Pandar ilamu ngak kong bahrau tame bruk ngak nong daok ba mai "baoh yamen" ka rilo urang di Ndong Nai, abih di nyu dalam nan hu lac di huyen Xuan Loc klak, labik dom bruk ngak pandar ilamu ngak kong brei mboh hu ka baoh jeng biak siam mekre.

Pagap yau Hop tac xa kakao Suoi Cat, ngan haong bhum taneh labaih 70 ha peih ngak tui tanut chuan GlobalGAP. Mai meng bruk pandar jalan pruh aia patak pataom saong ilamu ngak kong patabiak dalam gam haong dom janih ndap nda hu ngak tabiak meng kakao yau keo, pandap menyum, bo dom urang daok dalam Hop Tac xa duah hu jien mek tame biak rilo, meng 500-600 trieu ndong/ha.

Oh lac hu sa janih yau nan, bruk pagam mã QR tame pandap panda piah duah thau ka halau gha ngak tabiak di nyu hu daong ka hop tac xa dak padang hu angan je khang kajap. Ong Trương Văn Mỹ, Akaok Hop tac xa, khan brei thau: "Dak padang angan je piah ka dom urang blei pandar negar langiu ginum biai yaom kaom. Daok ndom ka chat luong asar di nyu ye dahlak mek hu paje, dom urang blei pandar meng Japan, Frang, Korea... halar hatian blei tame yaom glaong jang. Dahlak oh daok pablei tabiak tui jalan ngak meng kan blaoh pablei di angaok mejam pablei salih online, piah ba tabiak ye hu rilo urang thau tal, patrun jien meyaih khan".

Urak ini, baoh kakao that hu hop tac xa blei tame ngan haong yaom 7.000 ndong/kg, glaong jang yaom pambuak bruk ngak mbang, daong ka mikva bui sambai saong chreih chai ngak tabiak nyu.

Jeng dreh yau nan, dalikan di Labik ngak tabiak bimao linh chi Phương Linh iew lac sa kadha brei pagap yau nan ndom mayai brei ka bruk salih bahrau jalan ngak pablei tabiak ndap nda.

Gam saong mblang taneh 3 ha, yaok thun pabak brei tabiak ka darak pasar jaik 21 tan bimao linh chi thu, sa-ai Vũ Phương Linh, po labik ngak, hu khang hatai ba ndap nda tagok internet. Yaok harei, sa-ai jeng hu livestream pablei pandap, taom gaok haong urang blei pandar daok grauk labik dalam negar.

 "Patui bruk yaih khan angan je ka nyu prong yaom angaok internet piah ka dom urang pablei salih thau tal labik ngak tabiak di dahlak piah brei pambuak bruk ngak mbang. Pandar ilamu ngak kong kong di gah akau dahlak ye taong abih bruk jeng hu ngak meng jamariak mac moc abih, yaok gam bruk pablei tabiak langiu darak pasar jeng biak samar saong takik urang ngak."

Dalam tuk nan, di Hop tac xa ngak nong Xuân Định, dom po bein durian jeng njauk hatai ka labik pablei tabiak mai meng bruk ngak mã hoá labik pala  saong ngak tabiak baoh siam hijao. Amuk Đặng Thị Thúy Nga, Akaok Hop tac xa, brei thau: " Hu xa daong biak rilo, piah ka urang nong hu pato pathram ngak tabiak siam, gheih ghang. Daong ka mikva peih ngak tui saong mek hu harak VietGAP, daong patagok danak dak OCOP piah ka urang thau cambaih laih jang ka bruk ngak tabiak siam mekre saong hacih sa-at".

Piah ka dom bruk ngak ini hu pambak prong, urang pan akaok tinh Ndong Nai brei mboh lac bruk pandar ilamu ngak kong lek taka so, dak padang jalan ngak duah thau ka asal di pandap panda saong jalan ngak tabiak hu ngak meng mac moc jamariak abih nan lac dom jalan ngak prong hu ba tabiak piah cak rok patagok bruk ngak nong karo kajap.

Dalam tukvak meng anak mai tal, Ndong Nai meda patui ngak bruk caik hatai buh jien tame brei ka bruk roh duah, panduan jao ilamu tame dalam bruk ngak tabiak. Tinh jeng pacheih urang pablei salih saong bhap bani jhul pakhang ilamu ngak kong pakat glaong, panduan salih taka saong cak rok patagok bruk ngak mbang pablei salih angaok internet, brei thau cambaih laih asal di ndap nda kaya kan drei ngak tabiak./.