Nao ƀơi jơlan bê tông giăm 1km, rơhaih 4m, tŏ mơ̆ng plơi Myah truh pơ đang hmua, ơi Ksor Jinh (tơkeng thun 1950, dŏ ƀơi să Ia Krai, tơring glông Ia Grai) brơi thâo, sui mơ̆ng anai 1 thun đôč, anai lĕ jơlan glung, prong teng ngeng 2m đôč, amruih, hlŭ biă mă amăng bơyan adai pơ-iă, tơbor biă mă amăng bơyan hơjan, ngă kơ lu mơnuih rơbuh rơdêh lơ̆m pơgiăng gơnam tam mơ̆ng hmua.

Hrơi hơmâo să lăi pơthâo kơ bruă hơmâo kơnuk kơna djru ană plơi pơkra jơlan bê tông, ơi Ksor Jinh nao hlâo mơtăm, kăng brơi 100m2, lu mơnuih amăng plơi đăo kơnang, pơpha brơi hơdôm rơtuh m2 lŏn či pok prong hăng pơkra giong jơlan:

“Hlâo adih jơlan nao rai tơnap biă mă, ană bă hrăm hră tơnap biă, ƀing tha rim wơ̆t nao pơ sang čơ blơi braih gui glăi ƀơi lan anai ƀu thâo nao ôh. Mơ̆ng hrơi jơnum bưp mơnuih ƀôn sang, să trun nao lăng tơl anih laih anun mơ̆ng bruă sem lăng, să hơmâo črông sai pơkra jơlan, tơdơi kơ anun iâu pơthưr neh met wa pĕ pơpha brơi lŏn, koh hĭ hơdôm ƀĕ phun kơphê, boh nông (boh kueo) či pok prong jơlan, gơmơi hok mơ-ak ngă tui. Truh hrơi anai, jơlan hơmâo pok prong, lăng ană bă nao hrăm hră ăt hơđong pran jua mơn, laih anun neh met wa nao rai pơgiăng gơnam ăt mơ-ak hloh mơn, tơlơi anai ngă kơ abih bang mơnuih phôn pran biă yơh”.

Bơ ƀơi plơi Nú, să Ia Khai, tơring glông Ia Grai, ăt mơ̆ng bruă pĕ pơpha lŏn pơkra jơlan mơn, mơ̆ng akŏ thun 2023, jơlan bê tông glông 800 met, prong 4 met hơmâo pơkra giong hlâo kơ hrơi pĕ boh ñông. Ơi Rčŏm Hmonh, mơnuih ană plơi kơnang ƀơi plơi Nú brơi thâo, lơ̆m gong gai iâu pơthưr neh met wa kăng pơpha lŏn, pok prong jơlan, lu sang anŏ ƀu tŭ ôh yua brơi lŏn lĕ khŏm drôm hĭ hơdôm rơtuh phun boh ñông. Ơi Hmonh nao hlâo pơpha brơi, drôm hĭ 19 phun mơ̆ng sang anŏ gơñu, giong anun iâu pơthưr adơi ayong, ană bă amăng kơnung djuai kiăng hla tui. Mơ̆ng anun, hrŏm hăng tơlơi jak iâu juh alum mơ̆ng khua mua plơi pla, 20 boh sang anŏ drôm hĭ 300 phun boh ñông kơtuai jơlan či pơkra jơlan prong, rơhaih. Ơi Hmonh brơi thâo:

“Mơ̆ng hrơi man pơdong plơi pla phrâo, amăng plơi hơmâo lu tơlơi pơplih biă, hơmâo kơnuk kơna lăng ba, djru pok prong jơlan. Ră anai, hơmâo lu jơlan nao rai amăng plơi arăng pơkra bê tông soh mơn. Kơnong sang anŏ gơmơi ăt pơpha brơi lŏn laih anun drôm hĭ hơdôm pluh phun pla pioh ngă jơlan. Bơ hơdôm boh sang anŏ pơkŏn tơdah gong gai kiăng pĕ pơpha lŏn, koh drôm phun pla lĕ neh met wa ăt ngă tui mơn, yua dah mơnuih ƀôn sang thâo hluh kơnuk kơna kiăng djru brơi mơnuih ƀôn sang hơmâo jơlan nao rai hiam. Kâo mơ-ak biă, laih anun bơni kơ gong gai”.

Kiăng ngă hơdôm jơlan hơdră dêh čar pơtrun man pơdong plơi pla phrâo hăng pơđĭ kyar bơwih ƀong huă - mơnuih mơnam kual mơnuih ƀôn sang djuai ƀiă, amăng lu thun anai, ping gah, gong gai tơring glông Ia Grai, tơring čar Gia Lai iâu abih bang anom bruă kơđi čar, mơnuih ƀôn sang hăng anom bơwih ƀong. Amăng anun, tơlơi kiăng ngă phun mơ̆ng tơring glông lĕ djru ba hlâo kơ kual mơnuih ƀôn sang djuai ƀiă, kual tơnap tap; djru pơđĭ kyar jơlan nao rai, ngă phun tơhnal kiăng pơđĭ kyar bơwih ƀong huă - mơnuih mơnam. mơ̆ng anun bruă pĕ pơpha lŏn pơkra jơlan, pioh ngă hơdôm jơlan hơdră kơnuk kơna pơtrun hơmâo mơnuih ƀôn sang tŭ ư ngă tui. Kơnong mơ̆ng thun 2020 truh ră anai, tơring glông hơmâo iâu pơthưr hơdôm pluh rơbâo boh sang anŏ, kăng pơpha rơbêh 20.000m2. Amăng mrô anun, hơdôm boh să kual mơnuih ƀôn sang djuai ƀiă kah hăng Ia Krai, Ia Khai, Ia Yok, Ia O..., jing anih hơmâo hơdră ngă bruă tŭ yua. Tui anun, ƀing khua, mơnuih ping gah, mơnuih arăng kơnang, tha plơi lêng kơ mơnuih ba jơlan nao hlâo amăng bruă iâu pơthưr, mơ̆ng anun hơmâo abih bang tŭ ư, đăo kơnang hăng ngă tui. Yă Nguyễn Mai Lương - Khua Jơnum min mơnuih ƀôn sang să Ia Khai, tơring glông Ia Grai brơi thâo:

“Să hơmâo jơnum iâu tom tha plơi, khua ping gah plơi, biă ñu lĕ mơnuih ană plơi kơnang. Amăng hrơi mông ngă bruă, khŏm pơmin hơjan sui khŏm đŏm mơn, pơtô lăi na nao khŏm hmư̆ mơn, hrơi anai gơñu aka ƀu thâo hluh lĕ hrơi pơgi dong gơmơi nao pơtô, hrơi anai jao bruă kơ pô anai nao juh alum, hrơi pơgi jao kơ pô pơkŏn dong. Tơdah sang anŏ anun ngă ding kơna amăng Khul ngă hmua lĕ gơmơi iâu Khul ngă hmua, ding kơna amăng Khul đah kơmơi lĕ gơmơi pơkiăo nao khua khul đah kơmơi nao pơblang brơi kiăng gơñu thâo hluh”.

Jơlan nao rai jai hrơi hiam tui djru kơ bruă nao rai sĭ mơdrô kơplah wah hơdôm boh plơi pla kual ataih asuek, kual mơnuih ƀôn sang djuai ƀiă mơ-ak hloh, jing phun akha kiăng ping gah, gong gai hăng mơnuih ƀôn sang ƀơi guai ƀun rin Ia Grai gir akŏ pơjing tơlơi hơdip jai hrơi trơi pơđao yâo mơ-ak, klă hiam./.