Thun 2025, taong abih dom kaya ikan dalam ia di An Giang hu labaih 1,6 trieu tan, dalam nan raong labaih 1 trieu tan, daok hu lac ikan kaya dalam ia brei taong mek. Dalam tukvak mai meng anak tal, An Giang brei mboh trun jang bruk taong mek, pataom tame patagok raong ikan hadang. Daok ikan pra thun 2025 hu labaih 640.000 tan. Jalan ngak di thun 2026 hu kuhria tagok labaih 670.000 tan, lagaih haong jalan cakrok patagok hu kuhria padang.

Ong Trần Thanh Hiệp, Phaok Yam ndok So Ngak nong saong Alam langik tinh An Giang brei thau, tinh brei pambuak, daong gah ngak mbang pablei salih dalam bruk patagok bhum raong ikan ỏa, pagam haomng bruk pasang iek siam ka kein lagaih raong ikan saong salamat kaya mbang tui tanut chuan. Gam haong nan peih praong labik mbaoh tangin, brei harak adat tui dom darak pasar praong, abih di nyu nan lac darak pasar Hoa Kỳ, piah brei kein lagaih ka rilo gah ngak mbang pablei salih ikan pra ba drei tame pablei tabiak. Taphia nan padang veik gah raong ikan pra tui jalan siam lagaih, karo kajap saong pagam haong palei salih di darak pasar.

"Urak ini dahlak sahaneng lac dom gah ngak mbang pablei salih oh lac nao tui sa harak brei adat blaoh njauk brei nao tui rilo harak brei adat. Yau nan ye dahlak sahaneng lac tui gah kapul pambuak atau dom labik nan lac gah Mentri jeng cih tabiak jalan piah ka dom gah ngak mbang pablei salih hu rilo harak brei adat piah brei tame dom darak pasar nyu lagaih jang."

Amuk Nguyễn Thị Băng Tâm, Jabat kaya Ikan saong pasang iek kaya ikan dalam ia saong Pasang iek ikan hadang, Mentri Ngak nong saong Alam langik ndom khang lac, thun 2026 gah ikan pra brei sangka iek praong bruk srap gap raok kapul urang pasang iek tantu ka kein lagaih ha tang, harak gal ka hukum saong pabak ginup dom adat bahrau, piah khik kajap tani tanat darak pasar pablei tabiak hu makna saong patagok karo kajap gah ikan pra di nagar Viet Nam.

"Piah gah ikan pra patagok dalam tukvak 2026 – 2030 mek hu njauk kuhria blaoh ba tabiak di Sarak 985 ye biak khin hu bruk daong di gah ngak mbang pablei salih saong di Karja, abih di nyu nan lac gah Karja piah daong ka gah kaya patui veik khik tani tanat bruk cakrok karo kajap. Saong hu lime jalan ba tabiak dalam dalam tukvak jaik tal lac patagok saong ba tabiak asar siam saong angan je nan ngak sa bruk hu makna piah patagok dalam tukvak ini jeng yau lac pajaih hu maong lac sa bruk hu makna piah cakrok patagok ka gah ndap nda saong pasiam labik raong ikan."

Thu truong Padana Mentri Ngak nong saong Alam langik tasik angan Phùng Đức Tiến hu taong yaom lac, pablei tabiak langiu negar gah kaya ikan dalam ia, dalam nan hu ikan pra, jeng daok “vil taom dar” dalam sa tanut cakrok bhian, oh ka ngak hu bruk patagok samar njauk haong kein lagaih daok hu. Dalam tuk nan, dom caong khin pandar meng darak pasar dak harei dak catang ka jien kak je, salih hijao, salih lek taka so, VietGAP, duah thau ka labik raong, salamat kaya mbang. Biak nao brei mboh bruk raong ikan jeng daok oh ka lagaih, daok sit sot, pasang iek prein pacang ruak, jit ruak oh ka karo kajap, mbuan rah tabiak kan kandah ka prein yava bhap bini saong angan je gah ndap nda.

"Dahlak hulin ndom khang ka tukvak 2026 – 2030 dang anak dom kan kandah biak praong ngan haong hatai caong biak catang di dom darak pasar, drei njauk hu sa nen tang pasiam veik ye brei roh duah piah khol drei hu jalan langyah ka meng ngak lagaih hu. Khol dahlak sanya lac brei jum tangin gam haong Jabat haong dom gah ngak mbang pablei salih piah khol drei hu bruk salih lagaih jang, hu makna jang, bahrau jang."

Thun 2026 gah raong pablei ikan pra dang anak bruk pandar salih rah rah ka ilamo parilo ikan tapa ilamo ka yaom kaom, siam lagaih saong karo kajap. Langyah bruk gar tavak ka drei pajaih, padang bruk raong ikan tui majam di nyu, paglaong pasiam ralo, takik tathuak nerak saong ngak lagaih haong dom tanut chuan pakat dunya oh lac kein lagaih piah khik kajap dom darak pasar pablei tabiak langiu negar, blaoh daok lac kein lagaih piah gah raong pablei ikan pra Viet Nam uak drei tagok, brei mboh labik dang di drei angaok hala labik gah kaya ikan dalam ia di luruh dunya./.