Tàm dơ̆ pơrjum, Thủ tướng đơs loh, lơh hìu ơm nàng tac bro là dipal mờ bơta pràn tă tơm priă mờ hìu ơm ai ơpah là dùl jơnau lơh nền bơh Đảng mờ Dà lơgar dê. Thủ tướng sồr tam gơl pràn bồ tơngoh kơlôi sơnơng bơh lơh hìu ơm nàng tac bro gơ gơs rề ơnàng jơh bal hìu ơm tac bro mờ hìu ơm ai ơpah, tàm hơ̆ hìu ơm ai ơpah geh git nền là kuơmàng, jŏ jòng, drơng gal ngan làng bol, ngan là cau lơh phan, cau lơh broă, cau bơsram dờng, mpồl phàu crong…

Thủ tướng sồr ƀòn dờng Hà Nội ai lài lơh tơrlòng lài, pal lam lài, jal mhar sền nền wơl jơh rơndap ù tiah ngui ù, rơndap ù tiah tiah drà mờ ƀòn lơgar… nàng geh broă rơndap lơh rơndap tap sèng, bơtàu tơnguh broă lơh tơrlòng lài hìu ơm ai ơpah; lơh ngan sơn đờm lam lơh bàr, pe rơndap broă lơh tàm nhai 6 tus. Ƀộ Bơt bơtàu rơcang lài yal di tŭ ală gùng dà, broă lơh pa, gùng dà tơrgùm jơh ală bơta lam lơh hìu ơm ai ơpah nàng ală tiah in lơh hìu ơm ai ơpah mờ Ƀộ lam lơh sền swì, jat sền. Bal mờ hơ̆, Ƀộ bơt bơtàu rơcang lài pơgồp bal mờ ală tiah, lài ngan là Hà Nội, ƀòn dờng Hồ Chí Minh, Đồng Nai, Hải Phòng, Đà Nẵng, lơh sră wac rùp ù tiah jơnau kờñ hìu ơm ai ơpah lơh bơnàng jă rơndap ù tiah mờ tam pà priă jền; đơng lam pơgồp bal mờ ală ƀộ, anih lơh broă mờ ală tiah kơlôi sơnơng yal jàu khà mùl màl lơh hìu ơm ai ơpah tàm gùt lơgar, yal Thủ tướng in tàm nhai 7 tus tơn.