HTX Phi Liêng daok di palei Trung Tâm, xa Đam Rông 1, labik nao dahlau dalam bruk pandar ilamu - ky thuat tame bruk ngak mbang, padang bruk ngak mbang karo brei ka 40 baoh sang, daong brei ka labaih 150 urang ngak bruk, dalam nan ralo di abih ieu lac urang bangsa takik, gam tui duah jien hu meng 6 - 8 trieu dong/sa bilan.

Meng tuk barau padang, HTX brei mboh bruk pandar ilamu ngak kong pakat glaong tame bruk pala drak, brei ndap nda njauk yaom tanut, tui mayit mayao buh prein tame hadom jeng ye bruk blei abih ka urang. Ini lac jalan ngak nong kong nghe glaong mbang camreip di bhum palei.

Thun 2024, HTX Phi Liêng ngak tabiak labaih 1.500 tan kaya meng ngak nong, ba jien mai hu labaih 30 ty dong. Bilan 6/2022, HTX hu Brei angan saong Iek glang tui hukum saong taong yaom tu FAO brei harak njauk lagaih. Yaom hu HTX ganap brei ka njauk tui hatai di darak pasar raya.

Sa-ai Phí Văn Thìn, akaok kapul HTX, brei thau: “Khol akau pala amriak chuong, tamun ia, traong nde tui tanut VietGAP, gam tui 8 ha phun pala hu harak brei angan. Ndap nda kaya ngak tabiak hu brei papaok, mbat tem brei thau asal gok di nyu.

Dalam nan, 4.500 m² taneh pala ngak tui jalan ngak kong cam bien, iek glang meng jamraik phan mem, daong patakik hu prein manuac jeng ye jien buh tame yau meng dahlau. Dom taneh pambuak ngak song rah ra bhap bini jeng hu brei khik ilamu - ky thuat piah brei ka nyu siam gheih yau gauk”.

HTX daok salih tapa ngak tui jalan huu co, pambuak bruk saong Kongti Dalat Hasfarm palao 6 janih thiên địch tame bein amriak chuong piah iek glang brei ka halak haling, patakik pandar jru caga phun kayau. Sa-ai Thìn brei thau lac: “Bruk salih hatai bhian pandar jru tapa pandar thiên địch ngak ka urang ngak nong daok duh hatai. Min ini lac sa jalan siam karo ka harei hadei di HTX”.

Yaok thun, HTX Phi Liêng peih dom tal bac pato, jao ba ilamu ky thuat ngak mbang brei ka urang ngak nong dân di bhum palei. Kuhria mbiah tal ini, HTX peih hu 9 tal bac gam song labaih 350 mbang urang tame magru.

Ong Phan Văn Đáng, Phaok Akaok UB Bhap bini xa Đam Rông 1, mboh lac: “HTX Phi Liêng ieu lac sa labik nao dahlau dalam bruk ngak nong công nghệ glaong di xa. Bruk ngak hu ba tagok karo brei ka HTX jeng ye ka urang baoh sang ngak nông pambuak saong gauk, gam ba jalan dak tuk dak patagok barau brei ka ngak nong kong nghe glaong di palei. Ini lac yau ye baoh kreih camin hadah brei ka urang pasang salih akaok tame bruk ngak mbang, kajap hatai salih tame jalan pala drak jak jeng jang”.

Ong jeng brei thau, karja palei jeng daok daong urang ngak mbang pandar kong nghe glaong, pachreih pambak praong bruk ngak mbang patagok kinh te yau ye HTX Phi Liêng./.