Tàm bă suơn tam bùm tàm sàh Dăk Ndrót, kơnhoàl Dăk Mil, càr Dăk Nông, nùs nhơm lơh broă ur ar ngan. Mờr 30 nă cau lơh broă gam lơh ngan tơnhào bùm lô, săp ñŏ, săp đơs geh bal sùm mờ săp ntas măi mok. Bi Y Đăp Kbuôr, kis tàm ƀòn Trăp B, sàh Cư̆ Mngar, kơnhoàl Cư̆ Mngar, càr Dăk Lăk yal, bi neh lòt bơh drim gờñ nàng di tŭ tus bal tơnhào bùm lô tàm do. “Nàng di tŭ tơnhào dong kờl cau lơh suơn, làng bol bol añ neh tơrgùm lòt tờ tơnhào. Bol añ chờ hờp ngan, geh broă lơh geh tai priă bồ nam pa”.

Kung tus bal bơh gờñ nàng di tŭ dờp broă lơh, mò Lê Thị Lan, kis tàm sàh Ea Drơng, kơnhoàl Cư̆ Mngar, càr Dăk Lăk chờ hờp ngan tŭ ngai sơn rờp lòt lơh broă geh cau tờm suơn pà priă bồ nam. “Tàm ngai sơnrờp bol añ lòt lơh broă nàng tờ tơnhào bùm lô dong kờl cau tờm suơn, bol añ chờ hờp ngan. Ngai sơnrờp geh dờp priă pà bồ nam pa, kơ̆p kờñ nam 2025 geh uă broă lơh kơ̆ kơl jăp”.

Ồng Lại Cao Điền, cau tờm suơn pà git, 7 lồ suơn tam bùm lô lơgar Nhờk do neh geh cau blơi mờ 2 gah neh ring bal, ring bal tơngai jào dờp phan kă bro. Tài neh ring bal lài den tàng khà cau lơh broă tus tờ tơnhào ƀùm lô bơh càr Dăk Lăk neh tơrgùm tus nàng tờ tơnhào di kàl, di tơngai jào phan kă bro ai cau blơi in. “Tŭ do priă tăc kung gam gơguh den tàng lơh ngan tŭ trồ tơngai duh niam, cau blơi den neh ring bal mờ neh blơi bol añ in bơh tàm nam lài mờ priă 12 rơbô đong tàm 1 kĭ tềng suơn mờ kung neh rơcang tơl cau, lam ală cau lơh ngan dong kờl bal. Dơ̆ satềp nam pa chờ mơya ờ huĭ kơnòl den tàm ngai 4 satềp bol añ sơn đờm lik tơnhào bă suơn tam bùm neh tus tơngai tơnhào nàng ai phan geh lơh tăc tus tàm drà kă bro di tŭ”.

Ală ngai do kung là tŭ geh uă làng bol lơh broă sa suơn sre tàm ală càr Tây Nguyên lik tàm suơn nàng tuh dà kơphe, sầu riêng mờ uă bơta phan tam ndai in. Gam tuh dà tàm 1 lồ ù tam kơphe bơrlŭ bal mờ sầu riêng, ồng Vũ Văn Thắng, kis tàm ƀòn drà dềt Ea Tling, kơnhoàl Cư̆ Jút, càr Dăk Nông yal: “Tàm ală ngai pa do den añ kung ơm tàm hìu nàng chờ nhơl, làng bol nam do chờ hờp ngan, sa dùl kàl satềp hờm ram. Ngai 4 satềp làng bol lơh broă sa suơn sre bol añ lik tuh dà kơphe, tuh dà sầu riêng in, kung kơ̆p kờñ là priă tăc kơ̆ kơl jăp bè do, tus lồi nam den làng bol chờ hờp”.

Ồng Y Danh Niê, kis tàm ƀòn Knia 3, sàh Ea Bar, kơnhoàl Buôn Đôn, càr Dăk Lăk kung gam crăp ding nàng tuh dà kơphe in sơl. Ồng Y Danh Niê pà git, neh tuh dơ̆ sơnrờp bơh lài mờ ngai 20 nhai 12 nam lài jăt tơngai àng kơnhài dê. Tŭ do neh jơh satềp den bơkào kơphe kung neh ro, mờ di tơngai tuh dơ̆ bàr tai. Tuh dà kơphe jơh den cau tàm hìu ồng rơ̆p tơwès kòi mờ tàm pơgăp lồi nhai dùl do den pơn jăt tai tơnhào tiêu. “Jơh satềp den tŭ do cau tàm hìu nhă pơn jăt tai tơrgùm tuh dà suơn kơphe, tiêu in. Nam do hìu nhă añ kơ̆p kờñ suơn kơphe, tiêu hòn gơs niam, lì bơkào tơ̆t plai uă nàng kàl tơnhào geh uă. Kung kơ̆p kờñ priă tăc nam do kơl jăp, gơguh uă rơlao nàng rài kis hìu nhă geh kơ̆ kơl jăp rơlao pơn drờm mờ nam pa do”.

Tơnơ̆ mờ ală ngai chờ satềp nam pa, làng bol kis tàm ală càr Tây Nguyên ờ ru ngan mờ broă lơh sa. Tàm nùs nhơm chờ nam pa, làng bol ndrờm kơ̆p kờñ tàm dùl nam lơh sa geh ƀuơn, mìu niam nhàc niam, phan tam hòn gơs niam, tơnhào geh uă, tăc geh priă rơlao.