Di kadai kuan pablei takhaok kalik juak daok dalam palei mikva urang bangsa Dao di tapen glai puk palei 6, xa Thanh Sơn, tinh Dong Nai, hadei di tuk tuai damuai pilih ruah hu thaong kalik juak njauk hatai, sa-ai kamei Hoàng Thị Thanh peih ma QR dalam phone di drei piah urang blei bayar jien. Hadei tuk pasang iek mboh talam phone jien tame gilang pariak, urang pablei saong urang blei mboh bui sambai tuk salah blaoh bruk meyao meyit. Tukvak tapa, bruk pablei sal8ih meng jalan bayar jien tapa phone yau di kadai kuan di sa-ai Hoàng Thị Thanh hu ngak saong daok rah tabiak yaom lac kandauk min samar drah di jaik abih palei mikva urang bangsa takik di xa bhum atah bayah yau di Thanh Sơn.

Amuk Điểu Thị Út (bangsa Chơro), sa urang hu angan je dalam bhum mikva urang bangsa takik puk palei 5, brei thau: Jaik abih apuh di mikva Chơro jeng atah sang daok. Kayua yau nan ye, dom tuk blei ndap nda kaya tapa mang, urang pajeng ba ndap nda mai tal sang bhian oh hu thei bayar jien. Dom tuk yau nan, mikva tapha brei mek ndap nda saong daong pasang iek ndap nda, meyah njauk ndap nda ye brei taong phone piah urang blei bayar jien jien ka urang pajeng jao ndap nda. Bruk ini ngan haong urang blei, urang pajeng ba jao ndap nda jeng biak lagaih.

Amuk Hoàng Thị Lan (urang bangsa Tày, daok di puk palei 6): Dalam luac jalan daok meng tinh bhum ceik gah Barak negar panduan tame mai, mikva urang bangsa Tày khik tani tanat janih seni nghe thuat bhap bini lac adaoh then – rabap tính. Tuk khau tin pambuak ndom meyai hu lagaih, mikva Tày daok di xa saong di bhum palei taong phone video mai tapak piah tacei ba ka gauk dom kadha bahrau, mbek ka gauk dom kadha adaoh, rahu ragam. Atau tuk padaong blei rabap ragam, urang di bhum palei taong phone video tapak piah urang daok dalam ini pilih ruah kadai kuan, meyah njauk hatai ye bayar jien blaoh hadei nan hu payua mai karja pakat xa.

Meng hu mang vien thong saong thau tani tanat ka bruk pandar dalam phone pan tangin nan yaom lac daok di apuh, amuk Lan jeng pasang iek hu bruk daok dang me-in di dom taco daok di sang tapa bruk pambuak haong camera an ninh di sang. Atau amuk mbuan pasang duah khau tin ka kat bao hiem y te di yaok urang dalam sang piah tut angan blei gilac ka njauk tukvak. Tuk blei, amuk jeng bayar jien ka kadai kuan blaoh oh cang bayar tapak mbaok.

Bruk mikva urang bangsa takik xa Thanh Sơn randap bhian saong bruk salih lek taka so yau urak ini dahlau abih brei khan tal bruk kham merat di karja dom pakat tuk hu sangka buh jien tame padang ha tang vien thong mai tal dom palei pala rahra bhap bini.

Ong Hoàng Văn Thái (bangsa Dao), urang hu angan je dalam mikva urang bangsa takik daok di puk palei 6, brei thau: Dahlau diah, yaok tuk ong nao apuh di tapen glai atah di sang labaih 5km, phone lahik riyak. Khin pambuak ndom meyai haong gauk ye tok meda nduac meng apuh mai sang atau nduac tabiak jaik jalan praong piah mek riyak. Daok urak ini, yaom lac daok dalam kadai khik apuh dalam glai, ong peih harak mbao dalam phone tabiak piah puac, pang ragu ragam online. Yaom lac pandar khau tin mbuan biak min lac ong gam haong mikva tuk halei jeng kakei gauk ruah puac di angaok dom blah khau tin hu angan je saong kakei caga dom asal kadha kanjah jhak.

Tui ong Ngô Hoàng Hải, Bi thu Ndang uy, Akaok HĐ Bhap bini xa Thanh Sơn, dom bruk bac pasram ka bruk pandar mang xa hoi sron mbon salamat, pacang caga kol pachot pagat tapa rayak mang, daong ngak kat ATM saong pandar dom app gilang pariak, mek trun dom app hu pambuak tal bruk ngak harak gar karja… caik ka mikva urang bangsa takik hu karja dom pakat peih ngak bhian.

Piah daong urang hu angan je dalam mikva urang bangsa takik ngak siam lagaih bruk salih lek taka so, pandar mang xa hoi karo ka siam, tui ong Thổ Út, Phaok Yam ndok So Bangsa saong Agama, tukvak anak tal dom bruk ndom meyai sua tangi, bac pasram saong tacei ba tapak ka bruk salih lek taka so brei hu dom jabat chuc nang ngak piah daong mikva urang bangsa pandar siam jang salih lek taka so tame raidiuk tui jalan karo salamat, tagok siam lagaih pambuak di Ndang, karja saong mikva urang bangsa takik./.