Xa Ea Bá hadei pagam praong labaih 130km², rahra lek taka labaih 8.300 urang, dalam nan hu labaih 60% lac bangsa Randaiy. Pasak karja xa atah pasak tinh Dak Lạ labaih 130 km. Ong Nguyễn Hoài Vũ, Bi thu Ndang uy xa Ea Bá, khau tin: meng harei 1/7 tal ini, yaom lac ha tang lek taka so hu ngak meng dua labik karja xa klak min jeng ngak hu 80% harak gar karja online daong rahra saong labaih 90% dom mbang nyaom biai online haong Tinh uy, UB Bhap bini tinh, dom so, dom gah. Ini lac bruk kham merat praong di taong abih urang jakar, urang ngak bruk Ndang uy saong UB Bhap bini xa. Ong Vũ brei panuac ka bruk salih lek taka so di bhum palei:

“Kayua xa daok di bhum atah bayah biak kan kandah, ha tang lek taka so daok rilo kan kandah, jamraik mac moc ndap nda kaya di dua tinh klak pagam tame oh ka samu gauk; prein ngak saong ilamo khoa hoc kong nghe di adei sa-ai kong chuc, vien chuc jeng daok kurang. Khol dahlak caong tinh samar drah sangka buh jien tame paglaong pakat, pasiam ha tang lek taka so, peih dom tal bac pasram caga ilamo ka urang kong chc ka ilmao kong nghe so, kong nghe khau tin, bruk pandar AI piah pabak hatai caong ngak bruk dalam bruk ngak bahrau.”

Trung ta Phạm Việt Hùng, Yam ndok Viettel Dak Lak, brei thau labik daok pambuak haong UB Bhap bini tinh hu peih rilo banah salih lek taka so. Ngan haong ha tang lek taka so duh bruk langyah harak gar karja di pakat xa, anak meta hu lagaih, min kayua bhum taneh praong, rilo labik lac bhum dhaong biar taluk nan tin hieu jeng daok klaih klaoh, brei buh jien tame veik dom balai riyak khau tin di dong PTS piah tani tanat pambuak.

Băng: “Dalam luac jalan pagam tinh saong peih ngak Sarak 57, Viettel Dak Lak hu ngak blaoh saong daok langyah ka UB Bhap bini tinh ngak taong abih bruk salih lek taka so. Taphia nan, yaih khan saong peih dom majam bilik nyaom biai oh khin harak gar, pasiam majam nyaom biai online saong bilik tapa majam eOffice.”

Ong Bùi Thanh Toàn, Yam ndok So Khoa hoc saong Kong nghe tinh Dak Lak, brei thau, Tinh uy Dak Lak hu ramik 300 ty dong piah paglaong ha tang salih lek taka so, gam haong nan pato tacei dom so, dom gah pssang iek piah daong veik jien padai njauk lagaih ka yaok bhum palei. Gam haong nan, tinh hu peih danak dak “Rahra bac megru lek taka so”, pambuak haong gah ndien, vien thong khik kajap jalan ba tani tanat, gam haong nan peih veik dom tal bac pasram ilamo lek taka so ka kapul urang kong chuc xa phuong.

“So Khoa hoc saong Kong nghe hu ngak bruk haong dom gah ngak mbang pablei salih vien thong saong gah ndien luc piah khik kajap pabak ndien ka dom PTS. Daok jalan ba daok klaih klaoh kayua hu pambuak tal jalan ba so lieu chuyen dung, ye urak ini Viettel saong VNPT Dak Lak daok pataom tame kham merat pasiam. Gam haong bruk pasiam jalan ba, bruk paglaong dom ndap nda akaok iku jeng biak hu makna saong dom bhum palei jeng daok ngak. Bruk ini ye pakat tinh, pakat xa, phuong saong dom so, dom gah daok peih ngak piah langyah.”

Dak Lak daok dang anak hatai caong samar chip ka salih lek taka so hadei pagam piah duh rahra siam jang. Bruk bhum palei khang hatai buh jien tame yaok rituh ty dong paglaong ha tang lek taka so, gam haong nan jhul khang bruk pato pakai ilmao kong nghe ka kapul urang kong chuc xa phuong brei mboh hatai kham merat praong di xa majam politit. Tuk ha tang hu pasiam, prein ngak kong chuc hu paglaong, jeng yau ilamo di rahra dalam bruk salih lek taka so, bruk padang jak jeng “Karja lek taka so” labik ceik glai Tay Nguyen lac labik mai tal oh atah./.