Di Đắk Lắk – labik pala rilo kophi dalam negar, rilo gah ngak mbang pablei salih daok srap gap pamedeih veik majam yaom kaom, buh jien tame ngak tani tanat meng bhum pandap tamo, ngak kaya dalam tal pablei salih pakat dunya. Ong Lê Đình Tư, Yam ndok Kongti TNHH MTV Aeroco brei thau, gah ngak mbang pablei salih saong roh duah – patagok ndap nda kaya, gam dui pachreih dom tour jirah rivang pakat dunya ba drei tame jalan ngak kaya ndap nda. Kaya meng labik camreip hu ba ba tagok dom blah web darak pasar online di banah glaong pakat saong dom mblang kapal ahaok par pakat dunya di Viet Nam, mek hu jien tame rilo. Ong Lê Đình Tư caong takre lac:

“Khol drei hu biak rilo kein lagaih piah patagok kophi Robusta di Dak Lak saong di Viet Nam. Dalam dom thun meng blaoh, ye Aeroco hu dom yai pakat dunya, mek hu dom jak jeng biak lagaih. Thun ini jeng brei kham merat rilo jang veik, brei ka ayut cuai dalam saong langiu negar thau tal rilo jang saong brei ngak marketing siam jang rilo.”

Ong Hoàng Danh Hữu, urang padang tabiak angan je Miss Êđê – gah ngak mbang pablei salih hu pablei tabiak kophi tapa Mỹ, Han Quoc, Singapore saong Nga – ndom lac, bruk thau tanat ka darak pasar glaong pakat saong hatai caong di dom urang ilamo dalam dunya lac sa anek kiar hu makna piah ka kophi hu angan di Viet Nam tabiak atah jang. Dalam thun 2026, gah ngak mbang brei patui veik tapa dom danak dak pambuak bruk pablei salih piah daong dom labik ngak nong pala kophi hu angan hu tame samar jang dalam darak pasar glaong pakat di Han Quoc:

 “Tuk thau ka dom darak pasar caong hagait, khol dahlak khan dom caong khin, tanut chuan nan tal dom gah ngak kaya, kapul saong gah ngak mbang pablei salih dalam negar, piah gam haong gauk ngak tabiak sa bruk pambuak, sa majam, daong ka dom labik ngak nong oh lac nao sa drei saong oh daok bruk tok nao kacah bo kurang akaok tabiak”.

Daong hu makna tame luac jalan brei mboh yaom kaom kophi Robusta hu angan, lac bruk dui ba di dom gah ngak mbang pablei salih pablei tabiak praong. Di Dak Lak, Kongti TNHH MTV Palei tabiak 2-9 Dak Lak, hu ba drei ngak dahlau bruk padang majam pabak kandauk, pasang iek asar siam, duah thau ka labik ngak, pambuak saong gam haong gauk suai atah gam haong daanak dak kophi hu angan. Ong Nguyễn Tiến Dũng, Phaok Tong Yam ndok kongti Simexco Đắk Lắk brei thau, gah ngak mbang pablei salih daong dom hop tac xa, baoh sang ngak nong saong daong dom mblang me-in njauk tanut di dunya haong caong khin rik daong ngak asar siam jeng yaom kaom pablei salih:

“Khol dahlak daok pambuak haong 50.000 baoh sang urang ngak nong Tay Nguyen piah ngak dom tanut chuan kophi karo kajap, Kayua caong khin ngak hu kophi bangi saong asar siam ye brei hu co so ha tang, pagap yau majam bambu hana thu ini, jamraik njauk hu piah ngak kaya kiphi hu angan jeng yau ngak kophi asar siam glaong, paglaong yaom kaom di asar kophi ye brei ba veik pasiam bruk daok dang mbang ngui ka urang ngak nong rilo jang.”

Ngan haong hatai je khang kadang tame asar siam kophi Dak Lak saong di Viet Nam, thun 2026 hu caong takre lac sa thun cakrok patagok di kophi Robusta hu angan, oh lac peih praong darak pasar pablei tabiak blaoh daok dak harei dak paglaong labik dang di kophi Viet Nam dalam harak angan di dunya, dalam bruk khang hatai, srap gap saong ndung bak caong takre ka jalan nao bahrau./.