Dom harei ini, HTX lan am Hamu Craok, xa Ninh Phuoc, tinh Khanh Hoa (dahlau diah ieu lac ban sit Phước Dân, huyen Ninh Phước, Ninh Thuận) daok chreih chrai yam tame bilan tabung glaong srap gap ndap nda darak pasar Tet Nguyen dan nethak Asaih Waw 2026 jaik tal.

Hatai takre di khol dahlak tuk mai rivang HTX Lan am Cam Hamu Craok lac bruk ngak mbang rah tabiak chreih chrai di sang parang lan kayua Karja buh jien tame padang, salah blaoh meng kreh thun 2008 hu taneh pandar 600 m2. Mban Yam ndok HTX taduan pasang iek pandar siam labaih Sang parang duh ka bruk ngak mbang – pablei salih, dui pachreih rilo tuai damuai mai rivang me-in, ba drei tame ngak lan Can. Sang parang lan Cam Hamu Craok lac “gilang drap ar diuk”, pagam kreh di parang yaok ribau ndap nda lan saong nghe nhan ngak lan Cam, hu tuai damuai chreih takre, meyaom.

Dom nghe nhan naih gheih di HTX Lan Cam Hamu Craok paglaong majam yaom kaom ka ndap nda meng bruk hadah krah yaok ribau baoh lan ngak gheih mekre tui hatai caong di tuai damuai. Urak ini, ndap nda lan Cam ngak gheih mekre hu thaik thaot, bingu la biak gheih yau bimong Cam, rup patau yang, kalaok klauk bangu, kalaok I, gom ngak gheih mekre, dom janih athur… Ndap nda lan am Cam lac bruk seni ilamo nghe thuat glaong, oh di halei hu, hu pandar dalam bruk ngak gheih mekre dalam sang, hotel, tadai kuan, resort glaong pakat. Lan ngak gheih mekre Hamu Craok harei ini hu mbaok di rilo darak pasar dalam negar saong di rilo negar dalam dunya…

Palei lan Hamu Craok dui pachreih rilo tuai damuai di dalam saong langiu negar mai rivang jirah me-in, blei kaya ndap nda. Abih di nyu nan lac, meng tuk Seni ngak lan am di urang Cam hu UNESCO tame harak brei angan “Drap ar ilamo oh mboh di meta brei pacang khik samar chip”, palei Hamu Craok jeng sa labik mai rivang me-in, ba drei tame, blei pandar ndap nda lan di tuai damuai dalam saong langiu negar. Meng nan, ndap nda lan Cam hu pablei rilo, parilo jien mek tame ka dom baoh sang dalam HTX.

HTX Lan Cam am Hamu Craok jeng hu buh jien tame padang labik am lan “kandauk angin” pandar njuh khik kajap asar siam kaya, patakik jien buh tabiak ka janih piah am saong prein ngak, paglaong majam yaom kaom ndap nda.

Dom urang dalam HTX tuk halei jeng gul pataom pakacah gauk ngak rilo ndap nda gheih ghang, hu rilo thaik thaot, pabak siam hatai caong pablei di darak pasar dalam saong langiu negar. Pagam saong patagok ndap nda siam glaong haong janih jirah rivang palei ngak lan Cam Hamu Craok tui tour rivang me-in labik rahra, ba drei tame ngak kaya lan, rivang danaok duh paling Po Klaong Can, mbang kaya mbang saong danak dak adaoh tamia siam gheih di urang Cam palei Hamu Craok, parilo jien mek tame, daong rahra khik kajap raidiuk trei sir…/.