Meng thun 1990 tal thun 1999 di abap dahlau, urang ngak nong huyen Tân Phước, (tinh Tien Giang klak) jeng hu ngak iek haong rilo janih phun mbang baoh, kayua lac bhum taneh njom ia lakhun nan hu janih phun menah meng lagaih haong taneh di labik ini.

Sa-ai Lương Văn Hiền, xa Tân Phước 3, tinh Dong Thap brei thau, hadei rilo mbang pala iek, sa-ai mboh lagaih haong phun menah ini, kayua ciuk lakhun siam, mbuan pala saong brei jien mek tame tani tanat. Meng pajaih menah Queen di bhum taneh, s-aai Hiền hu ba drei tame dom mbang bac megru mek ilamo, pala pajaih menah MD2 tui jalan ngak tani tanat, hu pambuak saong hu pablei abih ka akaok tabiak. Sa-ai Lương Văn Hiền ndom meyai lac.

“Pala biak mbuan, kayua drei hu HTX brei phun pajaih paje, nan drei brei katung talei blaoh drei pala trun, blaoh tuh ia. Yaom blei abih lac 9 ribau sa kilo lac drei hu laba paje. Mbang pala meng blaoh, 1 mẫu taneh ini mek hu 90 trieu, mbang hadei mek hu labaih 58 trieu. Meng ini lac jeng hu ginup piah diuk rai”.

HTX Ngak nong Quyết Thắng, nao dahlau di bhum Tân Phước brei ka bruk patagok pajaih menah MD2, phun pala hu rilo lagaih yau ye baoh praong, takik xơ jang dut saong pajaih dahlau, rilo baoh saong tukvak pasang iek atah, njauk haong pablei tabiak. HTX hu peih praong taneh pala menah tagok haong bhum pala pablei tabiak langiu negar labaih 100ha. Tuk bhum pla ginup kein lagaih, HTX peih bruk mek baoh menah piah roh duah, njauk tanut ka meng mbaoh tangin pambuak bruk, paik baoh, ngak ka lagaih blaoh pablei tabiak langiu negar.

Daok HTX Ngak nong Ilamo Kong nghe glaong Kim Phát ye pataom tame roh duah, pala saong pabak phun pajaih meng kong nghe tam mo, dalam nan njauk ndom mayai lac abih di nyu nan lac pajaih menah MD2 hacih ruak, cak rok khang saong brei baoh samu gauk, mek hu tanut njauk pablei tabiak. Pajaih menah tam mo daong paglaong baoh menah saong daong urang ngak nong salih jalan sahaneng dalam bruk pala drak, meng bruk ngak sit tapa ngak tui tanut chuan ky thuat glaong. Sa-ai kamei Bùi Thị Kinh Thanh, Yam ndok HTX Ngak nong ilamo kong nghe glaong Kim Phát brei thau.

“Biak nao lac tapa rilo mbang pala, payua kaya ka mikva piah taong yaom, di phun menah tam mo saong phun taduk amaik. Phun tam mo, ka sa lac nyu cakrok khang, hacih ruak, samu gauk. Baoh njauk tanut chuan ye baoh praong jang taduk praong jang.  Mikva njauk je tame, daong prein, je tame phun tam mo, ngak jeng bein akaok meti hacih ruak. Meng nan mikva urang ngak nong njauk khang hatai lac calah taduk phun tam mo tabiak, pala veik dom mbang pla. Hacih ruak, cak rok siam, mek hu rilo dut haong phun calah sruh klak”.

Meng dom bruk nan, di Tân Phước harei ini, rilo labik ngak kaya hu padang angan je, ba ndap nda tagok dom nen tang lek taka so yau ye TikTok, Shopee, pablei hu ka tuai damuai sit thun umo saong darak pasar kaya alin. Sa-ai Lê Hữu Nghĩa, Labik ngak keo menah Tân Phước brei thau:

“Hu biak rilo labik ngak har keo menah. Daok gah dahlak hulin, buh jien tame gah kadung papaok rilo jang lac pataom tame kapul tuai damuai blei ngak kaya alin jang lac mbang me-in. Urak ini, adei pablei tani tanat lac gah darak praong COOP mart., yaok bilan nao hu dom tan. Thun 2026, khol dahlak kuhria tabiak dom kaya bahrau yau ye: ahaar menah, keo amil yau meng kal blaoh sah saradang tagok, daok roh duah piah thun hadei ba tabiak”.

Meng bhum taneh njom lakhun hu maong yau lac oh lagaih, urang ngak nong bhum pala menah Tân Phước hu ruah pasiam brei ka gah ngak nong meng kein lagaih dalam sa majam lagaih di langik tasik ia taneh menuac urang: Urang ngak nong sahang hatai ngak mbang, hop tac xa daong meng pajaih tal darak pasar, gah ngak mbang pablei salih peih praong bruk ngak kaya saong karja daong meng sarak. Nan lac gah ngak nong tui langik tasik, tui sarak, tui darak pasar./.