Thun 2025, taneh pala phun kong nghiep hu pala rilo di tinh Dong Nai mek hu labaih 500 ribau hecta. Jalan ngak ba tabiak tal thun 2030, taong abih taneh dom phun kong nghiep trun tok daok labaih 426 ribau hecta. Yaom lac taneh pala phun hu patrun min dom phun pala rilo di tinh jeng daok tagok atau patrun takik meng pandar pajaih bahrau, ilamo khoa hoc – ky thuat tame ngak mbang piah patagok phun pala.

Jalan sahaneng patagok phun kong nghiep hu pala rilo di tinh di bruk patagok kein lagaih di dom bhum sinh thai, paglaong asar siam, mbuan meraik gauk di ndap nda, pacang khik alam langik sinh thai pagam haong randap lagaih haong bruk langik salih karei.

Rilo thun danak, yaom lac rah tapa dom tukvak phun amraik kalu saong kophi patrun yaom khang, ong Phạm Xuân Hoàn, urang ngak nong di xa Lâm San jeng daok pala 2 janih phun ini. Min, ong bahrau pala bahrau veik taneh phun kophi. Ong Phạm Xuân Hoàn pagap: Urak ini, kophi pajaih bahrau oh tok lac brei paik baoh samar bo paik hu jeng biak rilo jang dut haong dom pajaih kophi klak. Langiu di nan, pajaih bahrau daok hu dom bruk naih gheih pacang cakak halak haling jeng yau lagaih siam haong bruk langik salih karei dak harei dak srau kadau. Langiu di pandar pajaih bahrau saong ilamo khoa hoc – ky thuat tame pala drak, urang ngak nong pala amraik kalu, kophi daok salih tapa jalan huu co piah phun pala patagok karo kajap, dak rilo thun bruk paik hu dak rilo jang ngan haong asar siam mek hu tanut pablei tabiak dalam dom darak pasar kan daman abih.

Lac labik “ban ine” pa-aok blait di dalam negar, jalan ngak hu makna tinh ba tabiak tal thun 2030 ngan haong phun pala ini lac taong abih 100% labik ngak kaya asar pa-aok blait ta-eng ngak bruk neh rabha calah kanduh asar pa-aok blait; labaih 95% labik ngak kaya asar pa-aok blait brei ngak saong mek hu harak brei adat, khik tani tanat majam pasang iek asar siam tui tanut dalam negar saong dunya. Langiu di nan, tinh brei patui veik dui pachreih buh jien tame salih bahrau ndap nda kaya, ilamo kong nghe ngak kaya, paglaong majam yaom kaom; parilo dom ndap nda ngak meng phun pa-aok blait. Ngan haong phun kophi, tinh pachreih buh jien tame dom sang mac jamraik pandar ilamo kong nghe bahrau, ngak kaya kophi hân chai saong kophi halai.

Ini jeng lac asal kadha rilo bhum palei daok ngak tantu dalam bruk peih jalan ngak tame ngak. Ong Nguyễn Đại Thắng, Phaok Bi thu Ndang uy, Akaok UB Bhap bini xa Cẩm Mỹ brei thau: Dalam xa urak ini daok 600ha phun pa-aok blait daok brei paik baoh ngan haong hu taong abih jaik 200 ribau tan. Dalam nan, bhum xa hu gah ngak mbang pablei salih buh jien tame ngak dalam, rilo ndap nda saong hu ndap nda mek hu tanut OCOP 4 patuk. Ndap nda asar pa-aok blait di bhum palei ba drei tame siam darak pasar pablei tabiak langiu negar jeng yau dom labik meyao meyit thuong mai ndien tu. Jalan ngak di bhum palei lac patui veik khik tani tanat dom kapul pambuak bruk, hop tac xa, ngak jeng majam pambuak meng pala tal pataom blei, ngak kaya piah oh padeih paglaong yaom kaom paglaong ka ndap nda hu angan di bhum palei.

Ong Hoàng Chuẩn, Yam ndok Kongti TNHH Asar pa-aok blait Hoàng Phú, xa Lộc Tấn brei thau: Meng taneh saong langik karei, asar pa-aok blait tinh Binh Phuoc (dahlau diah) hu asar siam pahe bangi dang akaok dunya. Meng biak samar, asar pa-aok blait Binh Phuoc hu pabak tacei ba taneh riya, brei mboh ini lac angan je asar pa-aok blait siam glaong. Kayua nan, gah ngak mbang pablei salih ruah buh tame ngak kaya tui jalan hana meng tangin ngan haong caong khin padang angan je ka ndap nda bhum palei. Taphia nan, gah ngak mbang pablei salih jeng caong khin masraiy hu phun jien laba lap piah khik kajap gah pabak pandap tamo ka bruk ngak kaya luac thun. Langiu di nan, gah ngak mbang pablei salih tinh daok hu dom sarak caik dahlau piah khik saong peih praong taneh pala phun pa-aok blait pagam haong patagok bruk ngak kaya kayua urak ini gah ngak kaya jeng daok patui tame gah pabak pandap tamo blei tame./.