Tay Ninh ba darak pasar praong oh mek jien je di Labik kinh te pabah mbang negar Mộc Bài hu peih ngak gilac hadei di dom tukvak kareik padeih bruk. Bruk peih ngak gilac di darak pasar praong labik tapen negar haong Campuchia hu makna truh tapa atah sa labik pablei lẻ ngan haong labaih 2 trieu mbang urang tame tabiak negar yaok thun. Ini lac bruk hu makna dalam jalan ngak pamedeih kein lagaih kinh te tapen negar, brei daong prein pachreih bahrau ka bruk pablei salih – jitvu, tapa nan paglaong labik dang di Tay Ninh dalam bhum Pur Maraong Negar Dong Nam Bo.

Amuk Châu Thị Lệ, Phaok Yam ndok So Kong thuong Tay Ninh brei thau, tinh daok salih drei meng bruk bhum salih veik tapa labik mai di phun jien saong urang ngak bruk hu ilamo:

"Pagam haong salih bruk cakrok patagok saong ngak gilac veik gah ngak kong – pablei salih tui jalan bahrau, hacih hijao saong karo kajap, So Kong thuong tay Ninh brei nyaom biai haong UB Bhap bini tinh cơ chế patagok samar ka bruk patagok jitvu logistics saong pablei salih ndien tu. Hu makna lac padang danak dak patagok angan je kaya Tay Ninh, peih jalan ngak pablei salih ndien tu tukvak 2026–2030, pambuak bruk pachreih gah ngak nong, jhul tagok bruk pablei salih, paglaong bruk pambuak pakat dunya piah daong gah ngak mbang pablei salih peih praong darak pasar".

Maong yaom di gah jien padai, ong Trần Văn Tươi, Phaok Yam ndok So Jien padai tay Ninh taong yaom lac: Tanut cakrok tagok 9,52% min oh ka mek hu dua lek taka min lac “mức nền” biak glaong dalam bruk kan kandah. Hu makna jang, asar siam cakrok patagok hu pasiam tuk klau labik kinh te jeng rik daong samu gauk.

Pamaong yam tal jalan patagok 10 – 10,5% dalam thun 2026, ong Tươi ndom lac ini lac kan kandah min biak lagaih. Tay Ninh brei mboh kadung jien karja ngak bruk phun jien “pacuh” piah dui ba buh jien tame, caik dahlau ka ha tang jalan mbak saong logistics piah palagaih jalan nduac di ndap nda kaya:

"Langiu di nan, tinh daok sangka iek praong peih Sarak ka 57-NQ/TW di Mentri Politit ka bruk cakrok samar bruk patagok ilamo khoa hoc, kong nghe, salih hadah krah saong salih lek taka so, ngan haong phun jien yaok ribau ty dong ka tukvak anak tal. Halau prein ini pataom tame ka bruk salih bahrau pakat karja, jalan mbak hadah krah, gam haong nan brei kein lagaih dui pachreih dom gah bahrau yau kaya par saong gah ngak kong bán dẫn; taphia haong pato pakai, paglaong ilamo manuac urang ngak bruk".

Meta maong atah ka harei hadei di Tay Ninh hu brei mboh khang di Nyaom roya Ndang bo tinh tukvak 2025-2030. Bi thu Tinh uy Nguyễn Văn Quyết ndom khang lac: Ngan haong rahra jaik 3,3 trieu urang gam haong prein ngak rilo, tỉnh hu rilo kein lagaih piah patagok samar. Piah ngak hu caong takre ini, tinh pataom tame 3 bruk patagok samar, 11 danak dak hu makna saong 6 kapul jalan langyah praong; dalam nan brei caik ngak dahlau rilo abih ka jalan mbak pambuak bhum saong ngak gilac veik kinh te tui jalan ilamo kong nghe glaong. Bi thu Tinh uy Tay Ninh ong Nguyễn Văn Quyết ndom meyai lac:

"Tay Ninh brei mboh jalan ngak dalam tukvak anak daok mai tal lac patagok samar, khang, lagaih saong karo kajap. Kham merat lac tinh ndih dalam 10 tinh patagok abih dalam negar. Dom jalan kuhria, tanut ba tabiak, bruk ngak saong jalan langyah bo tinh hu ba tabiak hu lagaih ka tukvak 2025–2030, abih di nyu nan lac ndom khang ka bruk ngak, jalan langyah cakrok tagok samar pagam haong meta maong ka patagok di harei hadei".

Gam tui takai yam nao meng akaok tukvak, Tay Ninh daok srap gap ka sa dom cakrok tagok bahrau, rik daong siam lagaih ka bruk cakrok patagok di taneh ia.