Tàm mìr tam tào ơnàng 17 lồ tàm sàh Ea Sô, kơnhoàl Ea Kar, càr Dăk Lăk, ồng Võ Quốc Dị bal mờ gĭt nđờ jơ̆t cau lơh phan ờ ru ngan tơnhào tào. Ồng pà gĭt, đềt mềr mờ tờm tào rlau 20 nam, hìu bơnhă geh priă jền sùm. Mìng is 4 nam rê wơl hờ ndo, pah nam hìu bơnhă lơh geh rlau 1 tơmàn đong.

Priă lơh geh do dùl bơnah kơnờm tàm broă lơh dong kờl tăc blơi giă bè ờs sùm bơh hìu măi sơdàng dê, bal mờ broă ngui ală broă lơh pa ngan tŭ do tàm broă tam tào. Ồng Võ Quốc Dị pà gĭt:“Hìu añ tŭ do uă ngan ngui sơntìl tào pa K3 là tờm. Ală dà tuh bơh hìu bơnhă dê añ ndrờm ngui béc tuh dà is, ngui mờ ồs đèng, bal mờ măi nổ rơcang lài. Pah tŭ koh tào tờm halà tam pa, bol añ kung tơrbŏ ding béc tuh bơh ngai bồ kàl tơn, jŏ jòng tàm pơgăp bơh 3 tus 4 nhai bồ nam. Den tơnơ̆ hơ̆, tŭ tào neh jòng, hìu bơnhă rơ̆p ơn phơng, uă ngan là NPK mờ bơrlŭ bal mờ urê tai, dong tờm dờng mhar nàng tào in dờng jơnhoa jơm jơh ñhơ̆t”.

Kung rềp mềr mờ tờm tào bơh rlau 20 nam, ồng Tô Bá Hồng, ơm tàm sàh Ea Sô, kơnhoàl Ea Kar, pà gĭt: “Añ geh 5 lồ tào, hìu măi dong kờl ai uă bơnah bè priă jền tuh dà dùl kàl 3 tơlak đông dùl lồ, koh tào 2 tơlak đong dùl lồ; den phơng ơn jat tơl mìr tam tài hìu bơnhă he dê uă halà dồ ết den geh hìu măi bơcri priă. Pơn yơu, 1 lồ den 1 tấn phơng, jat he dờp tai. Tờm tào uă nam do giă bè ờs, ai tơnhào niam. Bè nam do, hìu bơnhă añ dùl lồ geh bơh 70 tus 80 tấn, giă 1 tơlak 100 rơbô đông tus 1 tơlak 300 rơbô đông dùl tấn, ờ kờp priă tă lơh kung geh 70 tơlak đong dùl lồ”.

Sàh Ea Sô geh rlau 1 rơbô lồ tào. Ồng Nguyễn Xuân Hữu, Củ tịc Anih duh broă Làng bol sàh, đơs là bulah cồng nha lơh sa bơh tờm tào dê ờ hềt gơtùi tàm ndrờm mờ ală tờm chi sa plai ndai bè sầu riêng, plai gơ àl, plai jràng halà tờm chi tam jŏ nam bè kơphê, tiêu, mơya do là tờm tam tờm ngan tàm ù tiah lŭ rơdeh tàm bơrlŭ bal mờ bràs, dong uă hìu bơnhă lik klàs rƀah mờ geh rài kis bơtàu tơnguh đau. Ồng Nguyễn Xuân Hữu, đơs:“Sàh sùm cribơyai mờ hìu măi sơdàng, sền wơl geh tơnơ̆ kàl tơnhào dùl nam bơh tơl sơntìl mờ hìu măi neh mờ gam ngui uă sơntìl geh cồng nha nàng dong kờl làng bol cau lơh broă sa in. Den broă bè phơng sih, sơnơm sền gàr phan tam di pal, den bol añ kung gŏ hìu măi sơdàng sùm jat sền, ai tờm tào nàng sền sơwì dong kờl bơtàu tơnguh tờm tào nàng kờñ ngui bơta chài pa nàng sơng ka sền gàr tờm tào in lơh bè lơi lơh geh cồng nha tơnhào”.

Càr Dăk Lăk tŭ do geh 15 rơbô lồ tào lơh sơdàng, uă ngan tơrgùm tàm ală kơnhoàl  Buôn Đôn, Ea Súp, Ea Kar mờ M’ Drăk. Khà lơh geh tào pah nam kờp dŭ geh 1 tơlak tấn.

Ồng Lê Tuân – Phó kwang atbồ dờng Kông CP Tào Sơdàng 333 Dăk Lăk pà gĭt, mpồl lơh sa kă bro lơh bal mờ rlau 2 rơbô 100 hìu bơnhă tàm ală kơnhoàl Ea Kar mờ M’ Drăk, tam 8 rơbô 200 lồ tào lơh sơdàng, mờ khà lơh geh pơgăp 750 rơbô tấn tào ris pah nam. Kông ty rcang lài pơgồp bal mờ cau lơh broă sa mờ gơnoar atbồ ƀòn lơgar lam lơh ală broă lơh nàng lơh gơlik kơ̆ kơl jăp: “Hìu măi gam lơh pa broă lơh gơlik jrô nàng tơnguh broă blơi tào, atbồ koh tào nàng bơta niam tào jun rê tàm hìu măi geh niam ngan rlau jơh. Mơkung ngui jơh ală phan tơnơ̆ dơ̆ lơh sơdàng nàng gơtùi tơrmù giă priă lơh gơlik bè lơh gơlik phơng vi siñ, ai sồ siă tăc ai ală mpồl lơh broă ròng phan in, halà broă lơh tŭ do là lơh gơlik ồs đèng chu bơh sồ siă tào mờ uă hìu măi dê neh lơh. Bol añ kung gam sền sơwì ai tam uă ală sơntìl tào niam rlau, nàng kờñ tơnguh cồng nha tơnhào tào mờ khà sơdàng tàm tào tàm dùl bă ù tam tào dê”.

Mờ bơta rcang lài lơh bal kơ̆ đah cau lơh broă sa bal mờ mpồl lơh sa kă bro mờ gơnoar atbồ ƀòn lơgar, gah tào sơdàng Dăk Lăk gam pơn jat tai bơtàu tơnguh kơ̆ kơl jăp jŏ jòng, cèng wơl priă lơh geh sùm ai ală gah in mờ tă pơgồp tàm rài lơh sa ƀòn lơgar dê.