Drim ngai 04 Sa tềp Ất Tỵ, tàm sươn bùm lô tàm sàh Dăk N’Drót, kơnhoàl Dăk Mil, càr Dăk Nông, nùs nhơm lơh broă duh hồl hô hơng ngan. Mờr 30 nă cau lơh broă apah gam ờ ru ngan mờ broă rồ bùm, săp ñŏ nhơl chờ hờp nggồr bơrlŭ bal mờ săp ntas măy mŏk dê. Bi Y Đăp Kbuôr, ơm tàm ƀòn Trăp B, sàh Cư Mgar, kơnhoàl Cư Mgar, càr Dăk Lăk yal, bi neh lòt bơh àng drim gờñ nàng thàn tus bal rồ bùm lô tàm do.

Ồng Lại Cao Điền, cau tờm sươn bùm lô pà gĭt, 7 lồ bùm lô Nhờk neh geh cau kă phan lơh nền giă mờ 2 gah neh tàm bơyai, ring bal tŭ tơngai jàu dờp phan. Tài bơh neh tàm bơyai lài den tàng di ngai 04 Sa tềp, khà cau lơh broă apah rồ bùm bơh càr Dăk Lăk neh tơrgùm lòt rơndeh tus nàng rồ bùm di kàl, di tơngai jun phan ai cau kă phan in.

 Ngai 4 Sa tềp kung là tŭ uă cau lơh broă sa ală càr tàm tiah Tây Nguyên lòt tàm suơn tuh dà kơphê, sầu riêng mờ uă bơta phan tam ndai in. Ồng Y Danh Niê, ơm tàm ƀòn Knia 3, sàh Ea Bar, kơnhoàl Buôn Đôn, càr Dăk Lăk kung gam crăp ding béc nàng tuh dà kơphê in. Ồng Y Danh pà gĭt, neh tuh dà dơ̆ 1 ai tờm kơphê in lài mờ ngai 20 nhai 12 nam he pa do. Tŭ do, jơh Sa tềp den bơkào kơphê kung neh hoañ, di mờ dơ̆ tuh dà dơ̆ 2 tơn. Tuh dà kơphê jơh den hìu bơnhă rơ̆p toès kòi mờ pơgăp lồi nhai 1 nam he dê den pơn jat tai pĭc tiêu.

Tàm kơnhoàl Đăk Hà, tiah tờm tam kơphê càr Kon Tum dê, ngai 4 Sa tềp, săp nggồr măi ƀồm dà mpoong jơh ală suơn kơphê. Ồng Nguyễn Văn Phượng, ơm tàm thôn 4, sàh Đăk Mar, kơnhoàl Đăk Hà pà gĭt, hìu bơnhă geh 1 lồ kơphê pa tam nam dơ̆ 2, ồng bal mờ pơ ùr dŭi ding dà jun dà lơngơm mrềt tuh ai tơl tờm kơphê in. Tàm nùs nhơm hơn chờ, làng bol ndrờm kơ̆p kờñ tàm dùl nam lơh sa ƀuơn ƀoài, mìu càl niam, phan tam geh tơnhào uă, giă tăc phan kơ̆ kơl jăp.