Bơh bồ nam tus tŭ do, tiah lơh sa mờ ală tiah lơh sa mờ măi mok tàm càr neh gơ hòi gơ jà tai uă rơndap broă lơh pa tàm gah lơh sa mờ măi mok, lơh gơlik phan mờ năng lượng. Khà bồr bềng tàm ală tiah lơh sa mờ măi mok gam lơh broă geh mờr 92%. Tiah lơh sa Nam Phú Yên mờ ală tiah lơh sa mờ măi mok neh gơ hòi gơ jà geh 133 rơndap broă lơh mờ kờp jơh priă bơcri cih tàm sră mờr 35 rbô tơmàn đong.

Tàm dơ̆ tìp mat tơm boh bơr, uă bơta gơ kòl gơ rềng tus phan bơna tiah lơh sa mờ măi mok, ơpah ù mờ sră nggal bơcri priă neh geh mpồl lơh sa kă bro yal, dan tă bơsong bơta gơ kòl nàng ƀuơn lơh sa kă bro. Đơng lam Mpồl atbồ tiah lơh sa Nam Phú Yên pà git, mpồl gam lơh pràn tam gơl wơl sră pơ àr gơnoar atbồ, sơlơ pơlam nàng mpồl lơh sa kă bro in lam lơh sră nggal ƀuơn rlau. Gơ wèt mờ jơnau đơs, jơnau dan pờ gùng tàm tơrbŏ bal Tiah lơh sa mờ măi mok An Phú tus gùng sồ 14, kờp dŭ lài broă lơh rơp lơh gơs lài mờ ngai 15/7 tus. Bè jơnau sồr tơm priă ơpah ù dùl dơ̆, Mpồl atbồ rơp pơgồp bal pơlam mpồl lơh sa kă bro lam lơh ală sră pơ àr tam gơl jat jơnau sồr. Di dơ̆ do, Mpồl atbồ Tiah lơh sa Nam Phú Yên kung jàu jơnau lơh nền bơcri priă mờ sră cơng tàng bơcri priă ai 5 rơndap broă lơh pa in mờ kờp jơh priă bơcri lơh mờr 1 rbô 200 tơmàn đong.