Dalam dom harei ini bruk ngak di Pasak Duh bruk karja phuong Tân Lập, oh dreih yau bhian harei luac thun tapa. Di ini hu rilo ndap nda bahrau, mbuan mboh abih lac dua mac tinh nyu pabak ung dung tri tue nhan tao (AI) caik di pasak, daong rahra pasang duah, buh harak gar saong pasang iek tukvak ngak harak gar karja online.

Sa-ai Lê Thị Nguyên Hạnh, urang jakar buu ndien, brei thau yaok harei sa-ai daong meng 30 - 40 mbang urang pandar AI toàn trình:

“Drei brei tame phan mem AI, hadei nan rahra khin ngak harak gar halei ye tut angan tame mac tinh ye jalan ngak harak hu rah tabiak. Pagap yau sa-ai ini khin ngak harak gar tut angan salih asal kadha pablei salih ye phan mem di AI brei ba tabiak hadom jalan piah pandar dom harak gar karja njauk ngak, hadei nan tacei ba ka rahra piah rahra caga harak gar njauk hu, hadei nan drei tacei ba ka rahra piah rahra scan harak gar blaoh pabak tui online piah patakik harak gar karja ka urang jakar langyah di dalam.”

Peih ngak AI tame bruk ngak harak gar karja, phuong Tân Lập pandar dua ung dung, di Viettel saong VNPT. Sa ung dung daong urang jakar ngak bruk pasang duah khau tin harak gar samar drah; ung dung daok pataom tame bruk daong rahra pandar jitvu karja online. Meng harei 1/7 tal ini, labaih 900 harak gar hu taduan, dalam nan labaih 400 harak gar hu langyah tapak, hadom daok veik lac tapa nen tang jitvu karja saong jitvu buu chinh cong ich. Ong Nguyễn Mạnh Hà, Phaok Akaok UB Bhap bini phuong, Yam ndok Pasak Duh bruk harak gar karja phuong Tân Lập ndom lac, bruk ba AI tame daong urang jakar ngak njauk lagaih bruk ngak saong paglaong bruk duh rahra:

“Khol dahlak hulin hu pathau khan rilo labik ka rahra thau. Rahra mai ngak bruk di Pasak, khol dahlak brei ka dom urang ngak tacei ba ka rahra ngak dom harak gar samar drah jang. Urak ini daok ngak meng tangin, hadei ini brei kuhria tal bruk pandar mac, khol dahlak ngak harak gar tok ndom min blaoh mac nyu pabak gilac.”

Hadei tuk pasang iek tapak bruk pandar tri tue nhan tao tame langyah harak gar karja di dom xa phuong, ong Đỗ Hữu Huy, Phaok Bi thu Tinh uy, Phaok Akaok Mban Thuong truc Pato tacei ka patagok ilamo khoa hoc, kong nghe, salih bahrau hadah krah lek taka so tinh Dak Lak ndom lac, ini lac jalan ngak biak hu makna piah paglaong siam lagaih di bruk harak gar karja dalam tukvak bahrau. Bruk Dak Lak peih ngak AI dalam bruk langyah harak gar karja, camreip meng pakat co so, brei mboh hatai kham merat ngak lagaih harak gar karja lek taka so, salih lek taka so pagam haong duh rahra. Ini jeng lac jalan ngak hu makna dalam bruk padang bruk karja bahrau, tantu cambaih laih, siam lagaih saong mek rahra ngak pasak./.