Dalam dom pataom darak yaih khan ndap nda hu padang di ban Buon Ma Thuột, dom balai OCOP saong kaya hu angan di bhum palei tuk halei jeng hu rilo tuai. Sa-ai Huỳnh Thị Thủy, sa tuai pandar di Dak Lak, brei thau: Bruk sa-ai sangka dahlau abih lac asar siam saong labik ngak tabiak. Sa-ai caik dahlau bruk ruah ndap nda jaik taphia, cambaih laih saong abih di nyu nan lac kayua urang Viet Nam ngak tabiak, kayua nan jeng lac bruk piah daong brei kaya Viet.

“Dahlak caong khin dom ndap nda dak harei dak hu paglaong asar siam, yaih khan praong piah rahra mbuan si blei pandar jang. Langiu di asar siam, thaik thaot jeng biak hu makna, kayua urang blei pandar bhian takre dahlau abih lac thaik thaot gheih meta. Meyah gam haong sa ndap nda hu rilo janih, rilo thaik thaot ye brei pabak hu hatai caong rilo di rilo tuai damuai”.

Bruk salih dalam bruk bhian randap pandar ini hu ngak jeng kateik geik jeng yau daong prein piah dom labik ngak salih bahrau. Dalam gah jhik menyim, amuk Nguyễn Thị Đượm – akaok labik ngak khan bai jih dalah Tay Nguyen daok di phuong Buôn Ma Thuột, tinh Dak Lak hu thau bruk takre dalam rahra saong kham merat salih piah khik takai tuai damuai. Amuk Đượm brei thau:

“Piah pabak hatai caong di tuai damuai, dahlak hulin kham merat duah thau, duah thau ka bruk takre dalam rahra ka thaik thaot saong asar siam. Labik pablei oh lac duh ka tuai di bhum palei bo daok lac tuai damuai rah rivang tuk mai tal ban Buôn Ma Thuột. Biak nao hu mboh lac, rilo tuai damuai biak chreih takre daong bruk rilo ndap nda di kaya jih dalah, dom kaya karei ye sangka iek praong tal bruk salih karei. Ini jeng lac kein lagaih di labik, kayua khol dahlak hulin meda hu jhil menyim rilo ndap nda kaya, pabak hu hatai caong rilo janih jang di tuai damuai”.

Dom gah ngak mbang pablei salih praong jeng daok salih mboh cambaih laih ka janih tuai damuai. Tui sa-ai kamei Châu Yến Duyên – bilik Marketing, Kongti TNHH yến sào Thành Dung, xa  Krông Pắc, tinh Dak Lak: Dahlau diah, kongti ngak tabiak rilo janih ia yến yaom pakat glaong pakat piah pablei tabiak langiu negar. Min urak ini, kongti dak harei dak sangka tal darak pasar dalam negar, gam haong nan parilo ndap nda piah dui pachreih rilo tuai damuai jang.

“Kongti hu roh duah saong ba tabiak dom ndap nda njauk lagaih haong janih hatai tuai damuai mbuan pilih ruah, yau dom ndap nda kalaok yến rilo janih ka thaik thaot saong pahe bangi piah tuai damuai pilih ruah. Langiu di nan, khol dahlak hulin daok patagok ndap nda yến hana, hu yaom kaom njauk lagaih kayua meda mbang chip”.

Dom bruk ndom meyai di urang pandar saong gah ngak mbang pablei salih brei mboh, bruk pambuak pagam di dua gah ini dak harei dak karo kajap. Urang blei pandar daong brei kaya Viet kayua bruk jaik taphia, tantu cambaih laih saong karo kajap; dalam tuk nan, gah ngak mbang pablei salih kham merat salih bahrau piah khik hatai je saong peih praong bruk ngak mbang. Bruk daong gauk ini oh lac daong rilo ndap nda kaya hu angan di bhum Dak Lak hu mbaok di dom majam darak pasar praong, hu mbaok tame labik pablei salih ndien tu, bo daok daong padang angan je kaya Viet dak harei dak karo kajap./.