Dalam tinh Tay Ninh urak ini hu 17 suku bangsa takik, daok di 18 palei, khu pho bhum urang bangsa takik saong dom xa khu vuc 1 bhum urang bangsa takik saong bhum ceik.

Dom thun tapa, rai diuk di bhap bani urang suku bangsa takik hu mboh grap tanat jang. Bruk ngak prong di dom sarak, danak dak, dalam Danak dak pakat negar hu peih ngak samu gauk, daong ka bruk ngak nong, raong glang, pala drak cak rok patagok tui jalan khang kajap. Bruk mong iek tal rai diuk ndap nda, glo akaok jeng hu iek prong; dom harei roya, Tet meng kan hu peih ngak dalam siam mekre, patak pataom; puk paga palei negar hu khik kajap salamat.

Urak ini hu 910 anek saih urang bangsa takik bac trung hoc pho thong saong 23 anek saih, sinh vien urang bangsa takik daok tui bac di dom labik pato bruk ngak saong Sang bac Cao ndang Su pham. Ini hu mong yau sa pren ngak ranaih biak prong brei ka bruk cak rok patagok suai lavik di tinh.

Jalan ngak di tinh nan lac jhul patagok bruk ngak dak padang mbang angui dam dara urang bangsa takik mai meng dom hagait rah tabiak di anak meta nan lac daok pablak gauk, ilamu oh hu samu gauk, bruk ngak mbang pala drak daok sit sot. Tui di nan, jalan ngak prong nan lac dak padang mbang angui di labik, dak padang mbang angui meng bruk ngak meng kan; brei ngak dahlau bruk ngak mbang sit saog mbiah, mbuan si peih ngak, khut khat biar, meda ngak brei pambak prong; pambuak pagam haong danak dak akaok mbram pakat negar, OCOP, dak padang palei pala bahrau, panduan salih taka dalam bruk ngak nong saong cak rok patagok bruk rivang ma-in, grap tanat samu gauk, plaih leih ba atah, ngak tok thau ngak.

Tui ong Đoàn Trung Kiên, Phaok akaok UBND tinh Tay Ninh, tinh brei ngak dahlau bruk daong ka dam dara bangsa takik dak padang mbang angui dalam dom gah hu pren khang cambaih laih di puk palei, nan lac: Ngan tabiak, ngak kaya ngak nong biak karei di puk palei; raong glang tui baoh sang, meteh raong glang pambuak haong khik siam mekre sinh hoc; patagok ndap nda OCOP, bruk ngak meng tangin meng kan mai di bhap bani Khmer, Cam; rivang ma-in bhap bani, rivang ma-in ilamo – hatai jia pambuak pagam haong Ceik Muk Bà Đen, inem mek dak rai sajarah, harei roya bangsa; pablei salih sit, logistics kaya ngak nong saong bruk daong ba ngak mbang palei salih di palei pala, bhum tapen negar. Jalan ngak nan lac oh nduac tui bruk ngak kong nghe glaong srau dhau, bo pataom tame jalan ngak, pacang tapok, angan je saong jalan bruk pablei tabiak – laghaih haong ilamu, pren khang di dam dara urang bangsa takik.

Gam haong di nan, tinh peih ngak dom bruk pachreih dak padang mbang angui di bhap bani; dak padang saong pambak prong bruk dam dara urang bangsa takik dak padang mbang angui naih gheih ngak “asal pambak prong”. Pato tacei, pambak ba “pal tangin tacei bruk” pataom tame tukvak katut panak: dak padang bruk ngak mbang pablei salih mbuan mbiah; khik iek jien ndo, jien padai baoh sang pablei salih; ilamu pablei salih ndap nda tapak saong tui jalan online…

Langiu di nan, tinh jeng daong phun jien tui jalan ba-yar veik jien phun mesre sit, kein lagaih brei raba jien nyim masraiy, harak gar mbuan mbiah brei lagaih sanang; daong sa binah jien blei pajaih, ndap nda, jammariak mac mok; daong jien papaok, angan je, brei mek angan OCOP; pambuak pagam siam mekre dom phun jien mai meng Gilang pariak sarak karja saong Kadung jien negar ka bruk ngak, tapa nan daong plaih di tavak gauk nao mai, ba dui atah.  

Ngan haong jalan ngak siam gheih, biak haong dom hagait daok rah tabiak, bruk hadah krah dak padang mbang angui di dam dara urang bangsa takik di Tay Ninh meda hu jeng pren khang biak prong brei ka bruk cak rok patagok khang kajap di bhum palei./.