Do là jơnau yal tàm tìp măt cribơyai yal tơnggĭt mblàng yal bè ală broă lơh ătbồ phan sa tàm lơh gơlik kơphê bơh Anih tờm Dong kờl bơto pơlam broă lơh sa sươn sre Dà lơgar dê bơyai lơh tàm càr Dăk Nông. Tàm tìp măt cribơyai, ală cau ala măt neh yal tơnggĭt bàr pe broă lơh tơrlòng lài, broă lơh geh cồng nha dong cau lơh broă sa lơh gơlik kơphê kơ̆ kơl jăp. Is ồn là pal sền ngăc tus broă bơsong sồ siă sang tàm ală tŭ lơh gơlik, jơnau tồn lah dềt rơhền ngan mơya kwơmàng ngan bè jŏ jòng gơ wèt mờ tiah ơm kis.

Jăt ồng Lê Quốc Thanh, Kwang Lam bồ Anih tờm Dong kờl bơto pơlam broă lơh sa sươn sre Dà lơgar, tŭ bă kơphê mờ priă jền kơphê sùm gơguh den bơta kơn jơ̆ bè ngui phơng hoá họk, dà sơnơm, sơnơm sền gàr phan tam kung ngai sơlơ gơguh tai. Bơta do gơ sồr pal mùl màl tàm rài kis ală broă lơh khòm tơrgùm, bơsong sồ siă sang bal mờ bơta sơm băt tê bal bơh jơh ală đah gơrềng dê, is ồn là bơta gĭt wă bơh làng bol dê.