VOV.K'Ho- Thủ tướng Cíñ phủ ồng Phạm Minh Chính neh geh dơ̆ hòi điện thoại cribơyai mờ Thủ tướng lơgar Kộng hoà Ală ƀang Đức ồng Friedrich Merz tàm cribơyai ală broă lơh chồl tơngguh gĭt gơ̆p Tam klăc lơh broă bal jŏ jòng đah Việt Nam mờ Đức ngai sơlơ bơtàu tơngguh ngan ngồn, geh cồng nha mờ tơl làm.

VOV.K'Ho- Pơrjum dờng tơngai lơh broă do, Dăk Lăk cih Jơnau lơh nền tàm pơrjum mờ jơnau đơs “Tam klăc – Làng bol lơh tờm – Duh rơngòt adăt boh lam – Tam gơl pràn – Bơtàu tơngguh”, ơn broă jàu bơta pràn gơguh lơh sa kờp bal 10,5% tàm dùl nam.

VOV.K'Ho- Bơh ngai 29/09 tus ngai 01/10, càr Dăk Lăk bơyai lơh Pơrjum dờng cau ala măt Đảng ƀộ càr dơ̆ dùl tơngai lơh broă bơh nam 2025- 2030. Pơrjum dờng pơn jăt tai geh jơnau kờñ tơrmù rƀah mhar tàm tiah jơi bơtiàn dồ êt nă cau, lơh ngan tus nam 2030 sền bal ờ gam tai hìu rƀah tài bơh ờ tơl ù lơh sa. Làng bol kơ̆p gơn mờ dòn kơnờm bơh Pơrjum dờng do, càr Dăk Lăk rơ̆p bơtàu tơngguh tam gơl pràn, tơn rŭc lơyah bơta ờ ndrờm bal đah ƀòn lơgar mờ tiah drà, tiah bơnơm mờ tiah ring, bơtàu tơngguh uă rài kis làng bol in.

VOV.K’Ho- Ngai òr (29/09), tàm Hìu lơh broă Củ tịc, Củ tịc lơgar ồng Lương Cường neh wă Củ tịc Đuma Dà lơgar Nga ồng Vyacheslav Volodin mờ mpồl kwang bàng ala mat kâp dờng Đuma Dà lơgar Nga gam còp ngan ngồn lơgar Việt Nam mờ tus bal dar pơrjum dơ̆ 4 Anih duh broă lơh broă bal bàr Nghị viện đah Quôk hội Việt Nam mờ Đuma Dà lơgar Nga.

VOV.K’Ho- Klo ngai ngai (29/09) tàm Anih rơndeh par ơm T2 Ƀlàng rơndeh par ală lơgar Cam Ranh, Anih duh broă Làng bol càr Khánh Hòa neh bơyai lơh wă rò dơ̆ par sơn rờp bơh Moscow bơh gah rơndeh par Nordwind Airlines dê, pờ wơl gùng par Nga – Nha Trang tơnơ̆ mờr 5 nam ơm ing.

VOV.K'Ho- Củ tịc Quôk hội ồng Trần Thanh Mẫn sồr ală anih lơh broă mhar iăt kơno tơl làm jơnau đơs neh ring bal, lơh sir jơnau yal pơyoa Cau ala mat Quôk hội in di tŭ tơngai.

VOV.K’Ho- Drim òr (29/09), Phó Củ tịc lơgar, Phó Củ tịc dơ̆ I Mpồl duh broă tàm pơrlòng- Pà khà jờng Dà lơgar mò Võ Thị Ánh Xuân tus bal mờ đơng lam Pơrjum dờng tàm pơrlòng kờñ gơboh Dà lơgar càr Lâm Đồng dơ̆ I.

VOV.K'Ho- Tus ngai 29 nhai 09, mìu càl dờng neh lơh 11 nă cau gơtìp chơ̆t, 13 nă cau jòi ờ gŏ ƀồc, 8 nă cau ờ gơtùi hòi, 33 nă cau sồt să, uă hìu đam, hìu lơh sa gơtìp aniai uă.

VOV.K’Ho- Drim òr (28/09), tàm sàh Phùng Nguyên, càr Phú Thọ, Thủ tướng ồng Phạm Minh Chính neh tus bal dơ̆ sơn đờm ai ngui, ai rơndeh lòt rê rơbàng Phong Châu pa.

VOV.K'Ho- Mho òr (28/09), tàm càr Thanh Hóa, Phó Thủ tướng ồng Trần Hồng Hà đơng lam pơrjum tơn mờ pờ tơlik tàm internet mờ ală càr, ƀòn dờng bơh Thanh Hóa tus Đà Nẵng nàng kờñ lam lơh broă rơcang lài drơng wơl mờ càl rbut dờng sồ 10.