Krơi is ngan lơh chờ Chrôi Rum Chếk làng bol kòn cau Khmer dê
Thứ bảy, 05:00, 22/03/2025 Cau mblàng: Lơ Mu K’Yến/ Cau cih: Thạch Hồng (VOV tiah ring dà dờng Cửu Long) Cau mblàng: Lơ Mu K’Yến/ Cau cih: Thạch Hồng (VOV tiah ring dà dờng Cửu Long)
VOV4.K’Ho- Chrôi Rum Chếk (lơh chờ Lơngai dà lềng) geh sền là dùl tàm ală lơh chờ bơh yau ờs mờng ngan cèng uă bơta niam chài kon cau Khmer dê. Lơh chờ geh gơtha nàng răc dan lơngăp lơngai cau lòt dà lềng in geh mìu niam càl niam, lơh geh uă ka dà lềng mờ kah ưn ngài dà lềng bal neh ai pà kòn bơnus in ka ti, ka bềng lìu.

Lơh chờ Chrôi Rum Chếk geh bơyai lơh tàm ƀòn Cà Lăng A Biển, sơnah ƀòn 2, ƀòn drà dờng Vĩnh Châu, càr Sóc Trăng. Jăt làng bol tiah do dê yal, lơh chờ neh geh bơh jŏ ngan gơbloh, pơgăp 300 nam do. Lơh chờ Chrôi Rum Chếk geh lơh tàm ngai 14, 15 nhai 02 nam lơgar he pah nam geh gơtha răc dan dà lơgar ring lơngai làng bol lơngăp lơngai, mìu niam càl niam. Do kung là tŭ nàng làng bol kah wơl tus ală rơnàng cau lài do neh geh dà kơlhề rồ ù rồ tiah, lơh geh bă ù, kah ưn ngài trồ tiah, ală yàng ai khi in geh rài kis hờm ram, kah ưn ngài dà lềng bal neh ai khi in uă ngan uă ngan ka ti. Ồng Sơn Thol, Cau geh bơngă pin dờn dờng hìu yàng phờk Sêrây Cro Săng, sơnah ƀòn 2, ƀòn drà dờng Vĩnh Châu, càr Sóc Trăng, pà gĭt: “Làng bol tàm do uă ngan kơnờm tàm broă lơh dà lềng lòt tras kŭp ka, ka ti, den tàng bè hơ̆ làng bol he lơh yàng răc dan lơngăp lơngai pah nam nàng tơnggŏ nùs nhơm kah ưn ngài tus dà lềng bal neh dong khi in geh rài kis hờm ram. Mờ lơh chờ geh lơh sùm pah nam tus dì tŭ do tơn”.

Bơh sơnrờp lơh chờ là lơh yàng răc dan hwềng suàn geh bơyai lơh kềng ală bơnơm bràs nàng kờñ kah kơlôi dà kơlhề mò pàng, kah ưn ngài dà lềng bal mờ kơ̆p kờñală bơta bơtuah bơtuài niam bơnĕ ngan rlau jơh rơ̆p gơ rê tus mờ làng bol ƀòn lơgar. Tơnơ̆ hơ̆ là lơh yàng rò rùp Yàng Phờk bơh hìu yàng phờk Sêrây Cro Săng tus tàm tiah lơh yàng. Tŭ rùp yàng Phờk geh rò tus anih lơh yàng tơl nă cau rơ̆p lơh yàng gờm chờ bồng bi yàng phờk, tơnơ̆ hơ̆ rò rùp yàng Phờk mŭt mờ tơngui. Pơnjăt hơ̆ tai là lơh yàng pe gơlăng bơtau, răc dan dà lơgar ring lơngai làng bol lơngăp lơngai, hòi dan mờ mblàng jơnau yàng phờk bơh ală cau kơđơng yàng phờk dê drơng lơh mờ bơta tus bal bơh gal ngan làng bol jăt yàng phờk dê. Tơnơ̆ ală broă lơh yàng cèng bềng rùp să pin dờn jăt yàng dê là bơnah lơh chờ mờ uă jơnau nhơl tàp pràn să jan, niam chài đơs crih tam ya bềng bơhiàn jơi bơtiàn. Ală jơnau nhơl uă ngan lơh tơnggŏ wơl ală broă lơh tờm mờ làng bol ơm kis tàm do ngui nàng jòi sa. Bơnah lơh đơs crih tam ya tàm lơh chờ do kung gơhòi gơ jà geh gal ngan làng bol tus bal. Hơ̆ là ală jơnau tam ya, jơnau đơs pơnđik, jơnau đơs crih ờs mờng krơi is ngan bơh làng bol kòn cau Khmer dê.

Ală nam rềp ndo, geh bơta sền gròi, sồr lơh bơh ală kâp, ală gah dê, Lơh chờ Chrôi Rum Chếk sùm geh lơh niam wơl, tơngguh bơngă jơh bal bè tơngume bal mờ broă lơh, gơhòi gơ jà gal ngan làng bol tus bal, lơh gơs “che” tàm bơrkuăt đềt mềr nùs nhơm tam klăc, kờñ gơboh dong kờl bal đah 3 jơi bơtiàn oh mi Yoan- Khmer- Lo gam ơm kis tàm bă ù tiah dà lềng do. Cau geh bơngă pin dờn ồng Sơn Thol pà gĭt tai: “Lài do den bơyai lơh dềt rlau, mơya lơh chờ sùm geh lơh. Ală nam do, geh bơta sền gròi bơh Đảng, Dà lơgar, gơnoar ătbồ ƀòn lơgar dê lơh chờ geh lơh dờng rlau. Tŭ do, geh gùng lòt, ồs đèng nàng bơyai lơh dơ̆ lơh chờ, bơta lơh ală broă lơh yàng kung ƀươn ƀoài, niam rlau”.

Nam do, lơh chờ Chrôi Rum Chêk làng bol Khmer Vĩnh Châu dê geh Ƀộ Niam chài, Tàp pràn să jan mờ Lòt nhơl dờp là phan lời wơl niam chài ờ di phan bơna dà lơgar dê. Do là bơta chờ hờp dờng, là bơta cih dờp ai ală lơh ngan ờ ơm rlô sùm tàm broă sền gàr mờ ngui niam bơta kwơ niam chài ờs mờng bơh yau bơh làng bol Khmer tàm Vĩnh Châu dê. Ồng Sơn Wath, cau tàm Mpồl ătbồ broă hìu yàng phờk Sêrây Cro Săng, yal bơta chờ hờp: “Cau jăt yàng phờk hìu yàng phờk Sêrây Cro Săng, làng bol 3 jơi bơtiàn oh mi chờ hờp ngan, brơn brài ngan, brơn ngan, lơh chờ do geh bơh nđờ rhiang nam do rao, tŭ do gơgơs phan lời wơl niam chài ờ di phan bơna là bơta chờ hờp dờng”.

Ồng Trần Trí Vân, Phó Củ tịc Anih duh broă Làng bol ƀòn drà dờng Vĩnh Châu, càr Sóc Trăng, pà gĭt tai: “Bol hi rơ̆p sơlơ mblàng yal, bơto bơtê tàm mpồl bơtiàn, làng bol jăt yàng Phờk, làng bol ƀòn lơgar, is ồn là gơ wèt mờ rơnàng kơnòm să bè ală bơta kwơ gơ wèt mờ lơh chờ lơngai dà lềng (Chrôi Rum Chếk) neh geh Ƀộ Niam chài, Tàp pràn să jan mờ Lòt nhơl dờp là niam chài ờ di phan bơna kâp dà lơgar dê, lơh sùm mờ lam lơh ală broă lơh pah nam, lơh wơl mờ prăp gàr ală broă lơh yàng, bơhiàn mờng kwèng bơh yau, ală broă lơh đơs crih tam ya ờs mờng bơh yau, gơ jăt bal mờ lơh chờ”.

Lơh chờ Chrôi Rum Chêk geh jơnau kah yau geh bơh jŏ rài, geh gàr sùm, prăp gàr bơh uă rơnàng cau. Bulah sơrlèt uă tŭ tơngai gơguh gơmù bơh jơnau kah yau dê, mơya tus tŭ do lơh chờ do kung gam geh pràn lơh gơrề sơl, bơtàu tơngguh mờ gơgơs dùl tàm ală lơh chờ pơnrơ nan, krơi is ngan bơh càr Sóc Trăng dê, gơhòi gơ jà gal năc lòt nhơl bơh tiah rềp tiah ngài rê tus bal.

Cau mblàng: Lơ Mu K’Yến/ Cau cih: Thạch Hồng (VOV tiah ring dà dờng Cửu Long)

Viết bình luận

TIN CÙNG CHUYÊN MỤC