lagaih di jien brei mesraiy tui sarak dalam bruk daong mikva urang bangsa takik patagok bruk ngak mbang, tani tanat raidiuk. Tuk bal pataih mai, sambo bangu rak choh gheih ghang oh lac brei mboh ka sa thun bahrau salamat blaoh daok brei mboh ka bruk salih bahrau yaok harei di bangsa Chơ Ro – labik phun jien brei mesraiy daok daong prein ka dom bal Pataih trei sir, ginup bak./.