Pơrjum geh lơh jat broă lơh pơrjum tơn pơgồp bal mờ pờ tơlik tàm internet tơrbŏ tus 33 anih pờ tơlik tơn tàm ală càr, ƀòn dờng. Củ tịc Quôk hội đơs sùm, tơngai lơh broă pa do là dùl tơngai lơh broă is ồn ngan bơh Mpồl duh broă Làng bol ală kâp dê, dà lơgar pal kong mờ uă bơta kal ke, bơta lòng ờ hềt bơh lài tus tŭ do; kòp dờng Kovid-19, trồ tiah lơh aniai, tam gơl nhơm trồ tiah lơh gơbàn jơnau gơ lời wơl kơn jơ̆ kơn jut ngan; ală bơta tàm dunia tam gơl mhar mờ kal ke ngan. Đảng, Dà lơgar ai lơh jat, lam lơh uă broă lơh nền kuơmàng bè tam gơl pa broă lơh gơguh lơh sa, tam gơl sồ dà lơgar, tam gơl wơl mpồl lơh broă sră pơ àr gơnoar atbồ, tam pà kâp, jàu gơnoar mờ rơndap tap sèng mpồl lơh broă sră pơ àr gơnoar atbồ.

Tàm bơta bè hơ̆, tềng đap bơta đơng lam, sồr lơh nền nòn ngan bơh Dà lơgar dê, Mpồl duh broă Làng bol ală kâp neh pơn đơl sơrlèt gan kal ke, pơn jat tai đơs nền gơnoar broă là anih lơh broă geh gơnăp gơnoar dà lơgar tàm kâp hơ đơm, ala mat ai nùs nhơm, bơta kơp kờñ mờ gơnoar lơh tờm bơh làng bol dê. Bulah bè hơ̆, Củ tịc Quôk hội kung đơs là, tŭ lam lơh broă lơh gơnoar atbồ 2 kâp gam uă kal ke, bơta lòng: ù tiah atbồ ơnàng rlau, khà broă uă rlau, jơnau sồr kung uă rlau sơl; pràn jak kwang bàng tàm bàr pe tiah gam ờ hềt niam; phan bơna, măi mok yal tơnggit jơnau ờ hềt ndrờm bal. Củ tịc Quôk hội ồng Trần Thanh Mẫn sồr Mpồl duh broă Làng bol ală kâp kờñ pal geh bơta lơh ngan pa, bồ tơngoh kơlôi sơnơng pa, broă lơh pa, bơt bơtàu gùng dà tam gơl pràn, ngui jak chài măi mok, tam gơl sồ, bồ tơngoh jak kòn bơnus lơh gơs tàm lơh broă.